ខេត្តកំពង់ឆ្នាំង ៖ កម្មករ-កម្មការនីរោងចក្រ «ជីនយី» ប្រមាណជា៤៥០០នាក់បានផ្ទុះការតវ៉ាទាមទារបើកប្រាក់ខែអោយបានទៀងទាត់ នៅថ្ងៃទី១០ ជារៀងរាល់ខែ ។ ហេតុការណ៍តវ៉ានេះបានកើតឡើងនៅវេលាម៉ោង៧ព្រឹក ថ្ងៃទី៩ ខែមករា ឆ្នាំ២០១៩ នៅចំណុចរោងចក្រ«ជិនយី» ដែលស្ថិតនៅក្នុងភូមិស្ពានពោធិ ឃុំសេដ្ឋី ស្រុកសាមគ្គីមានជ័យ ។
យ៉ាងនេះក្តីការតវ៉ារយៈពេលជាង២ម៉ោងផងកម្មករក៏បានរំសាយទៅលំនៅដ្ឋានវិញ បន្ទាប់ពីតំណាងរបស់ខ្លួនបានចូលជួបដោះស្រាយជាមួយភាគីម្ចាស់រោងចក្រមិនទទួលបានលទ្ឋផល ។
ប្រភពព័ត៌មានពីសមត្ថកិច្ចនៅកន្លែងកើតហេតុបានអោយដឹងថា នៅព្រឹកថ្ងៃទី៩ ខែមករា ឆ្នាំ២០១៩ កម្មករ-កម្មការនីទាំងអស់បានមករោងចក្រជាធម្មតា ប៉ុន្តែពួកគេមិនបានចូលធ្វើការទេគឺធ្វើកូដកម្មដើម្បីទាមទារការបើកប្រាក់ខែអោយបានទៀងទាត់គឺត្រឹមថ្ងៃទី១០ នៃខែនីមួយៗ ។
ការតវ៉ាវនេះព្រោះតែខាងរោងចក្របានជួនដំណឹងដល់កម្មករថា ប្រាក់ខែនឹងបើកដល់ថ្ងៃទី១២ ខែមករា ។ នៅក្នុងកូដកម្មខាងលើ ភាគីខាងរោងចក្រនៅតែបន្តស្នើដល់កម្មករសុំបើកប្រាក់ខែដល់ថ្ងៃទី១២ តែភាគីជាកម្មករនៅតែមិនព្រមគឺត្រូវតែបើកនៅថ្ងៃទី១០ ជាដាច់ខាត ។
ក្រោយមកភាគីខាងរោងចក្របានស្នើសុំអោយតំណាងកម្មករចូលជួបដើម្បីពិភាក្សារកដំណោះស្រាយ ប៉ុន្តែការចចាររយៈពេលជាង១ម៉ោងកន្លះ តំណាងកម្មករបានចេញមកវិញប្រាប់ថា មិនទាន់ទទួលបានលទ្ឋផលឡើយដោយខាងរោងចក្រនៅតែសុំពន្យាពេលបើកប្រាក់ខែនៅថ្ងៃទី១២ ខែមករា ។
ក្រោយពីកូដកម្មមិនទទួលលទ្ឋផលកម្មករទាំងនោះបានវិលត្រឡប់ទៅលំនៅដ្ឋាន និងកន្លែងស្នាក់នៅរៀងៗខ្លួនវិញដោយមិនចូលធ្វើការ និងមិនបង្កហិង្សាបណ្តាលអោយមានការខូចខាត ឬអសន្តិសុខអ្វីឡើយ ៕
ចែករំលែកព័តមាននេះ