រាជធានីភ្នំពេញ ៖ លោកអ្នកប្រាកដជាស្គាល់លោកហ្វៃ សំអាង តាមរយៈស្នាដៃភាពយន្ត និងទំនុកច្រៀង ប៉ុន្តែមិនដឹងពីប្រវត្តិជីវិតរបស់លោកទេ ។ សូមលោកអ្នកតាមដានប្រវត្តិ ខ្លះៗនៃជីវិតលោកហ្វៃ សំអាង ដែលប្រើប្រាស់ទឹកប៉ាកកាសាងកេរ្តិ៍ឈ្មោះក្នុងវិស័យសិល្បៈតែងនិពន្ធ។
រាជធានីភ្នំពេញ ៖ លោកអ្នកប្រាកដជាស្គាល់លោកហ្វៃ សំអាង តាមរយៈស្នាដៃភាពយន្ត និងទំនុកច្រៀង ប៉ុន្តែមិនដឹងពីប្រវត្តិជីវិតរបស់លោកទេ ។ សូមលោកអ្នកតាមដានប្រវត្តិ ខ្លះៗនៃជីវិតលោកហ្វៃ សំអាង ដែលប្រើប្រាស់ទឹកប៉ាកកាសាងកេរ្តិ៍ឈ្មោះក្នុងវិស័យសិល្បៈតែងនិពន្ធ។
លោកហ្វៃ សំអាង កើតនៅថ្ងៃទី២៩ ខែធ្នូ ឆ្នាំ១៩៦៤ នៅឃុំរកាខ្នុរ ស្រុកក្រូចឆ្មារ ខេត្តកំពង់ចាម ។ ឪពុករបស់លោកឈ្មោះ អ៊ី មួយសី ជាគ្រូបង្រៀន និងជាមេធាវី ចំណែកម្តាយឈ្មោះ ឯក សាមហេង និងមានបងប្អូនចំនួនន៧នាក់ ក្នុងនោះប្រុ៥នាក់ ចំណែកលោកគឺជាកូនទី៦ ។ ឪពុករបស់លោកសំអាង រួមទាំងបងប្អូន២នាក់ទៀត ត្រូវពួកប៉ុល ពត សម្លាប់ចោល ។ ចំណែកម្តាយរបស់លោកទើបតែលាចាកលោក កាលពីពេល ថ្មីៗនេះ ។
ក្នុងជំនួបជាមួយភ្នាក់ងារកោះសន្តិភាពកាលពីពេល ថ្មីៗនេះ លោកហ្វៃ សំអាង រៀបរាប់ថា បន្ទាប់ពីរបបប៉ុល ពត ដួលរលំ លោកតស៊ូរៀនសូត្រ ព្រោះមានគោលបំណងចង់ធ្វើជាអ្នកនិពន្ធ។ នៅឆ្នាំ១៩៨១ លោកនិងមិត្តភក្តិ បាននាំគ្នាទៅមើលល្ខោនបាសាក់ លុះត្រឡប់ទៅផ្ទះវិញ លោកបានរៀនច្រៀងបទល្ខោនបាសាក់តាមគេ ហើយអ្នកដឹកនាំក្រុមល្ខោនឮក៏ទៅសុំម្តាយឱ្យលោកចូលរួមសម្តែង ។ អំឡុងពេលនោះ លោកសំអាង បានសម្តែងជាតួឯកនៅក្នុងរឿងព្រះវេស្សន្តរ ។ មានថ្ងៃមួយអ្នកដឹកនាំរឿងឈឺ លោកក៏បានសុំចូលខ្លួនបំពេញតួនាទីជំនួស ហើយក្លាយជាអ្នកដឹកនាំរឿងតាំងពីពេលនោះមក ។
នៅក្នុងឆ្នាំ១៩៨៣ លោកហ្វៃ សំអាង និងគ្រួសារបានមករស់នៅភ្នំពេញ និងបញ្ចប់ការសិក្សាថ្នាក់វិទ្យាល័យក្នុងឆ្នាំ១៩៨៥ ។ បន្ទាប់មកលោកបន្តការសិក្សាខាងផ្នែកដឹកនាំរឿង និងចប់នៅឆ្នាំ១៩៨៨ ។
