ការមានរុក្ខជាតិឱសថក្នុងផ្ទះនឹងផ្ដល់អត្ថប្រយោជន៍ប្រសើរណាស់ចំពោះអ្នក ដោយមិនចាំបាច់ត្រូវទៅជួបជាមួយគ្រូពេទ្យញឹកញាប់ និងទទួលទានថ្នាំពេទ្យ ក៏ដូចជាត្រូវចំណាយប្រាក់អស់ច្រើនរាល់ពេលមានជំងឺទូទៅដូចជា ឈឺក្បាល, ឈឺពោះ និងបញ្ហាសុខភាពដទៃទៀតស្រដៀងគ្នានេះ ។ ដូច្នេះចូរព្យាយាមដាំរុក្ខជាតិឱសថចំនួន២ មុខដែលមានប្រសិទ្ធភាពជួយព្យាបាល និងផ្ដល់សុខភាពល្អ ៖
១. ជីរម្រះព្រៅ ៖ ជីរម្រះព្រៅមិនត្រឹមតែជាគ្រឿងផ្សំបន្ថែមក្លិន និងរសជាតិនៃអាហារប៉ុណ្ណោះទេ ប៉ុន្តែជាប្រភេទនៃឱសថរុក្ខជាតិដ៏មានប្រសិទ្ធភាពខ្ពស់ផ្ដល់អត្ថប្រយោជន៍យ៉ាងច្រើនចំពោះសុខភាពគួរឱ្យកត់សម្គាល់។ យោងតាមរបាយការណ៍មួយពីស្ថាប័នដែលទទួលខុសត្រូវចំពោះការដឹកនាំ និងការគាំទ្រដល់វិជ្ជាជីវៈឱសថស្ថាននៅក្នុងប្រទេសអង់គ្លេស, ស្កុតឡេន និងវ៉េល Royal Pharmaceutical Society បានបង្ហាញថា ប្រេងដែលចម្រាញ់ចេញពីជីម្រះព្រៅ ក៏ដូចជាទឹកជីម្រះព្រៅជួយកាត់បន្ថយការរលាកក្នុងរាងកាយ ក៏ដូចជាអាការហើមបានដល់ទៅ ៧៣ ភាគរយឯណោះត្រឹមរយៈពេលប្រមាណពី២ទៅ៣ ម៉ោងក្រោយពីការប្រើប្រាស់ ។
ការស្រាវជ្រាវមួយដែលត្រូវបង្ហាញនៅសន្និសីទឱសថអង់គ្លេសបានបង្ហាញថា ទឹកជីម្រះព្រៅមានប្រសិទ្ធភាពសម្លាប់ម៉ូឡេគុលដែលបង្កគ្រោះថ្នាក់ និងការពារខួរក្បាលបេះដូង រួមទាំងថ្លើមមិនឱ្យទទួលរងការខូចខាតពីសំណាក់ឥទ្ធិពលរបស់រ៉ាឌីកាល់សេរី ។ ក្នុងរូបមន្តបុរាណដើម្បីសម្រួលដល់ក្រពះអំឡុងពេលពិបាករំលាយអាហារ គឺការទទួលទានស្លឹកជីរម្រះព្រៅ, ទំពាស្លឹកម្រះព្រៅដើម្បីព្យាបាលអាការក្អកខ្លាំង និងឆ្ពុងដើម្បីបំបាត់អាការឈឺក្បាល និងលាបលើកន្លែងសត្វល្អិតខាំដើម្បីបំបាត់ការឈឺចាប់ និងបណ្ដេញជាតិពិស ។
២. ប្រទាលកន្ទុយក្រពើ ៖ តាំងពីយូរណាស់មកហើយដែលប្រទាលកន្ទុយក្រពើត្រូវបានទទួលស្គាល់ថាជារុក្ខជាតិមានប្រសិទ្ធភាពខ្ពស់ជួយព្យាបាលរបួស ផ្សេងៗ រួមទាំងបញ្ហាស្បែក ។ នៅពេលបច្ចុប្បន្ន ប្រទាលកន្ទុយក្រពើត្រូវបានគេប្រើព្យាបាលជំងឺ និងបញ្ហាសុខភាពជាច្រើន រួមទាំងជំងឺហឺត, ជំងឺទឹកនោមផ្អែម, ជំងឺស្កន់ ឬឆ្កួតជ្រូក និងជំងឺស្បែក psoriasis។ ប្រទាលកន្ទុយក្រពើក៏ត្រូវបានប្រើជាគ្រឿងផ្សំថែរក្សា និងដោះស្រាយបញ្ហាសម្រស់ផងដែរ ។
លើសពីនេះទៅទៀត ទឹកប្រទាលកន្ទុយក្រពើមានប្រសិទ្ធភាពសម្រួលដល់ប្រព័ន្ធរំលាយអាហារ ក៏ដូចជាការរំលាយអាហារដោយជួយកាត់បន្ថយការរលាកក្រហាយ និងលើកកម្ពស់ការព្យាបាលដំបៅក្រពះ ។ ការទទួលទានទឹកប្រទាលកន្ទុយក្រពើក៏ជួយបំបាត់ការរលាកក្នុងរោគសញ្ញានៃការរលាកពោះវៀនរលាក និងជំងឺរលាកក្នុងរាងកាយជាច្រើនដទៃទៀតផងដែរ(ប្រភពពី៖ Health.com.kh) ៕
ចែករំលែកព័តមាននេះ