ខេត្តសៀមរាប ៖ បុរសជនជាតិចិនម្នាក់បានស្លាប់នៅក្នុងមន្ទីរពេទ្យអន្តរជាតិរ៉ូយ៉ាល់អង្គរ ដោយសារជម្ងឺគាំងបេះដូង នេះបើតាមសម្តីរបស់សមត្ថកិច្ចជំនាញ ។ ហេតុការជនបរទេសជនជាតិចិនស្លាប់នោះបានកើតឡើងនៅវេលាម៉ោងប្រហែល១២និង០៥នាទីយប់អធ្រាត្រ ឈានចូលថ្ងៃទី២៦ ខែធ្នូ ឆ្នាំ២០១៨…
ខេត្តសៀមរាប ៖ បុរសជនជាតិចិនម្នាក់បានស្លាប់នៅក្នុងមន្ទីរពេទ្យអន្តរជាតិរ៉ូយ៉ាល់អង្គរ ដោយសារជម្ងឺគាំងបេះដូង នេះបើតាមសម្តីរបស់សមត្ថកិច្ចជំនាញ ។ ហេតុការជនបរទេសជនជាតិចិនស្លាប់នោះបានកើតឡើងនៅវេលាម៉ោងប្រហែល១២និង០៥នាទីយប់អធ្រាត្រ ឈានចូលថ្ងៃទី២៦ ខែធ្នូ ឆ្នាំ២០១៨ ស្ថិតនៅក្នុងមន្ទីរពេទ្យអន្តរជាតិរ៉ូយ៉ាល់អង្គរ ក្នុងភូមិកសិកម្ម សង្កាត់ស្រង៉ែ ក្រុងខេត្តសៀមរាប ។
តាមប្រភពពីនគរបាលជំនាញបានឱ្យដឹងថា ជនរងគ្រោះឈ្មោះ BAI CHANGJUN ភេទប្រុស អាយុ៥១ឆ្នាំ ជាជនជាតិចិន កាន់លិខិតឆ្លងដែនលេខPE១២៥៨៣៤៩ ទិដ្ឋាការស្នាក់នៅប្រភេទEI(មានសុពលភាព០១ខែ) ចូលមកព្រះរាជាណាចក្រកម្ពុជាកាលពីថ្ងៃទី២២ ខែធ្នូ ឆ្នាំ២០១៨តាមច្រកព្រលានយន្តហោះអន្តរជាតិភ្នំពេញ និងបានបន្តដំណើរមកកាន់ខេត្តសៀមរាបកាលពីថ្ងៃទី២៥ ខែធ្នូ ឆ្នាំ២០១៨ ស្នាក់នៅសណ្ឋាគារ គ្រីស្តាល់ បន្ទប់លេខ២០៣ ក្នុងភូមិគ្រួស សង្កាត់ស្វាយដង្គំ ក្រុងខេត្តសៀមរាប ។
បើតាមការសាកសួរពីមិត្តភក្តិបានប្រាប់សមត្ថកិច្ចឱ្យដឹងថា កាលពីវេលាម៉ោងប្រហែល១០និង៤០នាទីព្រឹកថ្ងៃទី២៦ ខែធ្នូ ឆ្នាំ២០១៨ ក្នុងពេលកំពុងទស្សនាប្រាសាទបាយ័ន ស្រាប់តែឃើញជនរងគ្រោះមានអាការមិនស្រួលខ្លួន ហើយក៏នាំគ្នាឱ្យអ្នកបកប្រែភាសារចិនជួយហៅរថយន្តសង្គ្រោះបន្ទាន់របស់មន្ទីរពេទ្យអន្តរជាតិរ៉ូយ៉ាល់អង្គរដឹកបញ្ជូនទៅសង្គ្រោះនៅមន្ទីរពេទ្យអន្តរជាតិរ៉ូយ៉ាល់អង្គរភ្លាមៗផងដែរ រហូតដល់វេលាម៉ោងប្រហែល១២និង០៥នាទីជនរងគ្រោះក៏បានដាច់ខ្យល់ស្លាប់តែម្តងទៅ ។
ផ្អែកតាមការស្រាវជ្រាវរបស់សមត្ថកិច្ចជំនាញនៅលើខ្លួនសាកសពពុំមានអ្វីគួរឱ្យកត់សំគាល់ ឡើយ និងតាមការពិនិត្យរបស់លោកវេជ្ជបណ្ឌិត អ៊ិត ឆបឆរ័ត្ន គ្រូពេទ្យអមតុលាការខេត្តបានសន្និដ្ឋានថា ជនរងគ្រោះពិតជាស្លាប់ដោយសារគាំងបេះដូង ។
បច្ចុប្បន្នសពជនរងគ្រោះជនជាតិចិនត្រូវរថយន្តសង្គ្រោះរបស់មន្ទីរពេទ្យអន្តរជាតិរ៉ូយ៉ាល់អង្គរ បានដឹកបញ្ជូនទៅតម្កល់ទុកបណ្តោះអាសន្ននៅមន្ទីរពេទ្យមិត្តភាពខ្មែរ-សូវៀត (ពេទ្យរុស្ស៊ី) តាមសំណូមពររបស់មិត្តភក្តិ និងតំណាងស្ថានកុងស៊ុលផងដែរ ៕
ចែករំលែកព័តមាននេះ