រាជធានីភ្នំពេញ ៖ យុវសិស្សវិទ្យាល័យទួលអំពិលម្នាក់ បានរងរបួសបែកក្បាលយ៉ាងដំណំ និងម្នាក់ទៀតរងរបួសដៃ ខណៈដែលពួកគេទាំង២នាក់កំពុងអង្គុយហូបប្រហិតនៅក្នុងទីធ្លាសាលា ដោយមិនដឹងខ្លួន ស្រាប់តែមានសិស្សរួមសាលា៤នាក់ទៀត ចូលទៅទាញកៅអីជ័រវាយទាំងកម្រោល បន្ទាប់មក…
រាជធានីភ្នំពេញ ៖ យុវសិស្សវិទ្យាល័យទួលអំពិលម្នាក់ បានរងរបួសបែកក្បាលយ៉ាងដំណំ និងម្នាក់ទៀតរងរបួសដៃ ខណៈដែលពួកគេទាំង២នាក់កំពុងអង្គុយហូបប្រហិតនៅក្នុងទីធ្លាសាលា ដោយមិនដឹងខ្លួន ស្រាប់តែមានសិស្សរួមសាលា៤នាក់ទៀត ចូលទៅទាញកៅអីជ័រវាយទាំងកម្រោល បន្ទាប់មក បានគេច ខ្លួនបាត់ស្រមោលអស់ គឺវ៉ៃរហ័សដករហ័ស ប្រៀបដូចមកស្រាយគំនុំអ្វីមួយ ។
ហេតុការណ៍នោះ បានកើតឡើងកាលពីវេលាម៉ោង១០ព្រឹក ថ្ងៃទី៣១ មករា នៅក្នុងបរិវេណវិទ្យាល័យទួលអំពិល ស្ថិតនៅតាមបណ្តោយផ្លូវលេខ២១៧ ក្នុងភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ ។ ជនរងគ្រោះរួមទាំងជនបង្កមិនទាន់ត្រូវបានស្គាល់អត្តសញ្ញាណនៅឡើយទេ ចំណែកនគរបាលកំពុងធ្វើការស្រាវជ្រាវហើយ លើអំពើហិង្សាមួយនេះ ។
បុរសចំណាស់ដែលជាអ្នកលក់ប្រហិតបានឲ្យដឹងថា នៅមុនពេលកើតហេតុ យុវជនរងគ្រោះទាំង២នាក់រួមនិងសិស្សរួមថ្នាក់ប្រុសស្រីជាច្រើននាក់ទៀតបាននាំគ្នាទៅអង្គុយហូបប្រហិតនៅតូបលក់របស់គាត់ ។ លុះមួយសន្ទុះក្រោយមកក៏ស្រាប់តែលេចមុខជនដៃដល់ទាំង៤នាក់ ស្លៀកឯកសណ្ឋានជាសិស្សសាលា បានជិះម៉ូតូ២គ្រឿងទៅឈប់ជិតនោះ រួចបានដើរសម្ដៅទៅកាន់តូបលក់ប្រហិតរបស់គាត់ ។ ពេលនោះគាត់មិនបានដឹងថា អ្នកទាំង៤នោះមានបំណងទៅវាយសិស្សរងគ្រោះឡើយ ដោយនឹកស្មានថាពួកគេទៅរកហូបប្រហិតដែរ ។
ប្រភពដដែលបន្តទៀតថា លុះពេលទៅដល់បានទាញកៅអីវាយទៅលើក្បាលយុវជនទាំង២នាក់បណ្តាលឲ្យបែកក្បាលម្នាក់ និងម្នាក់ទៀតរងរបួសដៃ បន្ទាប់មកជនទាំងនោះបានវាយបំផ្លិចបំផ្លាញទូកញ្ចក់បែក បាក់ខ្ទេចខ្ទី បណ្ដាលឱ្យកំពប់ប្រហិត ព្រមទាំងទឹកម្ទេសអ្វីៗនៅលើតុធ្លាក់មកដីអស់ ។ ក្រោយពេលកើត ហេតុនគរបាលបានចេញអន្តរាគមន៍ភ្លាមៗដែរ ប៉ុន្តែពេលទៅដល់ក្រុមជនដៃដល់បានរត់គេចខ្លួនបាត់អស់ទៅហើយ គឺពួកគេវ៉ៃរហ័សដករហ័ស មិនអាចសមត្ថកិច្ចមកទាន់ទេ ហើយក៏គ្មានអ្នកស្គាល់ដែរ ។
ចំណែករូបគាត់បានដាក់ពាក្យប្ដឹងសុំឲ្យនគរបាលជួយតាមចាប់ជនបង្កហេតុ ដើម្បីទទួលខុសត្រូវលើការខូចខាតសម្ភាររបស់គាត់ ។ រំពឹងថា សមត្ថកិច្ចអាចនឹងរកមុខឃើញក្រុមស្ទាវទាំងនោះ តាមរយៈការសាកសួរយុវសិស្សរងគ្រោះ ឬតាមកាមេរ៉ាសុវត្ថិភាពដែលអាចថតបាននៅតាមផ្លូវ ៕
ចែករំលែកព័តមាននេះ