ខេត្តព្រះសីហនុ ៖ សេចក្តីរាយការណ៍បឋមឱ្យដឹងថា កាលពីវេលាម៉ោងប្រមាណ៦យប់ថ្ងៃទី២៥ ធ្នូ កម្លាំងសមត្ថកិច្ចនគរបាលខេត្តព្រះសីហនុ បង្ក្រាបករណីចាប់ឃុំឃាំងនិងបង្ខាំងមនុស្ស ដោយឃាត់ខ្លួនបានសង្ស័យជាជនជាតិចិន៤នាក់ ។ ករណីបង្ក្រាបក្រុមជនសង្ស័យខាងលើនេះ ត្រូវបានសមត្តកិច្ចឲ្យដឹងថា ដំបូងមានប្រជាពលរដ្ឋបានរាយការណ៍ថា ឃើញជនជាតិចិនម្នាក់ ភេទប្រុស បានលោតចេញពីផ្ទះវីឡាមួយ ស្ថិតនៅភូមិ៥ សង្កាត់៤ ក្រុង-ខេត្តព្រះសីហនុ ដោយដៃមានជាប់ខ្នោះ មិនមានសម្លៀកបំពាក់ ស្លៀកតែខោលីអូរត់ចូលព្រៃបាត់ ។
បន្ទាប់ពីបានទទួលដំណឹងនេះភ្លាម កម្លាំងជំនាញផែននគរបាលព្រហ្មទណ្ឌ បានសហការជាមួយកម្លាំងអធិការដ្ឋាននគរបាលក្រុង កម្លាំងប៉ុស្តិ៍នគរបាលសង្កាត់៤ បានចុះទៅដល់ផ្ទះវីឡានោះ ។ ពេលទៅដល់កម្លាំងសមត្ថកិច្ចយើងបានឃើញជនជាតិចិន៤នាក់ ប្រុសៗនៅមុខផ្ទះវីឡានោះ កម្លាំងរបស់យើងបានឃាត់ឲ្យពួកគេនៅស្ងៀម តែពួកគេបានព្យាយាមរត់ កម្លាំងសមត្ថកិច្ចរបស់យើង ក៏ដេញតាមចាប់ឃាត់ខ្លួនជនជាតិចិនទាំង៤នាក់នោះតែម្តង បន្ទាប់មកកម្លាំងសមត្ថកិច្ចយើងបានឲ្យពួកគេបើកសោរបងដើម្បីធ្វើរដ្ឋបាល តែពួកគេប្រាប់ថា កូនសោរនៅគ្នារបស់ពួកគេម្នាក់ទៀត រត់គេចខ្លួនបាត់ហើយ ។
ដោយមានការអនុញ្ញាតិពីលោកព្រះរាជ្ញា នៃអយការអមសាលាដំបូងខេត្តព្រះសីហនុ បានអោយកម្លាំងសមត្ថកិច្ចយើង កាត់សោរ ដើម្បីធ្វើរដ្ឋបាលឆែកឆេរ ជាលទ្ធផលកម្លាំងសមត្ថកិច្ចយើង បានរកឃើញវត្ថុតាងមួយចំនួនដែលពាក់ព័ន្ធក្នុងករណីនេះ ។ -ជនរងគ្រោះជាជនជាតិចិន ភេទប្រុស បានរត់ចូលទៅក្នុងព្រៃបាត់ កម្លាំងសមត្ថកិច្ចយើងកំពុងធ្វើការស្វែងរក ។ -ជនសង្ស័យចំនួន ០៤នាក់៖ ១-ឈ្មោះ HUANG WU ភេទប្រុស អាយុ ៣០ឆ្នាំ ជនជាតិចិន មុខរបរ បុគ្គលិកក្រុមចងការប្រាក់តាមកាស៊ីណូ មានទីលំនៅ ភូមិ៥ សង្កាត់៤ ក្រុង-ខេត្តព្រះសីហនុ ។ ២-ឈ្មោះ GUO PAN ហៅ A ZHENG ភេទប្រុស អាយុ ៣២ឆ្នាំ ជនជាតិចិន លិខិតឆ្លងដែនលេខៈ EC០៧៨៩៤១៣ មុខរបរ បុគ្គលិកក្រុមចងការប្រាក់តាមកាស៊ីណូ មានទីលំនៅ ភូមិ៥ សង្កាត់លេខ៤ ក្រុង-ខេត្តព្រះសីហនុ ។ ៣-ឈ្មោះ ZHOU TAO TAO ហៅ XIAO YI ភេទប្រុស អាយុ ៣៥ឆ្នាំ ជនជាតិចិន មុខរបរ បុគ្គលិកក្រុមចងការប្រាក់តាមកាស៊ីណូ មានទីលំនៅ ភូមិ៥ សង្កាត់៤ ក្រុង-ខេត្តព្រះសីហនុ ។ ៤-ឈ្មោះ LU SHENMAN ហៅ A YUE ភេទប្រុស អាយុ ៣០ឆ្នាំ ជនជាតិចិន មុខរបរ បុគ្គលិកក្រុមចងការប្រាក់តាមកាស៊ីណូ មានទីលំនៅ ភូមិ៥ សង្កាត់៤ ក្រុង-ខេត្តព្រះសីហនុ ។ +
វត្ថុតាងចាប់យកបានរួមមាន ដំបងដែករលាស់ ០២ដើម -កន្ត្រៃ ០១ -ស្កុត ០១ដុំ -ខ្នោះដៃ ០១គូរ -ស្រោមខ្នោះ ០២ -ដៃស្មារខាលខោអាវ បត់រុំស្កុត ០១ -ទូរស័ព្ទដៃចំនួន ០៦គ្រឿង -វ៉ាលីសំលៀកបំពាក់ ០៤ ក្នុងនោះមានសំលៀកបំពាក់មួយចំនួន -កាបូបស្ពាយ ០៣ ក្នុងនោះមានសំលៀកបំពាក់មួយចំនួន ។ ករណីនេះ កើតឡើងដោយសារជនរងគ្រោះបានខ្ចីលុយពីក្រុមជនសង្ស័យ ដើម្បីលេងល្បែងក្នុងកាស៊ីណូ ពេលលេងចាញ់គ្មានលុយសង ក៏ត្រូវក្រុមជនសង្ស័យចាប់យកមកឃុំខ្លួននៅផ្ទះវីឡាកន្លែងកើតហេតុតែម្តង លុះនៅថ្ងៃទី ២៥ ខែធ្នូ ឆ្នាំ២០១៨ វេលាម៉ោង ១៨ និង ០០នាទី ពេលក្រុមជនសង្ស័យកំពុងដេកលក់ ជនរងគ្រោះក៏ឈ្លាតឳកាសផ្លោះរបងរត់ចូលទៅក្នុងព្រៃបាត់ ហើយត្រូវបងប្អូនប្រជាពលរដ្ឋដែលនៅក្បែរនោះឃើញ ក៏រាយការណ៍ជូនសមត្ថកិច្ចយើងតែម្តង ។
ចំពោះករណីនេះ ការិយាល័យនគរបាលព្រហ្មទណ្ឌកម្រិតស្រាល កំពុងកសាងសំណុំរឿង បញ្ជូនទៅសាលាដំបូងខេត្ត ដើម្បីចាត់ការតាមផ្លូវច្បាប់ ។
ចែករំលែកព័តមាននេះ