រាជធានីភ្នំពេញ ៖ ជនជាតិចិនម្នាក់សង្ស័យស្រវឹងស្រាបើករថយន្តបុករ៉ឺម៉កកង់បី និងម៉ូតូចតនៅមុខផ្សាររងរបួសធ្ងន់៣នាក់ បង្កអោយមានការភ្ញាក់ផ្អើលកាលវេលាម៉ោង៤និង១០នាទីទៀបភ្លឺ ឈានចូលថ្ងៃទី១៥ ខែកុម្ភៈ ឆ្នាំ២០១៩ នៅតាមបណ្ដោយផ្លូវជាតិលេខ៤ មុខផ្សារជម្ពូវ័ន ដែលស្ថិតនៅភូមិជម្ពូវ័នសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះទាំង៣នាក់ខាងលើ ភ្លាមៗដោយមិនបានស្គាល់ឈ្មោះឡើយដែលកំពុងអង្គុយលើរ៉ឺម៉កកង់បី ។ រថយន្តដែលបង្កគ្រោះថ្នាក់ម៉ាកឡង់គ្រីស័រ សេរី២០១៤ ពណ៌ស ពាក់ស្លាកលេខភ្នំពេញ 2AR- 9977 បើកបរដោយបុរសជនជាតិចិនម្នាក់បើកក្នុងទិសដៅពីកើតទៅលិច ។ ចំណែករ៉ឺម៉កម៉ូតូកង់បីចតបញ្ច្រាស់ចរាចរណ៍នៅមុខផ្សារ ក្នុងទិសដៅពីលិចទៅកើត ។ ហើយចំណែកម៉ូតូចតនៅខាងក្រៅជាប់បរិវេណផ្សារ ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបាននិយាយប្រាប់ថា នៅមុនពេលកើតហេតុគេឃើញរ៉ឺម៉កកង់បីចតនៅមុខផ្សារបញ្ច្រាស់ចរាចរណ៍ដោយម្នាក់នៅលើរ៉ឺម៉កកង់បី និង២នាក់ទៀតកំពុងយកអីវ៉ាន់ដាក់លើរ៉ឺម៉កកង់បី ខណៈពេលភ្លាមៗនោះស្រាប់តែឃើញរថយន្តជនជាតិចិនខាងលើបើកក្នុងល្បឿនយ៉ាងលឿនក្នុងទិសដៅពីកើតទៅលិច ហើយបានរ៉េចង្កូតទៅផ្នែកខាងស្ដាំ ហើយបានបុករ៉ឺម៉កកង់បីខាងលើពេញទំហឹង បណ្តាលឲ្យរងរបួសធ្ងន់ម្នាក់និងស្រាល២នាក់ ។
តាមប្រភពព័ត៌មានពីកន្លែងកើតហេតុបានបន្តទៀតថា ខណៈជនរងគ្រោះត្រូវបានរថយន្តសាមុយឯកជនបានដឹកយកទៅសង្គ្រោះភ្លាមៗដោយជនជាតិចិនខាងលើជួយលើកជនរងគ្រោះដាក់លើរថយន្តផងដែរ ។
ក្រោយពេលកើតហេតុតៃកុងរថយន្តបង្កខាងលើត្រូវបានសមត្ថកិច្ចនាំយកទៅប៉ុស្តិ៍ ដើម្បីការពារសុវត្ថិភាពតៃកុងបន្ទាប់មកចរាចរណ៍ខណ្ឌពោធិ៍សែនជ័យធ្វើការវាស់វែង និងយកទៅរក្សាទុក ដើម្បីរង់ចាំការដោះស្រាយ ៕
ចែករំលែកព័តមាននេះ