អ្នកដឹកនាំល្អមិនត្រឹមតែមានបទពិសោធន៍ មានចំណេះជំនាញច្បាស់លាស់នោះទេ តែក៏ត្រូវមានគុណធម៌ក្នុងខ្លួនផងដែរ។ នៅក្នុងស្ថាប័នមួយបើមានអ្នកគ្រប់គ្រងប្រកបដោយលក្ខណសម្បត្តិបែបនេះ នឹងធ្វើឱ្យស្ថាប័នទទួលជោគជ័យជាក់ជាមិនខាន។
អ្នកដឹកនាំដែលល្បីល្បាញខាងគ្រប់គ្រងកិច្ចការអង្គភាពស្ថាប័នភាគច្រើនគឺដើរតាមគន្លងធម៌៤ប្រការនេះ ១-ផ្តល់ប្រាក់បៀវត្សឱ្យដល់បុគ្គលិកគ្រប់ផ្នែក រស់នៅក្នុងជីវភាពសមរម្យ, ២-បង្ក្រាបមិនឱ្យមានការប្រព្រឹត្តបក្ខពួកនិយម ប្រព្រឹត្តអំពើអាក្រក់ ឬអំពើមិនប្រក្រតីណាមួយនៅក្នុងអង្គភាពជាដាច់ខាត, ៣-គោរពរាប់អានធម៌ បូជាកោតក្រែងធម៌ យកធម៌ជាគោល យកធម៌ជាទង់ជ័យ និងចាត់ការរក្សាការពារ គ្រប់គ្រងដោយត្រឹមត្រូវតាមធម៌ដល់បុគ្គលិកក្រោមឱវាទ ធ្វើការដោយស្ងប់ចិត្ត។
ចំណែកទី៤-មេដឹកនាំល្អគួរចេះប្រឹក្សាសាកសួរបញ្ហាដល់អ្នកប្រព្រឹត្តល្អ ធ្វើការបានល្អ ប្រព្រឹត្តត្រូវជានិច្ចតាមវិន័យការងារ ដើម្បីឱ្យដឹងថា ការណាអាក្រក់ ការណាល្អ គួរធ្វើ ឬមិនគួរធ្វើ មានប្រយោជន៍ ឬគ្មានប្រយោជន៍ ហើយអនុវត្តប្រព្រឹត្តតាមដោយត្រឹមត្រូវ ។
លក្ខណសម្បត្តិស្នូលទាំងបួនប្រការនេះចាត់ថា ជាការងារដ៏សំខាន់លើកតម្លៃកិត្តិនាមអ្នកគ្រប់គ្រងឱ្យកាន់តែមានកេរ្តិ៍ឈ្មោះពីរោះខ្ពស់ឡើង ។
ចែករំលែកព័តមាននេះ