ខេត្តស្ទឹងត្រែង ៖ កម្លាំងរដ្ឋបាលព្រៃឈើក្រោមការបញ្ជាផ្ទាល់ពីលោក អន ចាន់សុជាតិ នាយខណ្ឌរដ្ឋបាលព្រៃឈើស្តីទីអោយលោក ហ៊ុន សំអឿន នាយរងសង្កាត់អូរពងមាន់ ចុះបង្ក្រាបរឹបអូសទ្វារបង្អួចឈើកែច្នៃដោយខុសច្បាប់ដឹកចេញពីតំបន់ភូមិសាស្ត្រ ភូមិស្រែគរក្បែរទំនប់វារីអគ្គិសនីសេសានក្រោម ២ ទៅរក្សាទុកនៅសង្កាត់អូរពងមាន់ និងកសាងសំណុំរឿង រួចរាល់នៅព្រឹកថ្ងៃទី៣១ បន្ទាប់រឹបអូសកាល ពីយប់ថ្ងៃទី២៩ ខែធ្នូ ឆ្នាំ២០១៨ ។
ប្រភពព័ត៌មានអោយដឹងថា ស្ថិតក្នុងករណីរឹបអូសទ្វារបង្អួចឈើខាងលើអោយដឹងថា ដោយសារតែការកាប់ឈើព្រៃដោយខុសច្បាប់កែច្នៃដោយគ្មានការអនុញ្ញាត និងដឹកជញ្ជូនគ្មានលិខិតអនុញ្ញាតទើបកម្លាំងជំនាញចុះរឹបអូសនៅចំណុចចម្ការចេកចម្ងាយពីផ្លូវជាតិលេខ៧៨ ប្រមាណជា២០០ម៉ែត្រ ទល់មុខផ្លូវចូលស្ថានីយ៍វារីអគ្គិសនីសេសានក្រោម២ ស្ថិតក្នុងភូមិអូរលាងគ្រួស ឃុំក្បាល រមាស ស្រុកសេសាន ខេត្តស្ទឹងត្រែង ។
ប្រភពព័ត៌មានបន្តថា ទ្វារបង្អួចឈើខាងលើជាផលិតផលកែច្នៃពាក់កណ្តាលសម្រេច ប្រភេទឈើសុក្រំ ដឹកចេញពីភូមិស្រែគរថ្មី ស្ទើររាល់យប់តាមមធ្យោបាយរថយន្តសាំងយ៉ុង ក្នុងមួយយប់ៗប្រមាណពី៧គ្រឿងទៅ១០គ្រឿងយកទៅដាក់ក្នុងចម្ការចេកចំណុចខាងលើទើបបន្តដាក់រថយន្តកែច្នៃដឹកបន្តកាត់តាមចំការក្រុមហ៊ុនឯកជនជាច្រើនទៅទម្លាក់នៅព្រំប្រទល់ខេត្តក្រចេះ ។
ប្រភពបន្តថា ទីតាំងកែច្នៃទ្វារបង្អួចឈើខាងលើធ្លាប់ត្រូវបានបង្ក្រាបដោយកម្លាំងរដ្ឋបាលព្រៃឈើម្តងរួចមកហើយ តែបច្ចុប្បន្នទីតាំងនោះនៅបន្តបង្កើនកែច្នៃលើសដើមដែលមានរហូតទៅដល់១០កន្លែង ឯណោះ ។ ទាក់ទិនការបង្ក្រាបនេះដែរមានស្ត្រី២នាក់ដែលបានអះអាងជាម្ចាស់ម្នាក់ឈ្មោះ ចែពុយ និងម្នាក់ទៀត ចែពៅ បានចេញមុខមកសម្របសម្រួលជាមួយសមត្ថកិច្ចក្នុងទឹកប្រាក់ចំនួន៨លានរៀលជាថ្នូរ និងការមិនរឹបអូស តែសមត្ថកិច្ចបានអនុវត្តន៍ទៅតាមច្បាប់ដោយមិនបានធ្វើការសម្របសម្រួលនោះឡើយ ឈើទាំងនោះត្រូវបានសមត្ថកិច្ចចម្រុះរឹបអូស និងយករថយន្តមកស្ទូចដឹកជញ្ជូនទៅកាន់សង្កាត់រដ្ឋបាលព្រៃឈើអូរពងមាន់ថែរក្សាជាសម្បត្តិរដ្ឋ ៕
ចែករំលែកព័តមាននេះ