ខេត្តព្រះសីហនុ ៖ សារធាតុញៀនចំនួន៨កញ្ចប់ធំ និង១៨កញ្ចប់តូច ព្រមទាំងបុរសជនជាតិចិនម្នាក់ បានត្រូវនគរបាលស្រុកព្រៃនប់ ចាប់ខ្លួននិងដកហូតបាននៅក្នុងចម្ការដូងប្រេង ដោយសហការជាមួយកម្លាំងអាវុធហត្ថសន្តិសុខផ្លូវជាតិលេខ៤ ស្នាក់ការ៤០១ និងមានលោក…
ខេត្តព្រះសីហនុ ៖ សារធាតុញៀនចំនួន៨កញ្ចប់ធំ និង១៨កញ្ចប់តូច ព្រមទាំងបុរសជនជាតិចិនម្នាក់ បានត្រូវនគរបាលស្រុកព្រៃនប់ ចាប់ខ្លួននិងដកហូតបាននៅក្នុងចម្ការដូងប្រេង ដោយសហការជាមួយកម្លាំងអាវុធហត្ថសន្តិសុខផ្លូវជាតិលេខ៤ ស្នាក់ការ៤០១ និងមានលោក អ៊ុក សាវឿន មេឃុំតានៃចូលរួមផងដែរ ក្រោយពីមានហេតុការណ៍គ្រោះថ្នាក់ចរាចរណ៍មួយ រវាងរថយន្តនិងរថយន្តក៏ធ្លាយចេញជាគ្រឿងញៀន ។
តាមប្រភពពីសមត្ថកិច្ចបានឱ្យដឹងថា នៅវេលាម៉ោង៣ និង៤០នាទីទៀបភ្លឺថ្ងៃទី២១ ខែកុម្ភៈ មានករណីគ្រោះថ្នាក់ចរាចរណ៍មួយនៅលើដងផ្លូវជាតិលេខ៤ ចន្លោះគីឡូម៉ែត្រលេខ១៥៧ និងលេខ១៥៨ ភូមិមនោរម្យ ឃុំតានៃ ស្រុកព្រៃនប់ ។
រថយន្តមួយគ្រឿងម៉ាកព្រួស ពណ៌.ស ពាក់ផ្លាកលេខ ភ្នំពេញ ២AS-០៦៣២ មានទិសដៅភ្នំពេញទៅខេត្តព្រះសីហនុក្នុងល្បឿនលឿន ដោយក្នុងរថយន្តនោះមានមនុស្សជិះចំនួន៣នាក់សុទ្ធសឹងជាជនជាតិចិន ។ ខណៈមកដល់ចំណុចខាងលើ រថយន្តបានរេចង្កូតទៅខាងឆ្វេងដៃបុកជាមួយរថយន្តធុនធំមួយគ្រឿងម៉ាកហុីយ៉ាន់ដាយ ពណ៌ក្រហម ពាក់ផ្លាកលេខ ភ្នំពេញ ៣B-៦៤០៧ ដែលអ្នកបើកបរចតដេកនៅលើផ្លូវក្រួសក្រហមខាងស្តាំដៃ ។
ប្រភពដដែលបន្តថា ទោះជាយ៉ាងណាការបុកនោះគឺរថយន្តខូចខាតតែបន្តិចបន្តួចប៉ុណ្ណោះ និងមិនបណ្តាលឱ្យមានមនុស្សរងរបួសអ្វីឡើយ ហើយជនជាតិចិនទាំងនោះ បានទាក់ទងហៅមិត្តភក្តិចិនដូចគ្នាពីខេត្តព្រះសីហនុមកទទួល ដោយមានរថយន្ត២គ្រឿង បម្រុងបន្តដំណើរទៅមុខទៀត ។
ប៉ុន្តែពេលនោះ កម្លាំងអាវុធហត្ថស្នាក់ការ៤០១ និងកម្លាំងនគរបាលស្រុកព្រៃនប់ រួមទាំងមេឃុំផងបានមកដល់ដើម្បីសម្របសម្រួលក្នុងហេតុការណ៍គ្រោះថ្នាក់ចរាចរណ៍នេះ ។ ពេលឃើញសមត្ថកិច្ចមកដល់ ជនជាតិចិនម្នាក់ក្នងចំណោមជនជាតិចិនទាំង៣នាក់ ដែលជិះរថយន្តព្រូសមានយួរស្បោងពណ៌ខ្មៅមួយ នៅឆ្ងាយពីកន្លែងកើតហេតុ តែមានអាកប្បកិរិយាហាក់ខ្លាចសមត្ថកិច្ច ។
ដោយមានការសង្ស័យទៅលើថង់ខ្មៅដែលជនជាតិចិននោះកាន់ កម្លាំងសហការក៏សុំពិនិត្យថង់នោះ តែមិនទាន់ទាំងបានឆែកឆេរផង ជនជនជាតិចិនទាំង៣នាក់ខាងលើបានគេចខ្លួនចូលទៅក្នុងចម្ការដូងប្រេងអស់ ដោយបន្សល់ទុកតែថង់ខ្មៅនោះ ហើយគូកនដែលមកទទួលក៏បើករថយន្តគេចខ្លួនដែរ ។ ក្រោយមក កម្លាំង សហការបានធ្វើការឆែកឆេរឃើញមានសារធាតុញៀនប្រភេទម៉ាទឹកកកចំនួន៨កញ្ចប់ធំ និង១៨កញ្ចប់តូច ។
ប្រភពដដែលឲ្យដឹងទៀតថា ក្រោយពីរកឃើញវត្ថុតាងជាក់ស្តែង កម្លាំងសហការបានរុករកជនសង្ស័យក្នុងចម្ការដូងប្រេងទាំងយប់ ហើយរហូតដល់ម៉ោង៨និង៣០នាទីព្រឹក ទើបចាប់បានម្នាក់បញ្ជូនទៅអធិការដ្ឋានស្រុកភ្លាមៗ ។ បន្ទាប់មក បន្តស្រាវជ្រាងចាប់បានម្នាក់ទៀតនៅក្នុងទឹកដីឃុំរាម ជិតចូលដល់ក្នុងក្រុងព្រះសីហនុ រីឯជនពាក់ព័ន្ធផ្សេងៗទៀតសមត្ថកិច្ចកំពុងស្រាវជ្រាវឃាត់ខ្លួនជាបន្ត ។ ដោយឡែក រថយន្តធុនធំដែលត្រូវរថយន្តព្រូសបុកប៉ះនោះ បានបន្តដំណើរទៅមុខទៀតបាត់ទៅដោយមិននៅរកខុសត្រូវអ្វីឡើយ ។
តាមព័ត៌មានក្រៅផ្លូវការឲ្យដឹងថា បន្ទាប់ពីចាប់ឃាត់ខ្លួនជនជាតិចិនទាំង២នាក់នេះ សមត្ថកិច្ចក៏ធ្វើការស្រាវជ្រាវនិងឈានទៅចាប់ខ្លួនជនជាតិចិនជាច្រើននាក់ទៀតនៅក្រុងព្រះសីហនុ រួមជាមួយសារធាតុជាច្រើនកញ្ចប់ តែព័ត៌មានច្បាស់ការណ៍យ៉ាងណានោះ សមត្ថកិច្ចមិនទាន់ទម្លាយឲ្យដឹងទេ ៕
ចែករំលែកព័តមាននេះ