រាជធានីភ្នំពេញ ៖ មន្ត្រីជាន់ខ្ពស់ក្រសួងកសិកម្មបានឲ្យដឹងថា ការវិនិយោគក្នុងវិស័យកសិកម្មនៅមានកម្រិតនៅឡើយ ដោយសារបញ្ហាប្រឈមមួយចំនួនដែលកម្ពុជាមិនទាន់ដោះស្រាយបាន ស្របពេលជាមួយគ្នានេះ ធនាគារជាតិបានអះអាងថា កម្ពុជាអាចទទួលបានកំណើនវិនិយោគលើវិស័យកម្មន្តសាល និងកសិកម្ម ដោយសារកម្ពុជាអាចផលិត និងនាំចេញទៅកាន់ទីផ្សារសហរដ្ឋអាមេរិក និងប្រទេសចិន។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បាមថ្លែងកាលពីថ្ងៃទី៣ មករា ម្សិលមិញថា កម្ពុជាមានកំណើនការវិនិយោគក្នុងវិស័យកសិកម្មមួយៗនៅឡើយ ដោយសារប្រព័ន្ធហេដ្ឋារចនាសម្ព័ន្ធរបស់យើងមិនទាន់មានភាពអំណោយផលនៅឡើយ ពិសេសតម្លៃដឹកជញ្ជូន និងថ្លៃទឹក ភ្លើងរបស់កម្ពុជាមានតម្លៃខ្ពស់ ធៀបជាមួយបណ្តាប្រទេសក្នុងតំបន់ ។ លោកថ្លែងថា ៖« ទោះជាតម្លៃពលកម្មយើងទាប តែបញ្ហាហេដ្ឋារចនាសម្ព័ន្ធជារឿងមួយដែលត្រូវការពេលវេលាក្នុងការដោះស្រាយ »។
ទោះយ៉ាងនេះក្ដី បើតាមការសិក្សាមួយ ដែលបានធ្វើឡើងដោយធនាគារជាតិនៃកម្ពុជា(NBC)បានបង្ហាញថា កម្ពុជាអាចទទួលបានកំណើនវិនិយោគលើវិស័យកម្មន្តសាល និងកសិកម្ម ដោយសារកម្ពុជាអាចផលិត និងនាំចេញទៅកាន់ទីផ្សារសហរដ្ឋអាមេរិក និងប្រទេសចិន ។
ការបង្ហាញនូវសញ្ញាសុទិដ្ឋិនិយមនេះ ត្រូវបានបង្ហាញក្នុងរបាយការណ៍ប្រចាំឆ្នាំស្តីពីវឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ២០១៨ និងទស្សនវិស័យឆ្នាំ២០១៩ដែលបានចេញផ្សាយនៅដើមសប្តាហ៍នេះ ។ បាយការណ៍បានអះអាងថា ការនាំចេញរបស់កម្ពុជាបានកើនឡើងគួរឲ្យកត់សំគាល់ ជាពិសេសផលិតផលកាត់ដេរ ត្រូវបានប៉ាន់ស្មានថាកើនឡើង២៤,៧% ស្របពេលដែលការនាំចេញផលិតផលមួយចំនួនបានកើនឡើងក្នុងអត្រា២ទៅ៣ខ្ទង់ ដូចជាការនាំចេញអង្ករកើនឡើង២៣% ទោចក្រយានកើនឡើង១២% និងគ្រឿងបន្លាស់យានយន្តកើនឡើង៣ដង ។
ទោះបីយ៉ាងណា របាយការណ៍បានបន្តថា ថ្វីបើការនាំចេញផលិតផលកាត់ដេរនៅបន្តមានចំណែកធំប្រមាណ២ភាគ៣នៃការនាំចេញសរុបក៏ដោយ ក៏ចំណែកនេះបានថយចុះគួរឲ្យកត់សម្គាល់ដែរ បើធៀបនឹងប្រមាណ៩៦%នៃការនាំចេញកាលពី១០ឆ្នាំមុន ។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានថ្លែងថា រាជរដ្ឋាភិបាលកម្ពុជាបានដាក់ចេញនូវគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ដើម្បីទាក់ទាញការវិនិយោគពីបរទេសបន្ថែមទៀត ដោយសារកម្ពុជាមានសុខសន្តិភាព ស្ថិរភាពនយោបាយ និងកំណើនសេដ្ឋកិច្ចល្អប្រសើរ ព្រមទាំងលក្ខខណ្ឌអាកាសធាតុ និងផ្ទៃដីកម្ពុជា មានភាពអំណោយផលដល់ការវិនិយោគ ក្នុងវិស័យកម្មន្តសាល និងកសិកម្ម ដើម្បីកែច្នៃផលិតផលកសិកម្ម ដើម្បីនាំចេញទៅបរទេស ដែលបច្ចុប្បន្នយើងឃើញក្រុមហ៊ុនជាច្រើនបានចូលមកវិនិយោគក្នុងវិស័យទាំងពីរនេះ ។
លោកគិតថា ៖« នៅបណ្តាឆ្នាំខាងមុខ កម្ពុជានឹងទទួលបានកំណើនវិនិយោគក្នុងវិស័យកសិកម្ម ដោយសារកម្ពុជាមានភាពអំណោយផលជាច្រើន ពិសេសច្បាប់វិនិយោគរបស់កម្ពុជាមានភាពបើកចំហ ដែលអនុញ្ញាត្តឲ្យក្រុមហ៊ុនបរទេសអាចបោះទុន១០០%វិនិយោគនៅកម្ពុជា »។ លោកថា ៖« ច្បាប់នេះរួមទាំងកត្តាសុខសន្តិភាព និងស្ថិរភាពនយោបាយនៅកម្ពុជាបានទាក់ទាញអ្នកវិនិយោគបរទេសយ៉ាងខ្លាំង »។
រដ្ឋាភិបាលកម្ពុជាបានដាក់ចេញនូវគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ -២០២៥ ដើម្បីធ្វើពិពិធកម្មសេដ្ឋកិច្ចកម្ពុជា ក្នុងគោលដៅធ្វើឲ្យសេដ្ឋកិច្ចកម្ពុជាបន្តមានកំណើនរឹងមាំ និងធ្វើពិពិធកម្មផលិតផលនានា ដើម្បីនាំចេញទៅកាន់បរទេស ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានមានប្រសាសន៍ថា សុខភាពសេដ្ឋកិច្ចកម្ពុជានៅតែមានសញ្ញាល្អប្រសើរ តែបញ្ហាប្រឈមរបស់យើងនៅនៅតែមានភាពដដែលៗ ដូចជា តម្លៃដឹកជញ្ជូនខ្ពស់ កង្វះធនធានមនុស្ស ការិយាធិបតេយ្យ ថ្លៃទឹកភ្លើងនៅមានតម្តៃខ្ពស់ និងមិនទាន់មានគុណភាពជាដើម ។ លោកបន្តថា ៖« សេដ្ឋកិច្ចរបស់យើងប្រៀបដូចជារថយន្តចាស់ ដែលយើងត្រូវធ្វើការជួសជុល ឬបន្ថែមគ្រឿង ដើម្បីឲ្យរថយន្តរបស់យើងរត់បានលឿន និងឆ្ងាយជាងមុន »៕
ចែករំលែកព័តមាននេះ