ខេត្តប៉ៃលិន ៖ អ្នកជំនាញដាំទុរេនមួយរូប បន្ទាប់ពីទទួលបានការបណ្ដុះបណ្ដាល និងសិក្សាឈ្វេងយល់អំពីដំណាំនេះនៅក្នុងប្រទេសថៃរួចមក ក៏ចាប់ផ្តើមទិញកូនទុនរេនយកមកអនុវត្តដាំដុះទៅតាមបច្ចេកទេសនៅក្នុងចម្ការរបស់ខ្លួន ស្ថិតនៅភូមិកូនភ្នំ សង្កាត់អូរតាវ៉ៅ ក្រុងប៉ៃលិន។ ជាលទ្ធផល ទុរេនរបស់លោកលូតលាស់បានល្អក្នុងរយៈពេលខ្លី ស្ទើរមិនគួរឲ្យជឿ ។
លោក ទូច ប៉ង់ អ្នកជំនាញដំណាំទុរេនរូបនេះបានប្រាប់កោះសន្ដិភាពថា លោកបានដាំកូនទុរេនជាង៣០០ដើមដោយប្រើបច្ចេកទេស បន្ទាប់ពីទទួលបានការបណ្ដុះបណ្ដាលជំនាញពីជនជាតិថៃ ដោយមានណែនាំពីរបៀបដាំ និងថែទាំទុរេន ។
លោកនិយាយថា ៖« ការដាំដំណាំនេះ បើយើងអនុវត្តទៅតាមបច្ចេកទេស ធ្វើឲ្យទុរេនឆាប់លូតលាស់ល្អ និងឆាប់ទទួលផល »។ លោកថា ៖« ការដាំទុរេន គឺយើងទុកចន្លោះពីដើមមួយទៅដើមមួយ ប្រវែង៦ម៉ែត្រ ហើយចន្លោះពីរងមួយទៅរងមួយទៀត ប្រវែង៨ម៉ែត្រ ដើម្បីងាយស្រួលក្នុងការថែទាំ ដាក់ជី ឬដឹកសម្ភារផ្សេងៗ ចូលក្នុងចម្ការ ព្រមទាំងជួយសម្រួលក្នុងការកាត់ស្មៅ ពេលទុរេនលូតលាស់ធំផងដែរ »។
លោកបានបន្ថែម ៖« បន្ទាប់ពីដាំតាមក្បួនខ្នាតហើយ រយៈពេលត្រឹមតែ៥ខែប៉ុណ្ណោះ ដើមទុរេននឹងធំលឿនដែលមានកម្ពស់ជាង១ម៉ែត្របាត់ទៅហើយ ។ ដូច្នេះមិនយូរទេ ត្រឹមតែ៣ទៅ៥ឆ្នាំប៉ុណ្ណោះ អាចនឹងប្រមូលផលជាមិនខាន »។ យ៉ាងនេះក្ដី លោកថា ការថែទាំជារឿងចាំបាច់ដោយត្រូវស្រោចទឹក ដាក់ជី និងតាមដានជាប្រចាំ ជៀសវាងដើមទុរេនមានជំងឺមកយាយី ។
ស្រដៀងគ្នានេះដែរ កសិករម្នាក់ទៀត ដែលបានអញ្ជើញជនជាតិថៃមកពិនិត្យ និងណែនាំដល់ចម្ការរបស់ខ្លួន ខណៈដែលទុរេនរបស់លោកកំពុងចេញផ្កា និងក្ដឹបផងនោះ បានរៀបរាប់ថា ទុរេនខែប្រាំត្រូវការទឹក និងដាក់ជីបំប៉ន បើពុំទេវានឹងចេញស្លឹកក្រហម ឬឈានទៅងាប់ដើម ។
លោក ពេជ្រ ស្រស់ ម្ចាស់ចម្ការរូបនេះបន្ដថា ៖« នៅរដូវប្រាំង ជាពិសេសក្នុងអំឡុងពេលនេះ ម្ចាស់ទុរេនត្រូវស្រោចទឹក និងដាក់ជីជំនួយបន្ថែម ព្រោះវាជារដូវរាំងភ្លៀង បើពុំនោះទេអាចនឹងហួសពេល បណ្ដាលឲ្យដើមទុរេនងាប់»។ យោងតាមឯកសារកម្មវិធីអភិវឌ្ឍន៍វិស័យកសិកម្មនៃអគ្គនាយកដ្ឋានផ្សព្វផ្សាយកសិកម្មបានបង្ហាញថា ដើម្បីថែរក្សា និងធ្វើឲ្យទុរេនកាន់តែបានផលច្រើន ម្ចាស់ចម្ការចាំបាច់ត្រូវអនុវត្តការងារមួយចំនួនដូចជា ៖
១- បើសិនជាភ្លៀកធ្លាក់ច្រើន ត្រូវធ្វើប្រឡាយបង្ហូរទឹកចេញពីគល់ទុរេន ។ ២- បើសិនជាគ្មានភ្លៀង ត្រូវធ្វើការស្រោចទឹក ។ ៣- ត្រូវកម្ចាត់រុក្ខជាតិចង្រៃដោយកាប់ជម្រះឲ្យបានស្អាតនៅជុំវិញគល់ ។ ៤- ត្រូវការពារកុំឲ្យមានជំងឺរលួយឫស រលួយគល់ ងាប់ស្លឹក ដែលបណ្ដាលមកពីពពួកសត្វល្អិតចម្លងរោគដូចជាខ្មូតមាន់ អង្ក្រង និងខ្មូតភ្លើងជាដើម ។
៥- នៅពេលមិនសូវមានភ្លៀង ត្រូវដាក់ជីគីមីដើម្បីជំរុញឲ្យទុរេនឆាប់ចេញផ្កា ។ ៦- នៅរដូវភ្លៀងជោកជាំ ត្រូវបោសសម្អាតកម្ទេចស្មៅ និងស្លឹកទុរេនដែលជ្រុះចេញពីគល់ ដើម្បីឲ្យដីឆាប់ស្ងួត និងត្រូវផ្អាកការផ្ដល់ទឹកពី១០ទៅ១៤ថ្ងៃ ហើយនៅពេលឃើញស្លឹកទុរេនចាប់ផ្ដើមស្វិត ត្រូវផ្ដល់ទឹកបន្ដិចម្ដងៗដើម្បីឲ្យទុរេនចេញផ្កា និងកុំឲ្យខ្វះទឹកយូរពេករហូតដល់ស្លឹកវាចេញពណ៌លឿង ។ ប្រសិនបើម្ចាស់ចម្ការអនុវត្តតាមវិធីណែនាំខាងលើនេះបានល្អ នោះទុរេនរបស់លោកអ្នកនឹងទទួលផលច្រើនជាមិនខាន ៕
ចែករំលែកព័តមាននេះ