ចុះហាមឃាត់ជនជាតិ​ខ្មែរ​-​អ៊ិ​ស្លា​ម​ចំនួន​២១៦​គ្រួសារចាក​ចេញពី​ដី​សម្បទាន​សេដ្ឋកិច្ច​


ខេត្តមណ្ឌលគិរី ៖ អាជ្ញាធរ​បាន​ចុះ​ហាមឃាត់​នឹង​ស្នើរ​ឲ្យ​ជនជាតិ​ខ្មែរ​-​អ៊ិ​ស្លា​ម​ចំនួន​២១៦​គ្រួសារ​ចាក​ចេញពី​ដី​សម្បទាន​សេដ្ឋកិច្ច​ប៉ា​ស៊ី​ហ្វិ​ក​ហ្គ្រែ​ន​ក្រោយ​រក​ឃើញ​ថា ប្រជាពលរដ្ឋ​ទាំងនោះ​បាន​រំលោភ​យក​ដី​ក្រុមហ៊ុន​ដោយ​ខុសច្បាប់​ចំនួន​៨០០​ហិ​កតា ។ ប្រតិបត្តិការ​នេះ​បាន​ធ្វើ​ឡើង​កាលពី​ថ្ងៃ​ទី​២៣ ខែធ្នូ ឆ្នាំ​២០១៨ នៅ​ភូមិសាស្ត្រ​ឃុំរ​យ៉ ស្រុក​កោះ​ញែក ខេត្តមណ្ឌលគិរី ។

លោក ថាវ អឿ​ង អភិបាលរង​ស្រុក​កោះ​ញែក​បាន​ឲ្យ​ដឹង​ថា «​ក្រុមការងារ​ស្រុក​បាន​ចុះ​ទៅ​ផ្សព្វផ្សាយ​ដល់​ពួក​គាត់ ជុំវិញ​បញ្ហា​ចូល​ទៅ​កាន់កាប់​ដី​ចំនុច​ខាងលើ​នោះ ជា​ដី​របស់​ក្រុមហ៊ុន​ដី​សម្បទាន​សេដ្ឋកិច្ច ដូច្នេះ​តម្រូវ​ឲ្យ​គាត់​នាំ​គ្នា​ចាក​ចេញពី​ទីតាំង​នោះ​វិល​ត្រលប់​ទៅ​លំនៅ​ឋាន​ដើម​វិញ ចៀសវាង​ប្រឈម​ផ្លូវច្បាប់​» ។

អភិបាលរង​ស្រុក​បន្ត​ថា «​ក្រុម​ប្រជាពលរដ្ឋ​ទាំងនោះ មិន​បាន​សុំ​ការ​អនុញ្ញាត​ណាមួយ​ពី​អាជ្ញាធរ​មូលដ្ឋាន ដើម្បី​មាន​សិ​ទ្ធិចូល​ទៅ​រស់នៅ​លើ​ដី​តំបន់​ខាងលើ​ឡើយ​…​ដោយ​ពួក​គេ​បាន​អះអាង​ថា ដី​នោះ​មិន​មាន​ពាក់​ព័​ន្ឋ​នឹង​អ្នក​ណា​ឡើយ ជា​ដី​ព្រៃ​ទើប​សម្រេច​នាំ​គ្នា​កាប់​រុករាន​រស់នៅ​តែ​ម្តង​» ។

បើ​តាម​ការ​បញ្ជាក់​របស់​លោក ថាវ អឿ​ង ប្រជាពលរដ្ឋ​ដែល​ចូល​ទៅ​ចាប់ដី​នោះ​ភាគច្រើន​មក​ពី​ខេត្តកំពង់ចាម មាន​ជនជាតិ​ខ្មែរឥស្លាម​ចំនួន​១២៧​គ្រួសារ ជនជាតិ​ខ្មែរ​ចំនួន​៨៩​គ្រួសារ កំពុង​ធ្វើ​កាន់កាប់​ដី​ចំនួន​៨០០​ហិច​តា ក្នុង​ទំហំ​ផ្ទៃដី​របស់​ក្រុមហ៊ុន​ចំនួន​១​ម៉ឺន​ហិ​កតា ។

ដោយឡែក​ក្រុម​ប្រជាពលរដ្ឋ​បាន​លើក​ឡើង​ថា​«​ពួក​គាត់​មិន​អាច​ចាក​ចេញពី​ទី​នេះ​បាន​ឡើយ ស៊ូស្លាប់​រស់នៅ​ទី​នេះ ព្រោះ​កាលពី​ពេល​ពួក​គាត់​ចូល​រស់នៅ​ដំបូង​របស់​មក​ដល់​ពេល​នេះ​អស់​រយៈពេល​បី​ឆ្នាំ​ហើយ មិន​ដែល​ឃើញ​ក្រុមហ៊ុន​ចុះ​ទៅ​បោះ​ព្រំ​ដី​ថា​ជា​កម្ម​សិទ្ធ​ឡើយ ក៏​មិន​ដែល​មាន​ទំនាស់​ជាមួយ​ក្រុមហ៊ុន​ដែរ​…​អ៊ីចឹង​ពួក​គាត់​នឹង​បន្ត​រស់នៅ​តំបន់​នេះ​» ៕

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