ខេត្តកំពង់ឆ្នាំង ៖ សពក្មេងប្រុសអាយុ២ឆ្នាំម្នាក់ ត្រូវបានក្រុមគ្រួសារប្រទះឃើញក្នុងទឹកស្ទឹងនៅចម្ងាយប្រមាណ១គីឡូម៉ែត្រពីផ្ទះ ស្ថិតក្នុងភូមិក្តុល ឃុំក្តុលសែនជ័យ ស្រុកទឹកផុស កាលពីព្រឹកថ្ងៃទី៩ ខែមករា ។…
ខេត្តកំពង់ឆ្នាំង ៖ សពក្មេងប្រុសអាយុ២ឆ្នាំម្នាក់ ត្រូវបានក្រុមគ្រួសារប្រទះឃើញក្នុងទឹកស្ទឹងនៅចម្ងាយប្រមាណ១គីឡូម៉ែត្រពីផ្ទះ ស្ថិតក្នុងភូមិក្តុល ឃុំក្តុលសែនជ័យ ស្រុកទឹកផុស កាលពីព្រឹកថ្ងៃទី៩ ខែមករា ។ បន្ទាប់ពីមានការភ្ញាក់ផ្អើលពីការប្រទះឃើញសពនេះ សមត្ថកិច្ចបានទៅពិនិត្យនិងឃាត់ក្មេងប្រុសអាយុ១០ឆ្នាំម្នាក់និងស្ត្រីម្នាក់ យកមកសាកសួរ ។
លោក ខែម វិបុល អធិការនគរបាលស្រុកទឹកផុសបានឲ្យដឹងថា កុមារារងគ្រោះឈ្មោះ រិន សារ៉ុង ឪពុកឈ្មោះ ស៊ឹម សារឿន អាយុ២២ ឆ្នាំ ម្ដាយឈ្មោះ នឿន សុភិន អាយុ២១ឆ្នាំ គ្រួសារនេះមានទីលំនៅក្នុងភូមិ ឃុំខាងលើ ។ ក្នុងហេតុការណ៍ខាងលើនេះ សមត្ថកិច្ចបានឃាត់ខ្លួនកុមារាឈ្មោះ ប៊ុន សុភារិទ្ធ អាយុ១០ឆ្នាំ មានទីលំនៅក្នុងភូមិ ឃុំ ជាមួយគ្នា ។
ប្រភពដដែលបន្តថា មុនកើតហេតុ ម៉ោងប្រមាណជាង៨ព្រឹកថ្ងៃទី៩ ខែមករា មានគេឃើញកុមារាឈ្មោះ ប៊ុន សុធារិទ្ធ បានដឹកកុមារារងគ្រោះទៅខាងជើងផ្ទះរបស់ខ្លួន ហើយចាប់តាំងពីពេលនោះមកក៏បានបាត់ក្មេងប្រុសរងគ្រោះរហូតតែម្តង ។
ក្រោយពីការស្រាវជ្រាវយ៉ាងយកចិត្តទុកដាក់ និងមានមានសាក្សីដែលបានឃើញក្មេងប្រុសខាងលើដឹកកុមារារងគ្រោះទៅស្ទឹងដែលមានចម្ងាយប្រមាណ១គីឡូម៉ែត្រខាងជើងផ្ទះរបស់ខ្លួន ហើយអ្នកដែលបានឃើញហេតុការណ៍ ក៏បានប្រាប់ក្មេងទាំង២នាក់កុំឱ្យទៅលេងទឹកប្រយ័ត្នលង់ទៀតផង ។ ចាប់តាំងពីបាត់កូនប្រុស ឪពុកម្តាយបានខំដើររកតាំងពីព្រឹករហូតដល់ម៉ោង១និង៣០នាទីរសៀល ទើបប្រទះឃើញសពកូននៅក្នុងទឹកស្ទឹងខាងលើ ។
ក្រោយពីពិនិត្យនិងធ្វើកោសល្យវិច័យសពក្មេងប្រុសរួចមក សមត្ថកិច្ចទសន្និដ្ឋានថា ក្មេងរងគ្រោះមានស្នាមជាំៃផ្ទមុខ និងក ។ ទោះជាយ៉ាងនេះក្តី សមត្ថកិច្ចនៅមិនទាន់បង្ហាញមុខជនសង្ស័យជាកុមារាអាយុ១០ឆ្នាំនោះ ភ្លាមៗទេ។ ជាមួយគ្នានេះ ស្ត្រីម្នាក់ដែលត្រូវជាជីដូន របស់ក្មេងសង្ស័យនោះ ក៏សមត្ថកិច្ចនៅមិនទាន់
ធ្វើការសន្និដ្ឋានបែបណានៅឡើយដែរ ដោយកំពុងស្រាវជ្រាវនៅឡើយ ហើយការឃាត់ខ្លួនស្ត្រីម្នាក់ទៀតនេះ ក៏ដោយសារតែចម្លើយក្មេងប្រុសខាងលើប្រាប់ថា ជីដូនរបស់ខ្លួនបានឲ្យដឹកយកទៅឲ្យ ។
