ខេត្តព្រះសីហនុ ៖ រដ្ឋមន្ត្រី៣ស្ថាប័ន ព្រមថ្នាក់ដឹកនាំខេត្ត កំពុងសហការគ្នាចូលរួមដោះស្រាយបញ្ហានានាដែលកំពុងកើតមាននៅខេត្តព្រះសីហនុ ដើម្បីធ្វើយ៉ាងណាឲ្យខេត្តដែលល្បីឆ្នេរខ្សាច់សស្អាតជាងគេលើពិភពលោកមួយនេះ ក្លាយជាទីក្រុងទំនើប ទាន់សម័យ និងសម្បូរសប្បាយនៅថ្ងៃអនាគត បន្ទាប់ពីខេត្តបានរងការស្ដីបន្ដោសពីមហាជន ពិសេសទៅលើបញ្ហាបរិស្ថាន ក្រោយពេលមានវិនិយោគិនបរទេសមកអភិវឌ្ឍន៍យ៉ាងគំហុកក្នុងរយៈខ្លីមក ។
ក្នុងពេលចុះពិនិត្យទីតាំងស្ថានីយបូមទឹកកខ្វក់នៅក្បែរសណ្ឋាគារសុខា កាលថ្ងៃទី៣ ខែមករា កន្លងមក អភិបាលខេត្តព្រះសីហនុ លោក យន្ត មីន បានប្ដេជ្ញាថា នឹងខិតខំឲ្យអស់ពីសមត្ថភាពក្នុងការកៀងគរអ្នកវិនិយោគ អ្នកមានសមត្ថភាពឲ្យចាប់អារម្មណ៍ទឹកដីខេត្តមួយនេះ និងជ្រើសរើសជាគោលដៅវិនិយោគដ៏សំខាន់ដើម្បីឲ្យក្លាយជាទីក្រុងដ៏ប្រណីត ស៊ីវិល័យ សម្បូរសប្បាយ និងសុខសាន្តបំផុតនៅថ្ងៃអនាគត ។
លោកអភិបាលខេត្តបន្ដថា ខេត្តព្រះសីហនុមានការអភិវឌ្ឍយ៉ាងខ្លាំងនាប៉ុន្មានឆ្នាំចុងក្រោយនេះ ពិសេសបន្ទាប់ពីវិនិយោគិនបរទេសចូលមកអភិវឌ្ឍន៍ធ្វើឲ្យខេត្តមានអគារខុនដូខ្ពស់ៗកើនឡើងជាបន្ដបន្ទាប់ដែលមិនធ្លាប់មានក្នុងប្រវត្តិសាស្ត្ររបស់ខេត្ត ប៉ុន្ដែការអភិវឌ្ឍយ៉ាងលឿនបែបនេះ បានធ្វើឲ្យខេត្តរងផលប៉ះពាល់ជាអន្លើ។ ទោះបីយ៉ាងណា រាជរដ្ឋាភិបាលតាមរយៈក្រសួងស្ថាប័នពាក់ព័ន្ធដែលជាសេនាធិការ បាននិងកំពុងសហការយ៉ាងសកម្មជាមួយអាជ្ញាធរខេត្តដើម្បីដោះស្រាយបញ្ហាទាំងនេះ ហើយតែពេលនេះ លោកមានក្ដីរំភើបជាខ្លាំង ដោយមានថ្នាក់ដឹកនាំក្រសួងដូចជា លោកឧបនាយករដ្ឋមន្ត្រី សុផារ៉ា រដ្ឋមន្ត្រីក្រសួងដែនដី នគរូបនីយកម្ម និងសំណង, លោក សាយ សំអាល់ រដ្ឋមន្ត្រីក្រសួងបរិស្ថាន និងលោក ថោង ខុន រដ្ឋមន្ត្រីក្រសួងទេសចរណ៍ បានយកចិត្តទុកដាក់ចូលរួមដោះស្រាយ ជាពិសេសបំផុតនោះគឺសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេចផ្តល់កាដូពិសេសសម្រាប់ខេត្តព្រះសីហនុ ក្នុងការស្តារទប់ស្កាត់បញ្ហាទឹកសំណល់រាវហូរចូលសមុទ្រ ។
