ខេត្តកោះកុង ៖ សេចក្តីរាយការណ៍បឋមឱ្យដឹងថា បុរសជាកម្មករសំណង់ម្នាក់បានស្លាប់ភ្លាមៗនៅនឹងកន្លែងកើតហេតុ ក្រោយខ្សែភ្លើងឆក់ កើតឡើងកាលពីវេលាម៉ោង០៤ និង៣០នាទីរសៀលថ្ងៃទី២២ មករា ស្ថិតក្នុងភូមិ១ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ។
ជនរងគ្រោះឈ្មោះ វិត ឆាន់ ភេទប្រុស អាយុ៣២ឆ្នាំ ជាកម្មករសំណង់ មានស្រុកកំណើតនៅភូមិស្រម៉ ឃុំត្រពាំងស្រែ ស្រុកមេសាង ខេត្តព្រៃវែង សព្វថ្ងៃរស់នៅភូមិ-សង្កាត់កើតហេតុខាងលើ ។
សេចក្តីរាយការណ៍បន្តថា មូលហេតុដែលបង្កឱ្យជនរងគ្រោះស្លាប់ភ្លាមៗ គឺដោយសារជនរងគ្រោះបានចូលរុះរើដែកសំណង់នៅជាន់ទី៣ ហើយក្នុងពេលដែលកំពុងរើដែកនោះក៏រអិលជើងធ្លាក់ទៅប៉ះខ្សែភ្លើងស្រាត បណ្តាលខ្សែភ្លើងឆក់ស្លាប់ភ្លាមៗតែម្តង ។
ក្រោយកើតហេតុ សមត្ថកិច្ចនិងក្រុមពេទ្យជំនាញ បានពិនិត្យនិងធ្វើកោសល្យវិច្ច័យឃើញថា ជនរងគ្រោះពិតជាបានស្លាប់ដោយសារឆក់ខ្សែភ្លើងប្រាកដមែន រីឯសពជនរងគ្រោះអោយទៅក្រុមគ្រួសារដើម្បីយកទៅធ្វើបុណ្យតាមប្រពៃណីនៅឯស្រុកកំណើត ។
ចែករំលែកព័តមាននេះ