រាជធានីភ្នំពេញ ៖ ផ្លូវក្រវាត់ក្រុងទី៣ ដែលមានប្រវែងជិត៥៣គីឡូម៉ែត្រ ឆ្លងកាត់រាជធានីភ្នំពេញ និងខេត្តកណ្តាល ត្រូវចំណាយថវិកាប្រមាណ២៧៣លានដុល្លារអាមេរិក បានចាប់ផ្ដើមបើកការរដ្ឋានសាងសង់ហើយកាលពីថ្ងៃទី១៤ ខែមករា ម្សិលមិញ…
រាជធានីភ្នំពេញ ៖ ផ្លូវក្រវាត់ក្រុងទី៣ ដែលមានប្រវែងជិត៥៣គីឡូម៉ែត្រ ឆ្លងកាត់រាជធានីភ្នំពេញ និងខេត្តកណ្តាល ត្រូវចំណាយថវិកាប្រមាណ២៧៣លានដុល្លារអាមេរិក បានចាប់ផ្ដើមបើកការរដ្ឋានសាងសង់ហើយកាលពីថ្ងៃទី១៤ ខែមករា ម្សិលមិញ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងលោក វ៉ាង វិនធៀន (Wang Wentian) ឯកអគ្គរដ្ឋទូតចិន ប្រចាំនៅ កម្ពុជា ។
ផ្លូវនេះឆ្លងកាត់ភូមិសាស្ត្រ រាធានីភ្នំពេញជាង១៥គីឡូម៉ែត្រ និងភូមិសាស្ត្រខេត្តកណ្តាលប្រវែងជិត៣៨គីឡូម៉ែត្រ ដែលមានចំណុចចាប់ផ្តើមពីគីឡូម៉ែត្រ១៤+១០៥ នៃផ្លូវជាតិលេខ៤ និងចំណុចចុងបញ្ចប់នៅគីឡូម៉ែត្រ២៤+៨៤០ នៃផ្លូវជាតិលេខ១ ។
ថ្លែងក្នុងពិធីបើកការដ្ឋានសាងសង់ផ្លូវក្រវាត់ក្រុងទី៣នេះ សម្ដេចតេជោ ហ៊ុន សែន នាយករដ្ឋមន្ត្រី បានលើកឡើងអំពីសារសំខាន់នៃការសាងសង់ផ្លូវក្រវាត់ក្រុងទី៣នៅពេលនេះ ដែលបានចូលរួមចំណែកយ៉ាងសំខាន់ក្នុងការបញ្ចៀសការកកស្ទះចរាចរណ៍នៅក្នុងទីក្រុងភ្នំពេញដែលកំពុងតែមានកំណើនមនុស្ស និងយានយន្តយ៉ាងច្រើន និងជួយសម្រួលដល់ការដឹកទំនិញនិងផលិតផលផ្សេងៗដើម្បីជួយដល់ជីវភាពរស់នៅរបស់ប្រជាពលរដ្ឋអោកាន់តែល្អប្រសើរឡើង ដែលផ្ទុយពីសម័យរបបប្រល័យពូជសាសន៍ប៉ុលពត ដែលផ្លូវមួយចំនួនធំត្រូវបានបំផ្លាញចោល ។
សម្តេចតេជោនាយករដ្ឋមន្ត្រី បានមានប្រសាសន៍បញ្ជាក់ថា ៖« ការកសាង និងអភិវឌ្ឍន៍ប្រទេសកម្ពុជា គឺបានចាប់ផ្តើមពីការអនុវត្តនូវយុទ្ធសាស្ត្រចតុកោណតាំងពី៣២ឆ្នាំមុន ដែលបានផ្តោតទៅលើផ្លូវ, ទឹក, ភ្លើង និង មនុស្ស ប៉ុន្តែចាប់ពីឆ្នាំ២០១៣មក យើងបានប្តូរមកយក មនុស្ស, ផ្លូវ, ទឹក, និងភ្លើងវិញ ដោយយើងបានប្តូរយកធនធានមនុស្សជាវិស័យអាទិភាពមុខគេ »។
ផ្លូវក្រវាត់ក្រុងទី៣ មានទំហំទទឹងផ្លូវរហូតដល់ទៅ២៧ម៉ែត្រសម្រាប់ទីប្រជុំជន និងសម្រាប់ក្រៅទីប្រជុំជនវិញមានទំហំទទឹងផ្លូវ២៥ម៉ែត្រ ដោយមានដាក់អំពូលបំភ្លឺផ្លូវសម្រាប់កំណាត់ផ្លូវក្នុងក្រុង និងដើមឈើលម្អសម្រាប់កំណាត់ផ្លូវក្រៅក្រុង។ វាជាផ្លូវដ៏សំខាន់ក្នុងការជួយកាត់បន្ថយការកកស្ទះ និងជួយសម្រួលចរាចរណ៍ក្នុងរាជធានីភ្នំពេញ។ ម្យ៉ាងទៀត