ខេត្តប៉ៃលិន ៖ ដោយសារតែតម្លៃដីធ្លីនៅជួរព្រំដែន កម្ពុជា-ថៃ ក្នុងខេត្តប៉ៃលិនហក់ស្ទុះឡើងថ្លៃយ៉ាងគំហុកដែលធ្វើឱ្យឈ្មួញនានាសម្រុកមកពីភ្នំពេញដែលក្នុងនោះមានឈ្មួញមានលុយ និងឧកញ៉ាជាដើមចូលទៅទិញទាំងដីរាបស្មើ និងដីភ្នំយ៉ាងគគ្រឹកគគ្រេងរហូតធ្វើឱ្យព្រះចៅអធិការវត្តមួយចំនួនដែលសាងសង់វត្តអារាមនៅលើភ្នំ មានការព្រួយបារម្ភយ៉ាងខ្លាំង ក្រែងគេយកដីកម្មសិទ្ធិរបស់វត្តលក់ ។
ព្រះចៅអធិការវត្តប្រាសាទសួគ៌ ហៅវត្តសារវណ្ណ កាលពីវេលាម៉ោង១០និង៥១នាទី ថ្ងៃទី១០ ខែមករា ឆ្នាំ២០១៩ បានបង្ហោះក្នុងគណនីបណ្តាញសង្គមថា ៖«សូមអស់លោក ឯកឧត្តម លោកជំទាវ ប្រជាពលរដ្ឋដែលជាអ្នកកាន់ព្រះពុទ្ធសាសនា មេត្តាជួយការពារដីវត្តភ្នំសារវណ្ណផង ស្ថិតនៅភូមិផ្សារព្រំ ជាប់ព្រំដែនថៃ ត្រូវពួកឈ្មួញឃុបឃិតគ្នា លក់ចែកលុយគ្នាចាយ ដោយមិនខ្លាចច្បាប់ទាល់តែសោះ ហើយមិនខ្លាចកើតប្រេតនរកដែរ ។ សូមជួយស៊ែរបន្តផង ដើម្បីបានបុណ្យកុសលផង ! សូមអរគុណ ! » ។
បើតាមប្រភពព័ត៌មានពីព្រះតេជគុណ ប៊ុន ថា ព្រះចៅអធិការវត្តប្រាសាទសួគ៌ ហៅវត្តសារវណ្ណ (សារវ៉ាន់) បានឱ្យភ្នាក់ងារ កោះសន្តិភាព ដឹងថា ព្រះអង្គពិតជាមានការព្រួយបារម្ភយ៉ាងខ្លាំង ខណៈឃើញឈ្មួញយកគ្រឿងចក្រទៅឈូសឆាយដីព្រៃភ្នំនៅក្បែរៗវត្តអារាម ហើយថែមទាំងចូលហួសបង្គោលដីរបងវត្តថែមទៀត ខណៈដីភ្នំនៅពេលនេះមានហាងឆេងខ្ពស់ ។
ប្រភពបន្តទៀតថា ទើបក្រោយមកដោយខ្លាចក្រែងគេរំលោភយកដីកម្មសិទ្ធិរបស់វត្តលក់ព្រះអង្គក៏ប្រជុំជាមួយខាងគណៈកម្មការអាចារ្យវត្តរួចនាំគ្នាទិញបង្គោលស៊ីម៉ង់តិ៍យកទៅដាក់ដាំនៅជុំវិញផ្នែកខាងមុខវត្តដើម្បីការពារមិនឱ្យជនខិលខូចចូលមកឈូសឆាយបន្តយកដីវត្តយកទៅលក់ឱ្យឈ្មួញនោះឡើយ ។
ចំណែកពុទ្ធបរិស័ទចំណុះជើងវត្តជាច្រើននាក់ក៏មានការបារម្ភខ្លាំងចំពោះសុវត្ថិភាពដីវត្តខាងលើដែរ ព្រោះជាដីកម្មសិទ្ធិរបស់វត្តដែលប្រជាពលរដ្ឋរស់នៅក្នុងភូមិខាងលើតែងតែនាំគ្នាចូលទៅធ្វើបុណ្យទានរៀងរាល់ថ្ងៃសីល និងថ្ងៃបុណ្យទានផងដែរ ។
ម្យ៉ាងវិញទៀតវត្តខាងលើនៅក្បែរផ្ទះរបស់ប្រជាពលរដ្ឋងាយស្រួលក្នុងការចូលទៅធ្វើបុណ្យទាន បើសិនជាគេយកដីវត្តនេះហើយដោះដូរឱ្យទៅនៅកន្លែងផ្សេងពិតជាមានការលំបាកខ្លាំង ៕
ចែករំលែកព័តមាននេះ