ខេត្តស្វាយរៀង ៖ យ៉ាងហោចណាស់មានកម្មករ-កម្មការិនីរោងចក្រ១៥នាក់រងរបួសធ្ងន់ និង៣២នាក់របួសស្រាលដោយសារអ្នកបើកបររថយន្តដឹកកម្មករ-កម្មការិនីរោងចក្របើកកៀកគ្នាទុកចន្លោះសុវត្ថិភាពមិនគ្រប់គ្រាន់នៅពេលរថយន្តខាងមុខជាន់ហ្វ្រាំងរថយន្តដឹកកម្មករមកពីក្រោយបានបុកពីក្រោយពេញទំហឹងដោយជាន់ហ្វ្រាំងមិនជាប់ តែសំណាងល្អគ្មានគ្រោះថ្នាក់ដល់អាយុជីវិត ។
ករណីគ្រោះថ្នាក់ខាងលើនេះបានកើតឡើងកាលពីវេលាម៉ោង៦និង៣០នាទីព្រឹក ថ្ងៃទី៣ ខែមករា ឆ្នាំ២០១៩ នៅត្រង់ចន្លោះគីឡូម៉ែត្រលេខ១៣៩-១៤០ នៅលើកំណាត់ផ្លូវជាតិលេខ១ស្ថិតនៅភូមិថ្នល់កែង ឃុំកណ្ដៀងរាយ ស្រុកស្វាយទាប ។
យោងតាមសមត្ថកិច្ចបានអោយដឹងថា កណីគ្រោះថ្នាក់ចរាចរណ៍កើតឡើងរវាងរថយន្ដដឹកស៊ីទែនសាំង និងរថយន្តដឹកកម្មករ-កម្មការិនីរោងចក្រ បង្កឡើងដោយរថយន្តដឹកកម្មករម៉ាកហ៊ីយ៉ាន់ដាយ ពណ៌ស ពាក់ផ្លាកលេខ ភ្នំពេញ 3D-4014 បើកបរដោយឈ្មោះ ខៀវ ហន ភេទប្រុស អាយុ២៥ឆ្នាំ មុខរបរបើកបរ សញ្ជាតិខ្មែរ រស់នៅភូមិថ្លុកព្រីង ឃុំពពែត ស្រុកស្វាយទាប ខេត្តស្វាយរៀង អ្នកបើកបរគ្មានរងរបួសនោះទេ ធ្វើដំណើរទិសដៅពីលិចទៅកើតស្របគ្នាលុះមកដល់ចំណុចកើតហេតុខាងលើបានបុកគូថរថយន្តស៊ីទែនពីក្រោយ ។
ប្រភពបានបន្តទៀតថា ក្រោយជួបគ្រោះថ្នាក់ចរាចរណ៍រថយន្តស៊ីទែនបន្ថែមល្បឿនទៅមុខបាត់ស្រមោល ចំណែករថយន្តបង្កនៅកន្លែងកើតហេតុមានកម្មកររួមដំណើរ៦០នាក់បណ្ដាលឱ្យរងរបួស១៥នាក់ធ្ងន់ ប្រុស១នាក់ របួសស្រាល៣២នាក់ បច្ចុប្បន្នសំរាកព្យាបាលនៅមន្ទីរពេទ្យបង្អែកស្រុកស្វាយទាប(១៤នាក់របួសធ្ងន់ ៣៣នាក់រងរបួសស្រាល) ហើយអ្នករបួសស្រាលចំនួន៣២នាក់ ប្រុស៥នាក់ បានសុំបើកថ្នាំទៅព្យាបាលនៅផ្ទះ ចំពោះរថយន្តដឹកកម្មករបានរក្សាទុកនៅអធិការដ្ឋាននគរបាលស្រុកស្វាយទាប ។
មូលហេតុបើកបរកៀកគ្នាទុកចន្លោះសុវត្ថិភាពមិនគ្រប់គ្រាន់នៅពេលរថយន្តខាងមុខជាន់ហ្វ្រាំងរថយន្តពីក្រោយជាន់ហ្វ្រាំងមិនជាប់ទៅមុខបុកគូថរថយន្តខាងមុខតែម្តង ៕
ចែករំលែកព័តមាននេះ