ខេត្តប៉ៃលិន ៖ កាលពីវេលាម៉ោង៤និង៣០នាទីរសៀលថ្ងៃទី៨ ខែមករា ឆ្នាំ២០១៩ ស្ថិតក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន មានករណីទំនាស់ពាក្យសម្តីគ្នាបានកើតឡើង ស្រាប់តែបុរសម្នាក់បានយកកាំបិតចិតបន្លែទៅភ្ជង់ក និងគំរាម ធ្វើឱ្យស្ត្រីរងគ្រោះមានការភិតភ័យយ៉ាងខ្លាំង ក៏ដាក់ពាក្យបណ្តឹងទៅប៉ុស្តិ៍នគរបាលរដ្ឋបាលឃុំស្ទឹងកាច់តែម្តង ។
ប្រភពព័ត៌មានបានឱ្យដឹងថា ជនសង្ស័យឈ្មោះ កែវ ម៉េងហួរ ភេទប្រុស អាយុ៣៥ឆ្នាំ បានយកកាំបិតចុងស្រួចទៅភ្ជង់ក និងគំរាមកំហែងទៅលើជនរងគ្រោះឈ្មោះ និន និត ភេទស្រី អាយុ៤៥ឆ្នាំ មុខរបរអាជីវករ អ្នកទាំងពីរមានទីលំនៅក្នុងភូមិឃុំកើតហេតុខាងលើ មូលហេតុគឺបណ្ដាលមកពីមានទំនាស់ពាក្យសម្ដីរវាងគ្នានឹងគ្នា ។
បច្ចុប្បន្ន ជនសង្ស័យត្រូវបានឃាត់ខ្លួននៅអធិការដ្ឋាននគរបាលស្រុកសាលាក្រៅ ដើម្បីចាត់ការទៅតាមនីតិវិធីច្បាប់ ៕
ចែករំលែកព័តមាននេះ