ខេត្តបាត់ដំបង ៖ កាលពីព្រឹកថ្ងៃទី២៩ ខែកក្កដា ឆ្នាំ២០១៣ លោក សែម សុខា រដ្ឋលេខាធិការក្រសួងសង្គមកិច្ចអតីតយុទ្ធជន និងយុវនីតិសម្បទា និងជាក្រុមប្រឹក្សាភិបាលអង្គការអ៊ិស្លាមអភិវឌ្ឍន៍ជនបទ និងជាសមាជិកក្រុមប្រឹក្សាភិបាលអង្គការមូលនិធិអភិវឌ្ឍន៍មុស្លិមកម្ពុជា និងលោកជំទាវ បាននាំយកនូវអំណោយមនុស្សធម៌សម្រាប់ស្រាយបួសក្នុងខែរ៉ម៉ាឌនទៅចែកជូនដល់បងប្អូនខ្មែរអ៊ិស្លាមចំនួន៣៥០គ្រួសារនៅខេត្តបាត់ដំបង និងរាជធានីភ្នំពេញ ។
ពិធីនេះបានរៀបចំឡើងនៅទីស្នាក់ការអង្គការអ៊ិស្លាមអភិវឌ្ឍន៍ជនបទដែលស្ថិតនៅភូមិដាំស្ពៃ សង្កាត់ស្លាកែត ក្រុងបាត់ដំបង ខេត្តបាត់ដំបង និងថ្ងៃទី៣១ ខែកក្កដា ឆ្នាំ២០១៣ នៅសង្កាត់ច្រាំងចំរេះទី១ ខណ្ឌឫស្សីកែវ រាជធានីភ្នំពេញ ។ នៅក្នុងឱកាសនោះដែរមានការចូលរួមពីលោក សេត មូហាំម៉ាត់ស៊ីស អគ្គលេខាធិការរងនៃអគ្គលេខាធិការដ្ឋានក្រុមប្រឹក្សាសកម្មភាពជនពិការ និងជាសមាជិកគណៈអចិន្ត្រៃយ៍នៃគណៈកម្មាធិការកណ្តាលអង្គការមូលនិធិអភិវឌ្ឍន៍មុស្លិមកម្ពុជា លោកស្រី សែម កល្យាណ នាយិកាអង្គការអ៊ិស្លាមអភិវឌ្ឍន៍ជនបទ លោក ឯល សាឡែស ចៅសង្កាត់ស្លាកែត ក្រុងបាត់ដំបង ខេត្តបាត់ដំបង ព្រមទាំងអស់លោក លោកស្រី ថ្នាក់ដឹកនាំបុគ្គលិករបស់អង្គការយ៉ាងច្រើនកុះករ ។
លោក សែម សុខា ក៏បានថ្លែងអំណរគុណដល់ម្ចាស់ជំនួយដែលបានចំណាយទាំងពេលវេលានិងថវិកាសម្រាប់ផ្តល់ជូនដល់បងប្អូនរបស់យើងនាពេលនេះដែលជាការបង្ហាញអំពីចំណងមិត្តភាពរវាងព្រះរាជាណាចក្រកម្ពុជា និងប្រទេសអាល្លឺម៉ង់ និងពីការចូលរួមចំណែកកាត់បន្ថយនូវភាពក្រីក្ររបស់ប្រជាពលរដ្ឋជាមួយនឹងរាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ។
លោក សែម សុខា បានបន្តទៀតថា ជារៀងរាល់ឆ្នាំ មានអង្គការមនុស្សធម៌មុស្លិមជាច្រើន ដែលបានមកផ្តល់អំណោយជូនដល់បងប្អូនមុស្លិមនៅកម្ពុជា សម្រាប់ក្នុងពិធីបុណ្យរ៉ម៉ាឌន ,បុណ្យហាជ្ជ ការកសាងសាលារៀនវិហារអ៊ិស្លាម អណ្តូងទឹកស្អាត និងគម្រោងមនុស្សធម៌ផ្សេងៗ ។ ជាក់ស្តែងក្នុងឆ្នាំ២០១៣នេះក្រោមកិច្ចសហការល្អជាមួយអង្គការសប្បុរសធម៌វេហ្វា(WEFA)នៃប្រទេសអាល្លឺម៉ង់ អង្គការអ៊ិស្លាមអភិវឌ្ឍន៍ជនបទ ILDOបានអនុវត្តគម្រោងចែកអំណោយមនុស្សធម៌សម្រាប់ស្រាយបួសក្នុងខែរ៉ម៉ាឌនជូនដល់បងប្អូនមុស្លិមនៅក្នុងខេត្តបាត់ដំបង