ខេត្តកំពង់ស្ពឺ ៖ ពិតជាសំណាងណាស់ ដែលអ្នកបើកបររថយន្តឡិចស៊ីស គ្រាន់តែរងរបួសស្រាលក្នុងហេតុការណ៍គ្រោះថ្នាក់ចរាចរណ៍រថយន្តបែនដឹកដីរេចង្កូតបុកពេញទំហឹង ហើយស្របពេលកើតហេតុក៏មានរថយន្តបែនមួយគ្រឿងទៀតមកដល់ ខំបើកគេចក៏ក្រឡាប់ចាក់ខ្សាច់ចោលពេញដី ។ ក្រោយកើតហេតុ អ្នកបើកបររថយន្តបែនទាំងពីរគ្រឿងបានរត់គេចខ្លួនបាត់អស់…
ខេត្តកំពង់ស្ពឺ ៖ ពិតជាសំណាងណាស់ ដែលអ្នកបើកបររថយន្តឡិចស៊ីស គ្រាន់តែរងរបួសស្រាលក្នុងហេតុការណ៍គ្រោះថ្នាក់ចរាចរណ៍រថយន្តបែនដឹកដីរេចង្កូតបុកពេញទំហឹង ហើយស្របពេលកើតហេតុក៏មានរថយន្តបែនមួយគ្រឿងទៀតមកដល់ ខំបើកគេចក៏ក្រឡាប់ចាក់ខ្សាច់ចោលពេញដី ។ ក្រោយកើតហេតុ អ្នកបើកបររថយន្តបែនទាំងពីរគ្រឿងបានរត់គេចខ្លួនបាត់អស់ ចំណែអ្នកបើកបររថយន្តឡិចសុីស សមត្ថកិច្ចបញ្ជូនទៅសង្គ្រោះភ្លាមៗផងដែរ ។ គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៦និង៣០នាទីថ្ងៃទី២៧ មករា វេលាម៉ោង០៦ និង៣០នាទី លើផ្លូវជាតិលេខ៤ គីឡូម៉ែត្រលេខ៣៣ លេខ៣៤ ចំណុចភូមិធ្លក ឃុំត្រពាំងគង ស្រុកសំរោងទង ។
ប្រភពពីសមត្ថកិច្ចនគរបាលចរាចរណ៍ស្រុកសំរោងទងបានឱ្យដឹងថា ករណីនេះ បង្កឡើងដោយរថយន្ត១គ្រឿងម៉ាកហ៊ីណូ ប្រភេទបែន ពណ៌ត្រួយចេក ពាក់ផ្លាកលេខ ចង្កូតស្តាំ PP.2630 អ្នកបើកបរមិនស្គាល់ឈ្មោះ និងទីលំនៅព្រោះបានចុះដាក់សាប៊ូគូទគេចខ្លួនបាត់ បានបុកជាមួយរថយន្ត១គ្រឿង ម៉ាកឡិចស៊ីសRX330 ពណ៌ស ពាក់ផ្លាកលេខភ្នំពេញ AJ.1339 បើកដោយឈ្មោះ ជា សុភ័ក្រ ភេទប្រុស អាយុ២៦ឆ្នាំ រស់នៅផ្ទះ១៣៥ ភូមិតាព្រហ្ម សង្កាត់ព្រែកឯង ខណ្ឌមានជ័យ ។ ចំណែករថយន្ត១គ្រឿងទៀតម៉ាកហ៊ីយ៉ាន់ដាយ (ប្រភេទបែន) ពណ៌ស ពាក់ផ្លាកលេខភ្នំពេញ 3D.1489 អ្នកបើកមិនស្គាល់ឈ្មោះ និងទីលំនៅដោយសារតែដាក់សាប៊ូគូទដូចគ្នា ។
ប្រភពបន្តថា តាមការសាកសួរសាក្សីដែលជាអ្នកឃើញហេតុការណ៍ដំបូងបានឱ្យដឹងថា មុនពេលកើតហេតុ រថយន្តហ៊ីណូបើកបរក្នុងទិសដៅពីលិចទៅកើត លុះមកដល់ចំណុចកើតហេតុបានបុកជាមួយរថយន្ត១គ្រឿងម៉ាកឡិចស៊ីស RX330 ដែលបើកបរបញ្ច្រាសទិសគ្នា បណ្តាលឱ្យដាច់កង់ទាំងផ្ទាំងខ្ទាតផុតពីតួរថយន្តដូចបុកខ្លាំងណាស់ ។
ស្របពេលនោះក៏មានរថយន្ត១គ្រឿងទៀត ម៉ាកហ៊ីយ៉ាន់ដាយ បើកបរពីលិចទៅកើតស្របគ្នាជាមួយរថយន្តឡិចស៊ីស លុះមកដល់ចំណុចកើតហេតុបានគេច ស្រាប់តែក្រឡាប់ដោយខ្លួនឯងតែម្ដង ដោយបាត់បង់ម្ចាស់ការ ។
ប្រភពដដែលបន្តថា ក្រោយពេលកើតហេតុខាងលើ បណ្តាលឲ្យអ្នកបើករថយន្តឡិចស៊ីសរងរបួសស្រាល ត្រូវបានបញ្ជូនទៅព្យាបាលនៅពេទ្យសម្ភពថ្នល់ទទឹង ។ ចំណែករថយន្តខូចខាតផ្នែកមុខស្ទើរទាំងស្រុង ។ រីឯរថយន្តប្រភេទបែនទាំង២គ្រឿង ខូចខាតធ្ងន់ធ្ងរ ដែលមួយគ្រឿងដាច់កង់មុខខ្ទាតចេញពីតួ ។ ដោយឡែក ម្ចាស់រថយន្តទាំង២រឿងនេះបានរត់គេចខ្លួនបាត់ស្រមោល ។
បន្ទាប់ពីធ្វើការវាស់វែង និងបំពេញកំណត់ហេតុរួចរថយន្តទាំង៣គ្រឿងខាងលើសមត្ថកិច្ចបានយកមករក្សាទុកនៅអធិការដ្ឋាននគរបាលស្រុកសំរោងទងបណ្ដោះអាសន្ន ដើម្បីកសាងសំណុំរឿងបញ្ជូនទៅជំនាញការិយាល័យចរាចរណ៍ខេត្ដចាត់ការតាមនីតិវិធីច្បាប់ ៕
ចែករំលែកព័តមាននេះ