រាជធានីភ្នំពេញ ៖ ប៉ុន្មានឆ្នាំចុងក្រោយនេះ រាជរដ្ឋាភិបាលកម្ពុជា ក៏ដូចជាដៃគូអភិវឌ្ឍន៍នានា តែងតែពិភាក្សាពីផែនការអភិវឌ្ឍន៍ទីក្រុងទៅជាទីក្រុងឆ្លាតវៃ ឬហៅថា « Smart City»…
រាជធានីភ្នំពេញ ៖ ប៉ុន្មានឆ្នាំចុងក្រោយនេះ រាជរដ្ឋាភិបាលកម្ពុជា ក៏ដូចជាដៃគូអភិវឌ្ឍន៍នានា តែងតែពិភាក្សាពីផែនការអភិវឌ្ឍន៍ទីក្រុងទៅជាទីក្រុងឆ្លាតវៃ ឬហៅថា « Smart City» ខណៈបច្ចុប្បន្ន មានទីក្រុងចំនួន៣របស់កម្ពុជា ត្រូវដាក់ចូលក្នុងរបៀបរវៈ និងត្រៀមដាក់បញ្ចូលទៅក្នុងផែនការមេសម្រាប់អភិវឌ្ឍន៍ទៅជា Smart City ដើម្បីដើរឲ្យទាន់យុគ្គសម័យឌីជីថល ។
ទោះយ៉ាងណាក្ដី បើតាមមន្ត្រីជាន់ខ្ពស់នៃក្រសួងពាណិជ្ជកម្មបានលើកឡើងថា ផ្អែកលើស្ថានភាពប្រទេសកម្ពុជានាពេលបច្ចុប្បន្ននេះ គឺមិនទាន់អាចបង្កើតទីក្រុងឆ្លាតវៃបាននៅឡើយទេ ដោយសារកម្ពុជានៅមានកង្វះខាតច្រើន ពិសេសគឺច្បាប់មួយចំនួន ដូចជាច្បាប់ពាណិជ្ជកម្មអេឡិចត្រូនិក (E- Commerce) ជាដើម ។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានថ្លែងកាលពីថ្ងៃទី២៦ ធ្នូ កន្លងមកថា បើយោងតាមស្ថានភាពសេដ្ឋកិច្ចនៅពេលនេះ គឺកម្ពុជាមិនទាន់អាចបង្កើតទីក្រុងឆ្លាតវៃឲ្យស្របតាមស្ដង់ដាបាននោះទេ ដោយសារកម្ពុជា នៅមានកង្វះខាតច្បាប់មួយចំនួន ពិសេសច្បាប់ពាណិជ្ជកម្មអេឡិចត្រូនិច (E- Commerce) ដែលច្បាប់នេះ កម្ពុជាគ្រោងបង្កើតឲ្យបាននៅចុងឆ្នាំ២០១៩នេះ ។
ទោះយ៉ាងនេះក្ដី លោករដ្ឋមន្ត្រីបញ្ជាក់ថា ៖« នៅពេលដែលកម្ពុជាឈានចូលក្នុងសម័យកាលបដិវត្តន៍ឧស្សាហកម្មជំនាន់ទី៤ហើយ កម្ពុជានឹងយកទីក្រុងចំនួន៣អភិវឌ្ឍន៍ជាទីក្រុងឆ្លាតវៃ ឬSmart City នេះគឺរាជធានីភ្នំពេញ ក្រុងបាត់ដំបង និងក្រុងសៀមរាប »។ លោករដ្ឋមន្ត្រីបន្តថា គ្រប់បណ្តាប្រទេសទាំងអស់នៅលើពិភពលោក នៅពេលចូលទៅក្នុងសម័យកាលបដិវត្តន៍ឧស្សាហកម្មកំរិត៤.០ គឺគេតម្រូវឲ្យបណ្តាប្រទេសទាំងនោះ ត្រូវបង្កើតទីក្រុងឆ្លាត(Smart City) នៅក្នុងប្រទេសឲ្យបានប្រមាណពី១ទៅ៣ទីក្រុង ឬអាចច្រើនជាងនេះ ដើម្បីបំពេញតម្រូវការ ឬបង្កើនភាពងាយស្រួលក្នុងការទំនាក់ទំនងរបស់ភ្ញៀវទេសចរជាតិ និងអន្តរជាតិ ។
