ខេត្តព្រះសីហនុ ៖ កំណាត់ផ្លូវបេតុងថ្មីមួយខ្សែបន្ថែមទៀតប្រវែងជាង៦០០ម៉ែត្រ បានចាប់ផ្តើមស្ថាបនាជាបណ្តើរៗហើយ បន្ទាប់ពីមានការឧបត្ថមថវិកាទាំងស្រុងពីលោកឧកញ្ញ៉ា អ៊ូ ឆាយ ដោយគ្រោងចំណាយទឹកប្រាក់ជាង១៥ម៉ឺនដុល្លាសហរដ្ឋអាមេរិក។
ថ្លែងក្នុងពិធីចុះពិនិត្យស្ថានភាពនៃការស្ថាបនាផ្លូវបេតុងថ្មី ប្រវែងជាង៦០០ម៉ែត្រ ដែលមានទីតាំងស្ថិតក្នុងភូមិ៣ សង្កាត់លេខ១ ក្រុងព្រះសីហនុនា នាព្រឹកថ្ងៃទី៣១ មករា ឆ្នាំ២០១៩ នេះ លោក សន កុសល អភិបាលរងក្រុងព្រះសីហនុ តំណាងអោយលោក អុី សុខឡេង អភិបាលក្រុងព្រះសីហនុ បានគូសបញ្ជាក់ថា ការចុះមករបស់អាជ្ញាធរមូលដ្ឋាន សហការជាមួយមន្ត្រីពាក់ព័ន្ឋនេះ គឺចង់ពិនិត្យអោយបានច្បាស់អំពីស្ថានភាព និងផលប៉ះពាល់ជាមួយប្រជាពលរដ្ឋ ។
ប្រសិនបើមានការប៉ះពាល់នៅលើដីសាធារណៈរបស់រដ្ឋជាមួយប្រជាពលរដ្ឋ លោក សូមអំពាវនាវដល់បងប្អូនប្រជាពលរដ្ឋមេត្តាយោគយល់ ព្រោះការស្ថាបនាផ្លូវនេះ គឺជាបំរើផលប្រយោជន៍រួម មិនមែនជាកម្មសិទ្ឋិរបស់បុគ្គលណាម្នាក់នោះទេ ប៉ុន្តែប្រសិនបើបងប្អូនប្រជាពលរដ្ឋនៅតែជំទាស់នោះ រដ្ឋបាលក្រុង ខេត្តនឹងចាត់វិធានការទៅតាមផ្លូវច្បាប់។
លោកបន្តថា កំណាត់ផ្លូវមួយនេះបានបំរើអោយប្រជាពលរដ្ឋរាប់រយគ្រួសារដែលមានទីលំនៅខាងក្នុង ហើយក៏អាចចាត់ទុកថា ជាសមិទ្ធផលថ្មីប្រចាំដើមឆ្នាំ២០១៩នេះ ដូចនេះសូមបងប្អូន ទាំងអស់យោគយល់ទាំងអស់គ្នា។
ដោយឡែក យោងតាមប្រភពតំណាងអោយលោកឧកញ៉ា អ៊ូ ឆាយ បានបញ្ជាក់ប្រាប់ថា កំណាត់ផ្លូវបេតុងនេះ មានប្រវែង៦១០ម៉ែត្រ ដែលបានតភ្ជាប់ពីផ្លូវជាតិលេខ៤ ចូលទៅកាន់រោងចក្រ RCI ដែលកន្លងមកកំណាត់ផ្លូវមួយនេះមានការលំបាកយ៉ាងខ្លាំងក្នុងធ្វើដំណើរ។
កំណាត់ផ្លូវនេះ មានកន្លែងខ្លះទទឹង១០ម៉ែត្រ កន្លែងខ្លះទទឹង៨ម៉ែត្រ និងកន្លែងទៀតទទឹង៤ម៉ែត្រ ទៅតាមស្ថានភាពផ្លូវបត់បែន ឯកម្ពស់មានប្រវែង១តឹក ដោយគ្រោងចំណាយថវិកាផ្ទាល់ខ្លួនរបស់លោកឧកញ៉ា អ៊ូ ឆាយ ចំនួនជាង១៥ម៉ឺនដុល្លាអាមេរិក។
ចែករំលែកព័តមាននេះ