រាជធានីភ្នំពេញ ៖ សេចក្តីរាយការណ៍ឱ្យដឹងថា អគាររោងចក្រផលិតម្ជុលគ្រប់ប្រភេទយីហោ «មកូដុ ខេមបូឌា ខូអិលធីឌី» រួមជាមួយម៉ាសុីនសង្វាក់ផលិតកម្មវត្ថុធាតុដើម ព្រមទាំងផលិតផលសម្រេច និងសម្ភារផ្សេងៗទៀត…
រាជធានីភ្នំពេញ ៖ សេចក្តីរាយការណ៍ឱ្យដឹងថា អគាររោងចក្រផលិតម្ជុលគ្រប់ប្រភេទយីហោ «មកូដុ ខេមបូឌា ខូអិលធីឌី» រួមជាមួយម៉ាសុីនសង្វាក់ផលិតកម្មវត្ថុធាតុដើម ព្រមទាំងផលិតផលសម្រេច និងសម្ភារផ្សេងៗទៀត ត្រូវបានអគ្គិភ័យឆាបឆេះយ៉ាងសន្ធោសន្ធៅ បណ្ដាលឱ្យបាត់បង់ទាំងស្រុង គិតជាទឹកប្រាក់អស់រាប់ម៉ឺនដុល្លារឯណោះ ដែលមូលហេតុនេះ សង្ស័យអាចមកពីទុស្សេចរន្តភ្លើង។
ហេតុការណ៍បាន កើតឡើងនិងបង្កភ្ញាក់ផ្អើល កាលពីវេលាម៉ោង០២និង៣០នាទីចូលថ្ងៃទី០៩ កុម្ភៈ នេះ ស្ថិតក្នុងតំបន់សេដ្ឋកិច្ចពិសេសភ្នំពេញ ក្នុងភូមិភ្លើងឆេះរទេះលិច សង្កាត់ ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ ។ បើតាមនគរបាលថា អគាររោងចក្រដែលត្រូវបានភ្លើងឆេះនេះ សាងសង់ពីថ្មលាយដែកប្រក់ដំបូលស័ង្កសី ទំហំបណ្ដោយប្រវែង៦៥ម៉ែត្រ និងទទឹង៤៥ម៉ែត្រ ។ ក្នុងហេតុការណ៍នេះ មិនមានមនុស្សណាម្នាក់រងគ្រោះថ្នាក់នោះទេ ព្រោះមិនមានកម្មករធ្វើការ ។
ប្រភពដដែលបន្តថា មុនដំបូងសន្តិសុខយាមនៅទីនោះ បានឃើញមានផ្សែងហុយចេញពីក្នុងអគារខាងលើហើយក៏បានរាយការណ៍ទៅអាជ្ញាធរ ដើម្បីសុំជំនួយពីរថយន្តពន្លត់អគ្គិភ័យជួយអន្តរាគមន៍ ។ ពេលនោះបានបង្កឲ្យមានការភ្ញាក់ផ្អើលទាំងយប់ ។ ក្រោយពីទទួលបានព័ត៌មាននោះភ្លាម រថយន្តពន្លត់អគ្គោភ័យរបស់អង្គភាពនានារួមមាន អង្គភាព៧១១ រថយន្តរបស់អង្គភាពកងទ័ពពិសេសឆ័ត្រយោង លេខ៩១១ និងរថយន្តរបស់ស្នងការដ្ឋាននគរបាលរាជធានីភ្នំពេញ សរុបជាង២០គ្រឿង បានចេញអន្តរាគមន៍ខណៈនោះភ្លើងបានឆេះយ៉ាងសន្ធោសន្ធៅ និងមានសម្លេងផ្ទុះនៅក្នុងនោះផងដែរ ។
ប្រភពបន្តថា ក្រុមពន្លត់បានចូលទៅពន្លត់ភ្លើងនិងបានប្រើប្រាស់ទឹកអស់ជាច្រើនសុីទែន ព្រមទាំងប្រើពេលជាង៣ម៉ោងក្នុងការពន្លត់ភ្លើង រហូតដល់វេលាម៉ោងជាង៦ព្រឹកថ្ងៃដដែល ទើបភ្លើងរលត់ទៅវិញទាំងស្រុង ។
ចែករំលែកព័តមាននេះ