នៅក្នុងឆ្នាំ១៩៩០ លោកហ្វៃ សំអាង ចាប់ផ្តើមនិពន្ធបទចម្រៀងដំបូងមានចំណងជើងថា «កុំស្រឡាញ់ស្រីក្នុងវ័យសិក្សា» ច្រៀងដោយលោកប៊ុន ចាន់ថន មានភាពល្បីល្បាញទូទាំងប្រទេស ។ បន្ថែមលើនេះទៀត លោកសំអាង និពន្ធ និងដឹកនាំរឿងភាពយន្ត ដឹកនាំថតបទចម្រៀងកាយវិការជាសាច់រឿងខ្លី ទទួលបានជោគជ័យជាបន្តបន្ទាប់ ។
លោកហ្វៃ សំអាង រំឭកថា នៅក្នុងឆ្នាំ១៩៨៩ លោកនិពន្ធរឿងភាពយន្ត «បុប្ផាភ្នំពេញ» រឿង «កំលោះឆ្នាំ៩១» រឿង «ឋានសួគ៌នៅឯណា» រឿង «ក្រមុំឆ្នាំ៩២» រឿង «សន្ទូចអត់នុយ» រឿង «ជីវិតតារាភាពយន្ត» និងរឿង «នេះគឺរឿងខ្ញុំ» ។
នៅឆ្នាំ១៩៩៥ ស្ថានីយទូរទស្សន៍ប៉ុស្តិ៍លេខ៣ កើតឡើងគេក៏ទាក់ទងឱ្យលោកផលិតកម្មវិធី តែពីដំបូងលោកបដិសេធ ។ ដោយមានការជំរុញ និងលើកទឹកចិត្តពីអ្នកនិពន្ធ និងអ្នកដឹកនាំរឿងជើងចាស់មួយចំនួន លោកហ្វៃ សំអាង ក៏ទៅសិក្សានៅប្រទេសថៃ លុះពេលចប់ត្រឡប់មកធ្វើជានាយកផលិតកម្មវិធីនៅទូរទស្សន៍ប៉ុស្តិ៍លេខ ៣ ។ នៅទីនោះមហាជនទូទាំងប្រទេសបានទទួលស្គាល់ស្នាដៃដឹកនាំផលិតកម្មវិធីរបស់លោក ។
ក្រៅពីធ្វើជាអ្នកផលិតកម្មវិធី លោកហ្វៃ សំអាង ឆ្លៀតពេលនិពន្ធ និងដឹកនាំរឿងភាពយន្តមានដូចជា រឿង «កូនពស់កេងកង» រឿង «ទុំទាវ» រឿង «មរណមាតា» រឿង «ចៅពស់កេងកង» រឿង «មន្តមាយា» រឿង «ភ្នំទាបជាងស្មៅ» រឿង «ជាតិស្ត្រី» និងរឿង «ពិសស្នេហ៍» ជាដើម ។ ពេលនេះលោកកំពុងតែរកពេលវេលាដើម្បីផលិតរឿងថ្មីចំនួនពីររឿងទៀត គឺរឿង «អ្នកស្នងទាយាទ» និងរឿង «មេឃនិងដី» ។ សរុបរឿងដែលលោកបាននិពន្ធ និងដឹកនាំថតដោយខ្លួនឯងមិនក្រោម២០រឿងទេ ។
ពីឆ្នាំ២០០២ ដល់ឆ្នាំ២០០៤ លោកហ្វៃ សំអាង បានដាក់ទុនជាមួយផលិតកម្ម SSB តែបន្ទាប់មកបានលក់ហ៊ុនវិញ ។ នៅឆ្នាំ២០០៤ លោកបើកផលិតកម្ម Nice Stars ដោយប្រើដើមទុនផ្តាច់មុខ តែរហូតមកដល់ឆ្នាំ២០០៨ផ្អាកការផលិត ។