គឺជាការតភ្ជាប់ផ្ទៃក្នុង និងសមាហរណកម្មតំបន់ ពិសេសតភ្ជាប់ផ្លូវអាស៊ានហាយវ៉េ និងផ្លូវរបៀងសេដ្ឋកិច្ចសំខាន់ៗរបស់មហាអនុតំបន់មេគង្គ រួមចំណែកក្នុងការសម្រួលការដឹកជញ្ជូនឆ្លងកាត់ព្រំដែន ជំរុញពាណិជ្ជកម្មអន្តរជាតិ និងប្រែក្លាយទឹកដីដែលនៅសងខាងផ្លូវខ្សែក្រវាត់ក្រុងនេះ ទៅជាតំបន់អភិវឌ្ឍថែមទៀតផង ។
នៅក្នុងឱកាសនោះផងដែរ សម្តេចតេជោនាយករដ្ឋមន្ត្រី ក៏បានបង្ហើបពីគម្រោងសាងសង់ហេដ្ឋារចនាសម្ព័ន្ធធំៗចំនួន៣បន្ថែមទៀតដែលបាននិងកំពុងគ្រោងសាងសង់នាពេលខាងមុខនេះ ។ សម្ដេចថ្លែងថា ៖« បច្ចុប្បន្ន រាជរដ្ឋាភិបាលបាននិងកំពុងសាងសង់ស្ពានភ្ជាប់រវាងស្រុកស្ទឹងត្រង់ ក្នុងខេត្តកំពង់ចាម តភ្ជាប់ទៅកាន់ស្រុកក្រូចឆ្មារនៃខេត្តត្បូងឃ្មុំ ដែលបាននិងកំពុងសាងសង់ ហើយជាមួយនេះ យើងកំពុងសិក្សា និងគ្រោងសាងសង់ស្ពាននៅទីរួមខេត្តក្រចេះ ដើម្បីតភ្ជាប់រវាងខេត្តក្រចេះទៅកាន់ខេត្តកំពង់ធំ តាមរយៈការតភ្ជាប់រវាងផ្លូវជាតិលេខ៧ និងផ្លូវជាតិលេខ៦ »។
សម្តេចតេជោបានបន្ថែមថា ជាមួយគ្នានេះ រាជរដ្ឋាភិបាលកំពុងស្វែងរកថវិកាដើម្បីសាងសង់ស្ពានភ្ជាប់រវាងខេត្តកោះកុង និងខេត្តពោធិ៍សាត់ផងដែរ តាមរយៈការសាងសង់ផ្លូវភ្ជាប់ពីខេត្តកោះកុង ឆ្លងកាត់ខេត្តពោធិ៍សាត់ មកកាន់ស្រុកសំឡូត ក្នុងខេត្តបាត់ដំបង នាពេលខាងមុខផងដែរ ដើម្បីសម្រួលការដឹកជញ្ជូន និងពាណិជ្ជកម្ម ព្រោះប្រជាជននាភូមិភាគពាយ័ព្យនាពេលបច្ចុប្បន្ននេះ ចង់ទៅកាន់ខេត្តកោះកុង ត្រូវមកកាន់រាជធានីភ្នំពេញ ហើយទើបចេញពីរាជធានីភ្នំពេញ ទៅខេត្តកោះកុង ហេតុនេះនៅពេលមានផ្លូវនេះ ប្រជាជនមិនចាំបាច់ចំណាយពេលវេលាធ្វើដំណើរវាងឆ្ងាយទៀតនោះទេ ។
សេដ្ឋវិទូ ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានថ្លែងថា ការវិនិយោគលើហេដ្ឋារចនាសម្ព័ន្ធរបស់រដ្ឋាភិបាលជារឿងត្រឹមត្រូវ និងចាំបាច់មួយ ដើម្បីជំរុញការអភិវឌ្ឍសេដ្ឋកិច្ចជាតិ ព្រោះហេដ្ឋារចនាសម្ព័ន្ធជាបញ្ហាប្រឈមមួយក្នុងចំណោមបញ្ហាប្រឈមជាច្រើនក្នុងការអភិវឌ្ឍជាតិ ប៉ុន្តែរដ្ឋាភិបាលបាននិងកំពុងយកចិត្តទុកដាក់លើបញ្ហានេះហើយ តែយ៉ាងណាក៏ដោយវាត្រូវការពេលវេលា ព្រោះផ្លូវឬស្ពានមិនអាចសាងសង់បញ្ចប់រយៈពេលខ្លីទេ ។ លោកថ្លែងថា ៖« ដើម្បីអភិវឌ្ឍន៍សេដ្ឋកិច្ច កម្ពុជាត្រូវការសាងសង់ហេដ្ឋារចនាសម្ព័ន្ធថ្មី កសាងកាន់តែច្រើន កាន់តែប្រសើរដើម្បីជំរុញល្បឿនកំណើនសេដ្ឋកិច្ចរបស់យើង »៕
ចែករំលែកព័តមាននេះ