លោក យន្ដ មីន បញ្ជាក់ថា ៖« តាំងពីខ្ញុំចូលកាន់តំណែងជាអភិបាលខេត្តព្រះសីហនុមក កង្វល់ធំជាគេគឺបញ្ហាទឹកសម្អុយហូរចូលសមុទ្រនេះ » ។ លោកបានបន្ថែមថា ជារឿយៗ រដ្ឋបាលខេត្តព្រះសីហនុ បានជំរុញឲ្យម្ចាស់ទីតាំងឧស្សាហកម្មទេសចរណ៍ អគាពាណិជ្ជកម្មធំៗ ម្ចាស់ផ្ទះសំណាក់ សណ្ឋាគារ ភោជនីយដ្ឋានទាំងឡាយឲ្យធ្វើអាងប្រព្រឹត្តិកម្ម ដើម្បីចម្រោះជាតិពុលសិន មុនបង្ហូរចូលទៅលូរ និងបង្ហូរទៅសមុទ្រ តែបញ្ហានេះម្ចាស់ទីតាំងអាជីវកម្មភាគច្រើននៅមិនទាន់បានសហការនៅឡើយ ។
ទោះបីយ៉ាងណា លោកអភិបានខេត្តរំពឹងថា បន្ទាប់ពីក្រុមការងារធ្វើស្ថានីយបូមទឹកស្អុយទាំងនេះហើយ បញ្ហាទឹកកខ្វក់ហូរចូលសមុទ្រនឹងត្រូវដោះស្រាយបាន ។ ដោយឡែកបញ្ហាប្រឈមមួយចំនួនទៀតដូចជា សំរាម ទឹក ភ្លើង ផ្លូវ រដ្ឋបាលខេត្តព្រះសីហនុ កំពុងខិតខំដោះស្រាយជាអាទិភាពដែរ ដើម្បីស្តារមុខមាត់ខេត្តក្រុងព្រះសីហនុ ឲ្យកាន់តែល្អប្រសើរ ស្របតាមអនុសាសន៍សម្តេចតេជោហ៊ុន សែន នាយករដ្ឋមន្ត្រី ។
គួរបញ្ជាក់ថា រាជរដ្ឋាភិបាលត្រៀមចំណាយថវិកាជាង៣លានដុល្លារសម្រាប់ការស្ថាបនា និងស្ដារប្រព័ន្ធលូទឹកកង្វក់នានានៅក្នុងខេត្តព្រះសីហនុ ដើម្បីទប់ស្កាត់ការបង្ហូរទឹកកង្វក់ដោយផ្ទាល់ចូលទៅក្នុងសមុទ្រ និងដើម្បីធានាការពារបរិស្ថានធ្វើឲ្យទឹកសមុទ្ររក្សាបាននៅភាពស្អាត និងជាការឆ្លើយតបនឹងកង្វល់របស់ប្រជាពលរដ្ឋផងដែរ ។
លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានអះអាងថា ក្រសួងមានថវិកាគ្រប់គ្រាន់ហើយសម្រាប់ការស្ថាបនាប្រព័ន្ធលូចម្រោះទឹកស្អុយមួយចំនួននៅក្នុងខេត្តព្រះសីហនុ ដើម្បីកាត់បន្ថយការបង្ហូរទឹកស្អុយ ឬជាតិពុលឲ្យផ្ទាល់ចូលទៅក្នុងសមុទ្រ ។ លោកបន្តថា ការស្ថាបនាប្រព័ន្ធចម្រោះទឹកកង្វក់នៅខេត្តព្រះសីហនុនេះ គឺដើម្បីដោះស្រាយជាបន្ទាន់ចំពោះបញ្ហាការបំពុលរិស្ថាននៅក្នុងខេត្តនេះ ។ ជាក់ស្តែង បច្ចុប្បន្ននៅខេត្តព្រះសីហនុ មានការបង្ហូរទឹកស្អុយចេញពីប្រព័ន្ធលូនានាដោយផ្ទាល់ចូលទៅក្នុងទឹកសមុទ្រ ដែលធ្វើឲ្យទឹកសមុទ្រមានក្លិនស្អុយប៉ះពាល់ដល់បរិស្ថាន និងប៉ះពាល់ដល់សុខភាពស្បែកប្រជាពលរដ្ឋ ដែលមកមុជទឹកសមុទ្រ ក៏ដូចជាប៉ះពាល់ដល់កិត្តិយស និងកិត្តិនាម ដែលជាឆ្នេរសមុទ្រស្អាតរបស់កម្ពុជា ។ លោកឧបនាយករដ្ឋមន្ត្រី បានបន្ថែមថា ក្រសួងនឹងជំរុញការសាងសង់ស្ថានីយបូមទឹក និងចម្រុះទឹកកង្វក់ចំនួន៤កន្លែង ឲ្យរួចរាល់មុនចូលឆ្នាំខ្មែរ ដើម្បីធានាឲ្យប្រជាពលរដ្ឋបានទៅលេងកម្សាន្ដខេត្តព្រះសីហនុឲ្យបានច្រើនឡើងវិញ ។
សូមជម្រាបថា បច្ចុប្បន្ននេះ ក្រុមការងារបាននឹងកំពុងសាងសង់ស្ថានីយបូមទឹកកខ្វក់ចំនួន៤ទីតាំង ដើម្បីបូមទឹកសំណល់រាវបញ្ចូលទៅអាងចម្រោះ មុននឹងបង្ហូរចូលទៅសមុទ្រ ដែលមានទីតាំង (១)នៅក្បែរអគារសណ្ឋាគារអេម៉ារីយ៉ូ ស្ថិតក្នុងសង្កាត់លេខ៣ ។ (២)ស្ថិតនៅជាប់បរិវេណសណ្ឋាគារសុខា ។ (៣) ស្ថិតនៅក្បែរអូរនៃអគា ឌី ស៊ី វ្យូ និង(៤)ស្ថិតនៅម្តុំទីតាំងផ្លូវចុះទៅផែអូប័រទៅកោះរ៉ុងដើមឆ្នេរអូរឈើទាល ៕
លោកឧបនាយករដ្ឋមន្ត្រី បានបន្ថែមថា ក្រសួងនឹងជំរុញការសាងសង់ស្ថានីយបូមទឹក និងចម្រុះទឹកកង្វក់ចំនួន៤កន្លែង ឲ្យរួចរាល់មុនចូលឆ្នាំខ្មែរ ដើម្បីធានាឲ្យប្រជាពលរដ្ឋបានទៅលេងកម្សាន្ដខេត្តព្រះសីហនុឲ្យបានច្រើនឡើងវិញ ។
សូមជម្រាបថា បច្ចុប្បន្ននេះ ក្រុមការងារបាននឹងកំពុងសាងសង់ស្ថានីយបូមទឹកកខ្វក់ចំនួន៤ទីតាំង ដើម្បីបូមទឹកសំណល់រាវបញ្ចូលទៅអាងចម្រោះ មុននឹងបង្ហូរចូលទៅសមុទ្រ ដែលមានទីតាំង (១)នៅក្បែរអគារសណ្ឋាគារអេម៉ារីយ៉ូ ស្ថិតក្នុងសង្កាត់លេខ៣ ។ (២)ស្ថិតនៅជាប់បរិវេណសណ្ឋាគារសុខា ។ (៣) ស្ថិតនៅក្បែរអូរនៃអគា ឌី ស៊ី វ្យូ និង(៤)ស្ថិតនៅម្តុំទីតាំងផ្លូវចុះទៅផែអូប័រទៅកោះរ៉ុងដើមឆ្នេរអូរឈើទាល ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