តារាចម្រៀងដែលច្រៀងបទ ជាស្នាដៃរបស់លោកហ្វៃ សំអាង មានដូចជា អ្នកនាងម៉េង កែវពេជ្ជតា, អ្នកស្រីហ៊ឹម ស៊ីវន, លោកព្រាប សុវត្ថិ, លោកសុះ ម៉ាច, អ្នកស្រីសួន ចន្ថា, លោកពេជ្រ ពន្លឺ, អ្នកស្រីអ៊ុន សុផល, លោកប៊ុន ចាន់ថន, លោកមិញ សុធីវណ្ណ, អ្នកស្រីសុខ សុខុម, អ្នកស្រីសន ចរិយា, លោកព្រំ សុីវុទ្ធី, នាងគឹម លក្ខិណា, លោកណុប បាយ៉ារិទ្ធ, កញ្ញាពៅ បញ្ញាពេជ្រ, នាងទូច ស៊ុននិច, លោកហេង ប៊ុនលាភ, កញ្ញាយុង ច័ន្ទកណ្ណិកា និងនាងកែវ ច័ន្ទសម្ផស្ស ជាដើម ។ ស្នាដៃបទភ្លេង និងទំនុកច្រៀងរបស់លោកហ្វៃ សំអាង មានចំនួន៦០០បទ ។ ដោយឡែកបទចម្រៀងដែលជាស្នាដៃនិពន្ធទំនុកច្រៀងរបស់លោក តែបទភ្លេងបរទេស មានចំនួនជាង៨០០បទ ។ នៅក្នុងចំណោមបទទាំងនោះ បទដែលល្បីខ្លាំងមានប្រហែលជា៦០០បទ បើគិតតាំងពីឆ្នាំ១៩៩០ រហូតមកដល់បច្ចុប្បន្ន ។
ក្នុងអាជីពជាអ្នកនិពន្ធនេះ នៅឆ្នាំ២០០៣ លោកហ្វៃ សំអាង ទទួលពានរង្វាន់កាក់មាសសម្រាប់ភាពយន្តដែលល្អ និងបានប្រាក់ចំណូលច្រើនជាងគេ ។ ឆ្នាំ២០០៤ លោកទទួលពានរង្វាន់លេខ៣ផ្នែកនិពន្ធទំនុកច្រៀង ដែលចូលរួមប្រកួតក្នុងកម្មវិធីអេស៊ានប៉ុប មានចំនួន១៣ប្រទេសចូលរួម នៅទីក្រុងយូកូហាម៉ា ប្រទេសជប៉ុន ក្រោមប្រធានបទ «រួមគ្នាថែរក្សាធម្មជាតិ និងសន្តិភាព» ។ ឆ្នាំ២០០៥ លោកហ្វៃ សំអាង ទទួលពានរង្វាន់ថាសមាស ផ្នែកដឹកនាំរឿងឆ្នើម គឺរឿង «មរណមាតា» នៅក្នុងមហោស្រពភាពយន្តលើកទី២ រៀបចំដោយក្រសួងវប្បធម៌ និងវិចិត្រសិល្បៈ ។
លោកហ្វៃ សំអាង បានរៀបការជាមួយអ្នកស្រី តែ លីឆេង ជាគ្រូពេទ្យធ្មេញ នៅឆ្នាំ១៩៩៨ និងមានកូន៤នាក់ កូនច្បងឈ្មោះ សំអាង ដួងចិត្ត កូនប្រុសទីពីរឈ្មោះ សំអាង ដួងសិទ្ធិ បានចូលរួមសម្តែងនៅក្នុងរឿង «មន្តមាយា» ចំណែកកូន២នាក់ទៀតជាកូនភ្លោះ ស្រី១ និងប្រុស១ ៕
ចែករំលែកព័តមាននេះ