រាជធានីភ្នំពេញ ៖ យុវជនម្នាក់បានត្រូវនាងក្រមុំជាគូដណ្តឹងប្រើហិង្សា បណ្តាលឲ្យរងរបួសដោយស្នាមក្រចក ដោយសារខឹងមិនឃើញទៅលេង ក្រោយពេលភ្ជាប់ពាក្យ ហើយក្នក់ចិត្តមន្ទិលសង្ស័យខ្លាចបុរសជាគូដណ្ដឹងបែកចិត្ត ក៏តាមស្វែងរកដល់ផ្ទះជួលនិងផ្ទុះហឹង្សា បង្កឲ្យភ្ញាក់ផ្អើលកាលពីវេលាម៉ោង៨យប់ថ្ងៃទី៥ ខែមករា នៅភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ ។
ភាគីខាងប្រុសឈ្មោះ ឆោម សុផល អាយុ២៤ឆ្នាំ ជាកម្មកររោងចក្រ ស្នាក់នៅបន្ទប់ជួលក្នុងភូមិខាងលើ ចំណែកភាគីខាងស្រីឈ្មោះ ឈាង ចន្ថា អាយុ២៣ឆ្នាំ ជាកសិករនៅភូមិចម្ការហ្លួង ឃុំវាំងចាស់ ស្រុកឧដុង្គ ខេត្តកំពង់ស្ពឺ ។ តាមសាច់ញាតិខាងប្រុសឲ្យដឹងថា អ្នកទាំង២នាក់បានភ្ជាប់ពាក្យនឹងគ្នារួចហើយ កាលពីថ្ងៃទី១ ខែកក្កដា ឆ្នាំ២០១៨កន្លងមក តែចាស់ទុំសងខាងមិនទាន់រើសវេលាការនៅឡើយទេ ក្នុងហេតុផលទុកឲ្យកូនប្រុសកូនស្រីសន្សំលុយត្រៀមបម្រុងឱ្យសមល្មមអាចធ្វើពិធីមង្គលការបាន ទើបរកវេលាចូលរោងការជាក្រោយ ។
ប្រភពដដែលនិយាយទៀតថា ក្នុងរយៈពេល៥ខែ៤ថ្ងៃ គិតមកដល់ថ្ងៃកើតហេតុ ភាគីខាងប្រុសធ្លាប់បានទៅលេងដល់ផ្ទះខាងស្រី៣ដងដែរ តែដោយសារជាប់រវល់នឹងការងារខិតខំសន្សំលុយសម្រាប់រៀបការ ទើបអាក់ខានទៅលេងផ្ទះនាងជាគូដណ្តឹង តែចិត្តមិនបានបែកឃ្លាតពីនាងឡើយ ពោលសំខាន់គឺសន្សំលុយ
ដោយមិនចាប់អារម្មណ៍ ហើយក៏មិននឹកស្មានដល់ចិត្តកូនស្រីមានគំនិតបែបផ្សេងយ៉ាងនេះសោះ ។
ស្រាប់តែនៅយប់ថ្ងៃទី៥ ខែមករា លេចមុខនាងជាគូដណ្តឹងរួមដំណើរជាមួយសាច់ញាតិ មកដល់បន្ទប់ជួលរករឿងនិងចោទប្រកាន់ថា បែកចិត្តទើបអត់ទៅលេង និងសង្ស័យថា មានស្រីថ្មី ដោយទាមទារដោះយកខ្សែ.ក ខ្សែដៃ និងចិញ្ចៀនប្លាទីនរបស់កូនប្រុសផ្ទាល់ ដែលទ្រព្យសម្បតិ្តទាំងនេះ ពុំមានពាក់ព័ន្ធនឹងលុយកាក់មួយរៀលជាមួយគ្នា សរុបជាទឹកប្រាក់ជាង៥០០ដុល្លារ ដើម្បីយកទៅធ្វើជាធ្នាក់ទាក់អន្ទងចិត្តកូនប្រុសនឹកស្តាយរបស់ទ្រព្យត្រូវតែទៅលេងទៀត ។
ឯខាងស្រី ក្រោយពីដោះយកគ្រឿងអលង្ការពីកូនប្រុសហើយ មានចេតនាមួយទៅប្តឹងនគរបាលប៉ុស្តិ៍ចោមចៅ៣ទៀត តែពេលទៅដល់មន្ត្រីនគរបាលសាកសួរ មិនទាន់ដឹងរឿងហេតុផលផង ស្រាប់តែនាំគ្នាគេចខ្លួនបាត់អស់ ។ ដោយឡែក ភាគីខាងប្រុស ដោយសារមើលឃើញទង្វើររបស់ភាគីកូនស្រីជ្រុលពេក ព្រោះ គ្រាន់ត្រឹមតែជាគូដណ្តឹងសោះ ខឹងគេអត់ទៅលេង បែរជាចោទប្រកាន់ផ្តេសផ្តាសគ្មានសមហេតុផល ក៏សម្រេចចិត្តនាំគ្នាមកប៉ុស្តិ៍នគរបាលដែរ តែខាងស្រីគេចទៅបាត់អស់ ។
លុះសមត្ថកិច្ចសាកសួរដឹងរឿងហេតុ ក៏ផ្តល់ជាយោបល់កុំដល់ថ្នាក់ប្តឹងប្តល់អី ទុកឲ្យចាស់ទុំ ឪពុកម្តាយទាំងសងខាងនិយាយគ្នាសិន ទើបភាគីខាងសុខចិត្តមិនប្តឹងវិញ ហើយចាកចេញទៅព្យាបាលរបួសដែលនារីជាគូដណ្ដឹងបានក្ដិចខ្ញាំរបួសដោយក្រចកដៃ ។
អ្នកខ្លះនិយាយថា នេះមិនទាន់ក្លាយជាប្ដី-ប្រពន្ធផងប៉ុណ្ណឹងទៅហើយ តើនេះជាការស្រឡាញ់ ឬបែបណា ទើបនាងជាគូដណ្ដឹងប្រកាន់យកឥរិយាបថបែបនេះ ៕
ចែករំលែកព័តមាននេះ