លោករដ្ឋមន្ត្រីបន្តថា ៖« បណ្តាប្រទេសមួយចំនួនក្នុងតំបន់ដូចជា សិង្ហបូរី បានបង្កើតទីក្រុងឆ្លាតវៃរួចហើយ ។ ចំណែកបណ្តាប្រទេសដទៃទៀត កំពុងបញ្ចូលទីក្រុងរបស់គេទាំងអស់ ទៅជាទីក្រុងឆ្លាត »។ លោកថា ៖« ទីក្រុងឆ្លាតវៃ គឺត្រូវទាមទារឲ្យមានការប្រើប្រាស់ប្រព័ន្ធឧបករណ៍បច្ចេកវិទ្យាទំនើបៗជាច្រើន ពិសេសឧបករណ៍ទំនាក់ទំនងតាមប្រព័ន្ធអេឡិចត្រូនិក ក្នុងវិស័យទូរគមនាគមន៍ »។ បើទោះជាកម្ពុជាមិនទាន់អភិវឌ្ឍន៍ទីក្រុងឲ្យក្លាយជា Smart City ប្រកបដោយស្ដង់ដាក៏ដោយ ប៉ុន្ដែបច្ចុប្បន្ន នៅរាជធានីភ្នំពេញបានចាប់ផ្ដើមអភិវឌ្ឍន៍ជាបណ្ដើរៗហើយ ជាពិសេសមានក្រុមហ៊ុនឯកជនមួយចំនួនបាននិងកំពុងអភិវឌ្ឍន៍គម្រោងរបស់ពួកគេជាស្មាតស៊ីធីនេះផងដែរ ។
លោក ទូច សំណាង អគ្គនាយករងក្រុងហ៊ុនOCIC ដែលកំពុងវិនិយោគសាងសង់ទីក្រុងរណបជ្រោយចង្វា បានមានប្រសាសន៍ថា ក្រុមហ៊ុនបាននិងកំពុងរៀបចំទីក្រុងនេះជាប្រភេទSmart City ដើម្បីប្រែទីក្រុងដែលមានដីប្រមាណ១០០ហិកតានេះ ជាទីក្រុងប្រកបដោយស៊ីវិល័យមួយ ។ លោកបន្ដថា ៖« ការបង្កើតទីក្រុងបែបSmart City ត្រូវគោរពតាមស្តង់ដាបរិស្ថាន និងសន្សំសំចៃអគ្គិសនី មានសួនបៃតង និងមិនបំពុលបរិស្ថាន ពោលគឺធ្វើយ៉ាងណាឲ្យប្រជាពលរដ្ឋរស់នៅក្នុងសហគមន៍នេះ មានភាពសុខដុមរមនា »។
រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោកសាស្ត្រាចារ្យភឿង សុភ័ណ្ឌ បានថ្លែងថា ទីក្រុងឆ្លាតវៃឬSmart City មានសារសំខាន់ណាស់ ដើម្បីជំរុញការអភិវឌ្ឍប្រកបដោយចីរភាព ហើយទីក្រុងបែបនេះតម្រូវឲ្យមានការរៀបចំឡើងតាមបែបបៃតង ដែលរួមមានប្រព័ន្ធបង្ហូរទឹកត្រូវបែងចែករវាងទឹកភ្លៀង និងទឹកកខ្វក់ មានការសន្សំសំចៃថាមពលអគ្គិសនី តាមរយៈការទាញយកថាមពលពីពន្លឺព្រះអាទិត្យ មានលំហបៃតង មានដាំដើមឈើ មានហេដ្ឋារចនាសម្ព័ន្ធសមស្រប និងកាត់បន្ថយការប្រើប្រាស់ឧស្ម័នផ្ទះកញ្ចក់ជាដើម ។ លោកបន្តថា ៖« ការរៀបចំទីក្រុងបែបនេះត្រូវចំណាយច្រើន និងត្រូវការពេលវេលា និងការប្តេជ្ញាចិត្តមួយ ទើបយើងអាចធ្វើបាន និងឆ្លើយតបតាមស្តង់ដាអន្តរជាតិ »៕
ចែករំលែកព័តមាននេះ