រាជធានីភ្នំពេញ ៖ រថយន្ដធុនធំមួយគ្រឿងដឹកផ្លែស្វាយទម្ងន់១៥តោនធ្វើដំណើរឡើងស្ពានអាកាសព្រះមុនីវង្ស លុះដល់ពាក់កណ្ដាលស្ពានទៅមុខលែងរួច ក៏រអិលថយក្រោយបុករះ រនាំងដែកបង្កាន់ដៃស្ពានបាក់អស់ជាច្រើនកង់ ចំណែករថយន្ដក្រឡាប់ផ្ងារជើងចាក់ស្វាយពេញលើស្ពាន តែសំណាងល្អមិនបង្កអោយនរណាម្នាក់រងរបួសឡើយ។
ហេតុការណ៍នេះបានកើតឡើងកាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃទី១៩ ខែកុម្ភៈ នៅចំនុចគល់ស្ពានអាកាសព្រះមុនីវង្សថ្មី សង្កាត់ចាក់អង្រែលើ ខណ្ឌមានជ័យ។
រថយន្ដធុនធំមានដឹកផ្លែស្វាយខាងលើ ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ៣A-២៣៩៧ បើកបរដោយបុរសម្នាក់ជាប្តី និងអ្នករួមដំណើរម្នាក់ជាប្រពន្ធ ។ ប្តីប្រពន្ធទាំង២នាក់នេះមិនស្គាល់អត្តសញ្ញាណ។
តាមប្រភពព័ត៌មានពីអ្នកបើកបររថយន្តបានប្រាប់អោយដឹងថា រថយន្តខាងលើដឹកស្វាយមានទម្ងន់១៥តោន ដោយដឹកចេញពីស្រុកត្រែងត្រយឹង ក្នុងគោលបំណងទៅប្រទេសវៀតណាម លុះធ្វើដំណើរមកដល់កន្លែងកើត ក៏ឡើងស្ពាន ពេលឡើងដល់ពាក់កណ្ដាលស្ពានស្រាប់តែរថយន្តទៅមុខលែងរួចក៏រអិលថយក្រោយវិញ ។
ប្រភពដដែលបានបន្តថា ភ្លាមៗនោះស្ត្រីជាប្រពន្ធក៏បានយកដុំឈើទៅកល់កង់រថយន្តដែរ តែទប់មិនជាប់ ក៏រអិលថយក្រោយយ៉ាងលឿនឡើងទៅបុករះដែកបង្កាន់ដៃស្ពាន បណ្តាលអោយបាក់អស់ជាច្រើនកង់ ធ្វើអោយរថយន្តក្រឡាប់ផ្ងារជើងចាក់ផ្លែស្វាយពេញលើស្ពានតែម្តង ចំណែកអ្នកបើកបរបានរងរបួសស្រាល តែសំណាងល្អនៅក្នុងហេតុការណ៍នោះមិនបានបង្កអោយអ្នកធ្វើដំណើរឆ្លងកាត់ណាម្នាក់រងគ្រោះឡើយ គឺខូចខាតតែរថយន្ត និងបង្កាន់ដៃស្ពានតែប៉ុណ្ណោះ។
ក្រោយកើតហេតុ អ្នកបើកបររថយន្តបានទាក់យករថយន្តផ្សេងមួយទៀតមកដឹកយកស្វាយចេញទៅ ទុកតែរថយន្តបង្កអោយសមត្ថកិច្ចជំនាញធ្វើការវាស់វែង និងស្ទូចយកទៅរក្សាទុកនៅការិយាល័យនរគរបាលចរាចរណ៍ផ្លូវគោកជាបណ្តោះអាសន្ន រង់ចាំដោះស្រាយនៅពេលក្រោយ ៕
ចែករំលែកព័តមាននេះ