ខេត្តស្វាយរៀង ៖ ដោយមើលឃើញនូវបញ្ហាប្រឈមចំពោះគ្រោះថ្នាក់ចរាចរណ៍អង្គភាពស្ថាបនាផ្លូវថ្នល់ នៃក្រសួងសាធារណការ និងដឹកជញ្ជូន ក្រោមឥណទានពីធនាគាអភិវឌ្ឍអាស៊ីការអប់រំ និងផ្សព្វផ្សាយផ្តោតសំខាន់លើការហានិភ័យនៃល្បឿនបើកបរ ការប្រើប្រាស់មួកសុវត្ថិភាពការប្រើប្រាស់កង់ ។
ការផ្សព្វផ្សាយសិស្សានុសិស្សនៃវិទ្យាល័យ និងអនុវិទ្យាល័យនៃស្រុកនៅតាមបណ្តោយផ្លូវជាតិលេខ១៣ និងលេខ១៨ ក្នុងខេត្តស្វាយរៀង ផ្តោតសំខាន់ស្តីពីសុវត្ថិភាពចរាចរណ៍ផ្លូវ គោក មុនថ្ងៃបុណ្យចូលឆ្នាំចិន-វៀតណាម គ្រោះថ្នាក់ចរាចរណ៍ផ្លូវគោក ។
លោក គង់ សាមឿន នាយកវិទ្យាល័យរមាសហែកបានឱ្យដឹងថា ក្នុងនាមលោកនាយ កសាលា លោកពិតជាមានសេចក្តីរិករាយដែលក្រសួងសាធារណការ និងដឹងជញ្ជូនបានយកចិត្តទុកដាក់ចំពោះសុខទុក្ខរបស់សិស្សានុសិស្សរបស់លោកដែលបានរៀបចំឱ្យអ្នកជំនាញចុះអប់រំ និងផ្សព្វផ្សាយស្តីពីសុវត្ថិភាពចរាចរណ៍ផ្លូវគោកដល់សាលាបែបនេះ ព្រោះបច្ចុប្បន្ន ក្រោមផ្លូវ ត្រូវបានកែលំអ លោកសង្កេតឃើញថា អ្នកបើកបរបានបើកលឿនខុសពីមុន ដែលស្ថានភាពផ្លូវមានការលំបាកទាំងនេះជាមូលហេតុដែលនាំឱ្យកើតមានគ្រោះថ្នាក់ចរាចរណ៍ លោកក៏បានលើកឡើងផងដែរថា ផ្លូវធ្វើមិនទាន់រួចស្រួលបួលផងឃើញតែគំនូសដែលនគរបាលគូន កន្លែងគ្រោះថ្នាក់ចរាណ៍ពេញតែផ្លូវ ។ ក្នុងឱកាសនេះដែរ លោកក៏បានប្រកាសឱ្យសិស្សយកចិត្តទុកដាក់ស្តាប់អ្នកជំនាញ និងជួយអប់រំផ្សព្វផ្សាយដល់អ្នកភូមិដែលមិនបានចូលរួមធ្វើយ៉ាងណា ដើម្បីសុវត្ថិភាពចរាចរណ៍ពេលធ្វើដំណើរ ។
ចំណែក លោកពា គីមវង ទីប្រឹក្សាបច្ចេកទេស និងអ្នកជំនាញផ្នែកសុវត្ថិភាពចរាចរណ៍ ផ្លូវគោកបានឱ្យដឹងថា បច្ចុប្បន្នគ្រោះថ្នាក់ចរាចរណ៍ផ្លូវគោលបានសម្លាប់មនុស្សជាមធ្យមពី៥ទៅ៦នាក់ ក្នុងមួយថ្ងៃ ហើយក្នុងមួយឆ្នាំមានមនុស្សប្រមាណ២០០០នាក់បានស្លាប់បាត់បង់អាយុជីវិត ដោយគ្រោះថ្នាក់ចរាចរណ៍នៅលើដងផ្លូវនៃព្រះរាជានាចក្រកម្ពុជា ។ លោកបានបន្ថែមថាការបម្លាស់ប្តូរឥរិយាបទអ្នកប្រើប្រាស់ផ្លូវ គឺពិតជាមិនងាយ និងធ្វើការផ្លាស់ប្តូរទេ បើសិនខ្វះការចូលរួមពីអ្នកប្រើប្រាស់ផ្លូវអាជ្ញាធរដែនដី ថ្នាក់ដឹកនាំស្ថាប័នពាក់ព័ន្ធ រួមនិងអ្នករៀបចំគោលនយោបាយថ្នាក់ជាតិ និងថ្នាក់តំបន់ព្រោះភាគច្រើននៃគ្រោះថ្នាក់ចរាចរណ៍ផ្លូវគោកកើតឡើងដោយសារកត្តាមនុស្សមានរហូតដល់៩៥% ដែលក្នុងនោះមានដូច ជាការបើកបរហួសល្បឿនកំណត់ ការបើកបរក្រោយពេលហូបគ្រឿងស្រវឹង ការវ៉ាជែងក្នុងស្ថានភាពគ្រោះថ្នាក់ ឬការប្តូរគន្លងផ្លូវមិនបានត្រឹមត្រូវ ។
លោកពា គីមវង បានស្នើរសុំឱ្យអ្នកប្រើប្រាស់ផ្លូវទាំងអស់ចូលរួមគោរពច្បាប់ស្តីពីចរាចរណ៍ផ្លូវគោក និងមានការយោគយល់គ្នាទៅវិញទៅមក ពិសេសនៅពេលដែលមានចរាចរណ៍មមាញឹកនៅលើដងផ្លូវ ពិសេសក្នុងឱកាសបុណ្យសំខាន់ៗ ។ លោកបានបន្ថែមថា ការអប់រំស្តីពីសុវត្ថិភាពចរាចរណ៍ផ្លូវគោកដល់សិស្សានុសិស្សនាពេលនេះ ពិតជាមានសារៈសំខាន់សម្រាប់ចូលរួចកាត់បន្ថយគ្រោះថ្នាក់ចរាចរណ៍ផ្លូវគោកដល់សិស្សានុសិស្សប្រជាកសិករ ដែលជាជនដែលងាយរងគ្រោះដោយគ្រោះថ្នាក់ចរាចរណ៍ផ្លូវគោកព្រោះអ្នកប្រើប្រាស់ផ្លូវទាំងនោះមិនទាន់មានបទពិសោធន៍គ្រប់គ្រាន់ ក្នុងការប្រើប្រាស់ផ្លូវថ្មី ដែលផ្តល់ដោយរាជរដ្ឋាភិលបាល ។
ក្រោយការចង្អុលបង្ហាញពីថ្នាក់ដឹកនាំនៃក្រសួងសាធារណការ និងដឹកជញ្ជូនការអប់រំ និងផ្សព្វ ផ្សាយដើរតួនាទីយ៉ាងសំខាន់ក្នុងការចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ ពិសេសកសិករ និងប្អូនៗក្មួយៗសិស្សានុសិស្សដែលជាអ្នកប្រឈមចំពោះគ្រោះថ្នាក់ចរាចរណ៍ផ្លូវគោក ។ នៅក្នុងឆ្នាំ២០១៨ កន្លងមកមានមនុស្សចំនួន១៧៦១នាក់ស្លាប់ និងរបួសចំនួន៤៧៧០នាក់ ដោយគ្រោះថ្នាក់ចរាចរណ៍នៅទូទាំងប្រទេសកម្ពុជានេះ បើតាមតួរលេខពីក្រសួងមហាផ្ទៃ ។
គ្រោះមហន្តរាយនេះពិតជាបានធ្វើឱ្យមានការរាំងស្ទះក្នុងដំណើរកិច្ចអភិវឌ្ឍន៍ប្រទេសជាតិ ។ គ្រោះថ្នាក់ចរាចរណ៍បានធ្វើឱ្យប៉ះពាល់យ៉ាងធ្ងន់ធ្ងរដល់សេដ្ឋកិច្ចគ្រួសារ និងសង្គម ។ សូមជម្រាបថា ការអប់រំផ្សព្វផ្សាយពីគ្រោះថ្នាក់ចរាចរណ៍ធ្វើឡើង កាលពីថ្ងៃទី២៨ ដល់ថ្ងៃទី៣១ ខែមករា និងថ្ងៃទី០១ ខែកុម្ភៈ ឆ្នាំ២០១៩ ៕
ចែករំលែកព័តមាននេះ