និងរាជធានីភ្នំពេញចំនួន៣៥០គ្រួសារដែលសរុបជាថវិកាចំនួន២១លានរៀល សម្រាប់យកទៅទទួលទានក្នុងពិធីស្រាយបួសក្នុងមួយខែអំណត់បួសរ៉ម៉ាឌន ដែលជាខែទី៩នៃប្រតិទិនអ៊ិស្លាមដែលបានប្រារព្ធឡើងជារៀងរាល់ឆ្នាំ ហើយសម្រាប់ឆ្នាំ២០១៣នេះ គឺបានចាប់ផ្តើមតាំងពីថ្ងៃពុធ ទី១០ ខែកក្កដា មកម្ល៉េះ ។
លោក សែម សុខា បានមានប្រសាសន៍បន្តថា ជារៀងរាល់ឆ្នាំក្នុងមួយខែរ៉ម៉ាឌន ប្រជាពលរដ្ឋមុស្លិមទូទាំងពិភពលោកត្រូវមានកាតព្វកិច្ចបំពេញសីលអំណត់បួសដែលជាកាតព្វកិច្ចចម្បងទី៣ក្នុងចំណោមកាតព្វកិច្ចទាំង៥ដូចជាអត់ទទួលទានអាហារភេសជ្ជៈ រួមសង្វាស និងចៀសឆ្ងាយពីប្រការអបាយមុខផ្សេងៗទៀតក្នុងបំណងរៀបចំខ្លួនឲ្យក្លាយជាជនមុស្លិមដែលមានជំនឿពិតប្រាកដគោរពកោតខ្លាចព្រះអល់ឡោះ និងបណ្តុះទឹកចិត្តអាណិតស្រឡាញ់គ្នាទៅវិញទៅមក ពិសេសជួយដល់ជនក្រីក្រ ។
លោករដ្ឋលេខាធិការបានមានប្រសាសន៍ក្រើនរំលឹកដល់បងប្អូនខ្មែរអ៊ិស្លាមអំពីការយក ចិត្តទុកដាក់ខ្ពស់ និងអាណិតស្រឡាញ់របស់រាជរដ្ឋាភិបាលកម្ពុជាដែលដឹកនាំដោយថ្នាក់ដឹកនាំរបស់គណបក្សប្រជាជនកម្ពុជាជាពិសេស សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីមកលើប្រជាជនខ្មែរអ៊ិស្លាមនៅទូទាំងប្រទេសដូចជា សព្វថ្ងៃសហគមន៍អ៊ិស្លាមមានការរីកចម្រើនជាទីមោទនភាពដូចជាវិស័យសេដ្ឋកិច្ច សង្គមកិច្ច អប់រំ សុខភាពរួមទាំងសេរីភាពពេញលេញក្នុងជំនឿសាសនាអ៊ិស្លាមដូចជា ការស្លៀកសម្លៀកបំពាក់ប្រពៃណីអ៊ិស្លាមចូលរៀនសាលារដ្ឋបាន ការផ្សព្វផ្សាយវិន័យធម៌តាមវិទ្យុមានកន្លែងថ្វាយបង្គំនៅព្រលានយន្តហោះអន្តរជាតិជាដើម ។
លោក សែម សុខា មានប្រសាសន៍បន្តថា ដោយឃើញសកម្មភាពប្រតិបត្តិការល្អរបស់អង្គការ ទើបនៅឆ្នាំ២០១៣នេះ អង្គការអ៊ិស្លាមអភិវឌ្ឍន៍ជនបទក៏បានទទួលជំនួយមនុស្សធម៌ចំនួន ៥៩លានរៀលពីអង្គការសប្បុរសធម៌ អាយអេកអេក (IHH)ប្រទេសទួរគីសម្រាប់ចែកជូនដល់បងប្អូនខ្មែរអ៊ិស្លាម និងស្រាយបួសនៅក្នុងខែអំណត់បួសរ៉ម៉ាឌននេះ ។ជាចុងបញ្ចប់លោករដ្ឋលេខាធិការបានផ្តល់កិត្តិយសចែកអំណោយដល់បងប្អូនខ្មែរអ៊ិស្លាមចំនួន៣៥០គ្រួសារ ដែលមួយគ្រួសារទទួលបានអង្ករ១០គីឡូក្រាម ស្ករស១គីឡូក្រាម តំណាប់ល្មើ១គីឡូក្រាម ទឹកដោះគោ២កំប៉ុង និងថវិកា១ម៉ឺនរៀល ៕
ចែករំលែកព័តមាននេះ