ខេត្តព្រះសីហនុ ៖ កំពង់ផែទឹកជ្រៅក្រុងព្រះសីហនុ នឹងសហការជាមួយកំពង់ផែឈីង តាវ របស់ប្រទេសចិន ដើម្បីដឹកទំនិញដោយផ្ទាល់ពីកម្ពុជាទៅកាន់ទីនោះ ដោយមិនចាំបាច់ឆ្លងកាត់ប្រទេសទី២ ។
ក្នុងជំនួបជាមួយ លោក យន្ត មីន អភិបាលខេត្តព្រះសីហនុ កាលពីថ្ងៃទី២២ មករា កន្លងមក លោកលួយ ជៀនជុន អភិបាលរងក្រុងឈីងតាវ បានមានប្រសាសន៍ថា តាមរយៈការតភ្ជាប់ការដឹកជញ្ជូនរវាងកំពង់ផែទាំងពីរ នឹងជួយជំរុញសកម្មភាពសេដ្ឋកិច្ច ពាណិជ្ជកម្មរវាងប្រទេសទាំងពីរកាន់តែប្រសើរឡើងថែមទៀត ។ លោកបន្តថា កំពង់ផែឈីងតាវ និងកំពង់ផែក្រុងព្រះសីហនុ នឹងសហការគ្នាក្នុងការដឹកជញ្ជូនកាន់តែប្រសើរឡើង ។ ក្នុងឆ្នាំ២០១៨ ទីក្រុងឈីងតាវ ទទួលបានភ្ញៀវទេសចរ១០០លាននាក់ ហើយសង្ឃឹមថាទីក្រុងឈីងតាវ និងទីក្រុងព្រះសីហនុ នឹងបន្តកិច្ចសហការលើវិស័យទេសចរណ៍កាន់តែល្អថែមទៀត ។
លោក យន្ត មីន អភិបាល អភិបាលខេត្តព្រះសីហនុ បានមានប្រសាសន៍ថា ខេត្តព្រះសីហនុមានសក្ដានុពលសេដ្ឋកិច្ច ដោយមានកំពង់ផែអន្តរជាតិដែលមានវិសាលភាពធំទូលាយសម្រាប់តភ្ជាប់ការដឹកជញ្ជូនតាមផ្លូវសមុទ្រជាលក្ខណៈជាតិ អន្តរជាតិបម្រើទំនិញជាកុងតឺន័រចេញ-ចូលប្រមាណជិត៧៣%នៃបរិមាណទំនិញនាំចេញ-នាំចូលទូទាំងប្រទេស ។ ក្នុងនាមអាជ្ញាធរដែនដី លោកអភិបាលខេត្តបានគាំទ្រអ្នកវិនិយោគចិន ដែលអនុវត្តតាមគោលនយោបាយ ខ្សែក្រវាត់មួយ ផ្លូវមួយ របស់ប្រធានាធិបតីចិន ធ្វើឱ្យខេត្តព្រះសីហនុមានការអភិវឌ្ឍលឿនយ៉ាងគំហុក ព្រមទាំងសំណូមពរដល់គណៈប្រតិភូ ជួយផ្សព្វផ្សាយពីសក្តានុពលរបស់ខេត្ត និងជួយជំរុញអ្នកវិនិយោគចិនមកកាន់ខេត្តព្រះសីហនុបន្ថែមទៀត ។
ខេត្តព្រះសីហនុចេះតែបន្តអភិវឌ្ឍន៍ទៅមុខកាន់តែលឿន ដោយសាររាជរដ្ឋាភិបាលបានរៀបចំខេត្តនេះឲ្យក្លាយជាតំបន់ពាណិជ្ជកម្មពហុវិស័យ ព្រោះខេត្តមានឆ្នេរស្អាត មានកំពង់ផែទឹកជ្រៅតែមួយគត់នៅកម្ពុជា និងមានជើងហោះហើរត្រង់កាន់តែច្រើនឆ្ពោះមកកាន់ខេត្តនេះ ។
តាមរយៈគោលនយោបាយអភិវឌ្ឍន៍វិស័យឧស្សាហកម្មរបស់រាជរដ្ឋាភិបាល បានដាក់ខេត្តព្រះសីហនុជាតំបន់សេដ្ឋកិច្ច និងឧស្សាហកម្ម ដែលធ្វើឲ្យខេត្តនេះមានសកម្មភាពអភិវឌ្ឍន៍យ៉ាងលឿន ដោយសារហេដ្ឋារចនាសម្ព័ន្ឋអំណោយផលនានា ដូចជា តំបន់សេដ្ឋកិច្ចពិសេស ដែលងាយស្រួលក្នុងការដឹកជញ្ជូន ដោយសារវាជាប់កំពង់ផែទឹកជ្រៅតែមួយគត់របស់កម្ពុជា, ការពង្រីកព្រលានយន្ដហោះកងកេងឲ្យក្លាយជាព្រលានយន្ដហោះលំដាប់អន្តរជាតិ, ការតភ្ជាប់ផ្លូវគោក និងផ្លូវល្បឿនលឿនជាដើម ដែលសុទ្ធសឹងតែជាសក្តានុពលរបស់ខេត្ត ។
ទីប្រឹក្សារាជរដ្ឋាភិបាលកម្ពុជា លោកបណ្ឌិត សុក ស៊ីផាន់ណា បានថ្លែងកន្លងមកថា ៖« រយៈពេល៥ឆ្នាំខាងមុខ ខេត្តព្រះសីហនុនឹងជំនួសខេត្តសៀមរាប ដោយសារខេត្តសៀមរាបពឹងផ្អែកខ្លាំងតែលើវិស័យទេសចរណ៍តែមួយប៉ុណ្ណោះ »។
គោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានដាក់ចេញនូវយុទ្ធសាស្ត្រដូចជា តាមរយៈគោលនយោបាយឆ្នាំ២០១៧-២០២៥ ខេត្តព្រះសីហនុ នឹងក្លាយទៅជាតំបន់សេដ្ឋកិច្ចពិសេសពហុបំណង គ្រប់គ្រងដោយរដ្ឋបាលពិសេស, សាងសង់ផ្លូវល្បឿនលឿនភ្នំពេញ-ព្រះសីហនុ និងបង្កើតក្រុងបន្ថែមទៀត ជាដើម។ ជាមួយគ្នានេះ ខេត្តព្រះសីហនុ នឹងក្លាយទៅ ជាក្បាលនាគសេដ្ឋកិច្ចនៃព្រះរាជាណាចក្រកម្ពុជា ។
ចំណែកប្រទេសចិនបានកំណត់យកខេត្តជាប់សមុទ្រទាំង៤របស់កម្ពុជា ផ្លូវសូត្រ គឺខេត្តកោះកុង ខេត្តព្រះសីហនុ ខេត្តកំពត និងខេត្តកែប ជាផ្លូវស្របតាមមាត់សមុទ្រដែលនឹងចាប់ផ្តើមស្ថាបនានៅពេលអនាគត ៕
ចែករំលែកព័តមាននេះ