សំណុំរឿងឃាតកម្មទៅលើក្មេងប្រុសអាយុ ២ឆ្នាំ ត្រូវបានរកឃើញហើយ ដោយវាយទម្លាក់ចូលទឹកស្ទឹង កាលពីព្រឹកថ្ងៃទី៩ មករា កន្លងទៅនេះ ឃាតករចាប់បានហើយគឺជាក្មេងប្រុសអាយុ ១០ឆ្នាំដែលបានឃាត់ខ្លួនក្រោយពេលកើតហេតុប៉ុន្មានម៉ោងប៉ុណ្ណោះ ។ ហេតុការណ៍មនុស្សឃាត ដោយជនដៃដល់គឺជាកុមារអាយុ១០ឆ្នាំនេះ បានកើតឡើងនៅភូមិក្តុល ឃុំក្តុលសែនជ័យ ស្រុកទឹកផុស ។
លោក ខែម វិបុល អធិការនគរបាលស្រុកទឹកផុស បានមានប្រសាសន៍ឲ្យដឹងថា៖ ក្រោយការស្រាវជ្រាវយ៉ាងយកចិត្តទុកដាក់ របស់សមត្ថកិច្ចនគរបាលស្រុក និងមន្ត្រីជំនាញនៃស្នងការដ្ឋាននគរបាលខេត្ត បានរកឃើញថា ជនដល់ដៃក្នុងអំពើឃាតកម្មនេះ គឺតែម្នាក់គត់ ហើយមិនពាក់ព័ន្ធដល់មនុស្ស ៣-៤នាក់ផ្សេងទៀត ដែលសមត្ថកិច្ចបានកោះហៅមកសាកសួរនោះទេ ហើយជនដៃដល់ ក្នុងអំពើឃាតកម្មខាងលើ គឺជាកុមារា ឈ្មោះ ប៊ុន សុធារិទ្ធ អាយុ១០ឆ្នាំ មានទីលំនៅ នៅភូមិត្រពាំងអំពិល ឃុំក្តុលសែន ជ័យស្រុកទឹកផុស ។
លោកអធិការបានបានបញ្ជាក់ថា៖ មូលហេតុដែលនាំអោយកុមារា ជាជនដៃដល់ខាងលើហ៊ានប្រព្រឹត្តអំពើឃាតកម្មនេះ គឺដោយសារតែមានគំនុំជាមួយនឹង ស្ត្រីឈ្មោះ នឿន សុភិន អាយុ២១ឆ្នាំ ជាម្ដាយរបស់កុមារារងគ្រោះ ឈ្មោះ រិន សារ៉ុង អាយុ ២ឆ្នាំ ដែលបានគម្រាមទះកំផ្លៀងខ្លួន កាលពីប៉ុន្មានខែមុន ។ លោកអធិការបានស្រង់ចម្លើយសារភាព របស់កុមារ ឈ្មោះ ប៊ុន សុធារិទ្ឋ ជាជនដៃដល់ថា នៅថ្ងៃកើតហេតុម៉ោងប្រមាណជាង៩ព្រឹកពេលខ្លួនជិះកង់ចេញពីសាលាមកតាមផ្លូវ បាន ប្រទះឃើញកុមាររងគ្រោះគ្មានសម្លៀកបំពាក់ ឈរលេងតែឯងនៅមុខផ្ទះ ពេលនោះខ្លួនចាប់កុមាររងគ្រោះ ដាក់លើកន្ត្រកកង់ ហើយដឹកទៅខាងជើងផ្ទះកុមាររងគ្រោះមានចម្ងាយប្រមាណ១គីឡូម៉ែត្រ ។
ដល់ទីនោះជាកន្លែងស្ងាត់ ខ្លួនបានវាយកុមាររងគ្រោះរួចចាប់ជ្រមុចចូលទឹកស្ទឹង បណ្តាលអោយឈ្លក់ទឹកស្លាប់តែម្តង ។ បន្ទាប់មកខ្លួន ក៏បានជិះកង់ត្រឡប់មកលំនៅឋានវិញ រហូតដល់ម៉ោងជាង២រសៀល ទើបត្រូវសមត្ថកិច្ចចាប់ខ្លួន យកមកសាកសួរ ហើយខ្លួនបានសារភាពតាមត្រង់ថា ការដែលហ៊ានសម្លាប់កុមារ អាយុ២ឆ្នាំខាងលើ ព្រោះម្តាយវាបានគម្រាមទះកំភ្លៀងខ្លួនកាលពីប៉ុន្មានខែមុន ។ យ៉ាងនេះក្តី ពេលនេះសមត្ថកិច្ចនគរបាលស្រុកទឹកផុស កំពុងរៀបចំកសាងសំណុំរឿងបញ្ជូន ជនដៃដល់ជាកុមារ មកកាន់ស្នងការដ្ឋាននគរបាលខេត្ត ដើម្បីចាត់ការតាមនីតិវិធី ៕
ចែករំលែកព័តមាននេះ