រាជធានីភ្នំពេញ៖ ក្រោយពេលភ្ជាប់ពាក្យកាលពីថ្ងៃទី២៣ ធ្នូ ២០១៨ តារាសម្ដែងកញ្ញា នី ម៉ាលីណា មិនទុកចំណងស្នេហ៍ឲ្យនៅយូរទេខ្លាចជូរផ្អូម ដោយគ្រោងរៀបការឲ្យបានឆាប់បំផុតតាមតែអាចធ្វើទៅបាន ។…
រាជធានីភ្នំពេញ៖ ក្រោយពេលភ្ជាប់ពាក្យកាលពីថ្ងៃទី២៣ ធ្នូ ២០១៨ តារាសម្ដែងកញ្ញា នី ម៉ាលីណា មិនទុកចំណងស្នេហ៍ឲ្យនៅយូរទេខ្លាចជូរផ្អូម ដោយគ្រោងរៀបការឲ្យបានឆាប់បំផុតតាមតែអាចធ្វើទៅបាន ។
នៅមិនទាន់កំណត់ពេលរៀបការច្បាស់នៅឡើយ តែនី ម៉ាលីណា គិតចង់នៅដើមឆ្នាំ២០១៩ ។
កញ្ញានី ម៉ាលីណា និយាយថា រវាងនាង និងលោកទូច ផល្លី ទើបតែបានចាប់ផ្ដើមសាងស្នេហ៍កាលពីអំឡុងមួយខែមុនភ្ជាប់ពាក្យប៉ុណ្ណោះ ប៉ុន្តែនាងជឿជាក់ថាបុរសដែលនាងសម្រេចចិត្តដឹកដៃធ្វើជាគូអនាគតនេះនឹងថែទាំនាងបានល្អ ។ «ខ្ញុំមាននិស្ស័យជាមួយលោកលើសពីអ្នកតាមស្រឡាញ់នាងខ្ញុំផ្សេងទៀតដូចមេឃ និងដី ។ ក្នុងនោះសូម្បីតែចាស់ទុំខាងនាងខ្ញុំ ក៏ស្រឡាញ់ និងពេញចិត្តឥរិយាបទរបស់គូស្នេហ៍ មិនខុសពីនាងខ្ញុំផងដែរ ទើបនាងខ្ញុំយល់ថា លោកជាគូព្រេង ហើយអត់ប្រើពេលសិក្សាគ្នាយូរ ដោយដាក់ថ្ងៃឲ្យចូលដណ្ដឹងតែម្ដង »។
នាងនី ម៉ាលីណា «ខ្ញុំមានគម្រោងនឹងរៀបការជាមួយគូដណ្តឹងមិនលើសពីខែកុម្ភ:ទេ ពោលគឺនឹងរៀបចំឲ្យបានមុនថ្ងៃចូលឆ្នាំខ្មែរ ដើម្បីយកវេលា និងដើម្បីកុំឲ្យទុកយូរជូរផ្អូម នាំឲ្យមានការលើកឡើងពីនេះពីនោះ។
ខ្ញុំមានគេតាមស្រឡាញ់ច្រើនកន្លងមក តែមិនរវល់ លុះមកបាក់លើគាត់លឿននិយាយលែងចេញតែម្តង ព្រោះស្គាល់គ្នា១ខែសោះ ក៏កំណត់ភ្ជាប់ពាក្យ ។ ការភ្ជាប់ពាក្យលឿនបែបនេះ ដោយសារតែខាងចាស់ទុំគាត់ត្រូវរ៉ូវគ្នា ហើយណាមួយខាងប្រុសគាត់សឿងណាស់ ចូលមកសុំស្រឡាញ់នាងខ្ញុំ និងចូលនិយាយ ត្រង់ៗដល់ចាស់ទុំ ។
ពួកខ្ញុំអត់ទុកយូរទេ ប្រហែលការចុងខែមករា ឬអំឡុងខែកុម្ភ:ហ្នឹងឯង និយាយរួមរើសពេលវេលាបានពេលណា យកពេលណា កាន់តែឆាប់កាន់តែល្អ»។
ហេតុផលនៃការសម្រេចចិត្តរៀបការ ដោយមិនទុកយូរបែបនេះ មិនមែនព្រោះតែនី ម៉ាលីណា បារម្ភខ្លាចគូស្នេហ៍ប្រែចិត្តទេ ប៉ុន្តែអ្វីដែលនាង និងគ្រួសារចង់បាន គឺចង់រៀបការទាន់ពេលវេលាល្អមុនអំឡុងពេលចូលឆ្នាំ និងសំខាន់គឺរៀបការឲ្យចំពេលល្អនៅអំឡុងចុងខែមករា និងកុម្ភ: ។
ចំពោះលោកទូច ផល្លី មិនរើសអើង ឬបិទសិទ្ធិនី ម៉ាលីណា ប្រឡូកការងារសិល្ប:ទេ ដោយសារតែលោកអតីតជាអ្នកសិល្ប:ម្នាក់ដែរ តែបានងាកទៅធ្វើជំនួញដីធ្លី នៅក្នុងរយ:ពេលចុងក្រោយនេះ ។ «ខ្ញុំឲ្យនាងនៅតែទទួលសម្ដែង បើទោះជារៀបការហើយ ដោយគ្រាន់តែអាចរយាលជាងមុន»៕
ចែករំលែកព័តមាននេះ