រាជធានីភ្នំពេញ ៖ ការនាំចេញអង្ករទៅទីផ្សារអន្តរជាតិនៅឆ្នាំនេះ មើលទៅមិនអាចស្មើនឹងឆ្នាំកន្លងមកទេ ។ បើផ្អែកតាមរបាយការណ៍នាំចេញអង្កររយៈពេល១១ខែ មានចំនួនតែជាង៤៩ម៉ឺនតោនប៉ុណ្ណោះ ធ្វើឲ្យអ្នកជំនាញក្នុងវិស័យនេះវាយតម្លៃថា ការនាំចេញអង្ករសរុបរបស់កម្ពុជានៅឆ្នាំ២០១៨នេះបានយ៉ាងច្រើនប្រមាណតែ៥៦ម៉ឺនតោនប៉ុណ្ណោះ ឬធ្លាក់ចុះប្រមាណ១២% បើធៀបនឹងឆ្នាំមុន ។
លោក កាន់ គន្ធី អគ្គនាយករងក្រុមហ៊ុនអេមរុ រាយស៍ មានប្រសាសន៍ថា មើលតាមសន្ទស្សន៍នាំចេញអង្ករក្នុងរយៈពេល១១ខែឆ្នាំនេះ សន្និដ្ឋានបានថា កម្ពុជាអាចនាំចេញអង្ករប្រហែល៥៦ម៉ឺនតោនប៉ុណ្ណោះក្នុងឆ្នាំ២០១៨ ឬថយចុះប្រហែលជាង១២% បើធៀបនឹងឆ្នាំ២០១៧កន្លងទៅ ។ លោកបន្ដថា ការធ្លាក់ចុះនេះ ដោយសារតែកម្ពុជាជួបបញ្ហាច្រើនដូចជា កង្វះដើមទន់ក្នុងការប្រមូលទិញស្រូវពីកសិករ, ការប្រកួតប្រជែង និងហេដ្ឋារចនាសម្ព័ន្ធនៅតែជាបញ្ហាចោទដ៏សំខាន់ដែលធ្វើឲ្យថ្លៃដើមខ្ពស់ជាដើម ។
ទន្ទឹមនឹងនេះ លោកបន្ថែមថា តម្លៃអគ្គិសនីខ្ពស់ និងមិនមានស្ថិរភាព ក៏ជាឧបសគ្គរាំងស្ទះដល់សង្វាក់ផលិតកម្មក្នុងវិស័យនេះផងដែរ ខណៈតម្លៃដឹកជញ្ចូនទាំងផ្លូវគោក និងផ្លូវដែកពីភ្នំពេញទៅកំពង់ផែរឡើងថ្លៃស្រេចតែចិត្ត។ ចំណែកតម្លៃដឹកជញ្ជូនតាមកប៉ាល់ និងសេវាកម្មផ្សេងៗនៅកំពង់ផែបានឡើងថ្លៃជារឿយៗ ដែលធ្វើឲ្យតម្លៃអង្កររបស់ពិបាកប្រកួតប្រជែងជាមួយប្រទេសជាដៃគូនាំចេញ ។ លោកបន្ដថា ៖« ក្រៅពីបញ្ហាទាំងអស់នេះ ក៏នៅមានឥទ្ធិពលពីខាងក្រៅផងដែរ ដូចជា សង្គ្រាមពាណិជកម្មរវាងចិននិងអាមេរិក, ភាពមិនច្បាស់លាស់ជុំវិញបញ្ហាប្រព័ន្ធអនុគ្រោះពន្ធរបស់អឺរ៉ុបមកលើប្រទេសកម្ពុជា និងប្រព័ន្ធរបាំងការពារផលប្រយោជន៍ (Safe Guard Clause) ដែលបានប្តឹងឡើងដោយប្រទេសអុីតាលី និងអេស្ប៉ាញ ជាដើម ដែលកត្តាទាំងនេះ សុទ្ធតែធ្វើឲ្យរាំងស្ទះដល់ការនាំចេញអង្កររបស់កម្ពុជា » ។
ប្រធានសម្ព័ន្ធសមាគមរោងម៉ាស៊ីនកិនស្រូវកម្ពុជា លោកឧកញ៉ា ភួ ពុយ បានឲ្យដឹងតាមទូរស័ព្ទនារសៀលថ្ងៃទី១៩ ធ្នូ ថា នៅដំណាច់ឆ្នាំនេះ សហភាពអឺរ៉ុបនឹងសម្រេចថា ត្រូវយកពន្ធពីអង្ករកម្ពុជា ឬអត់ ប៉ុន្តែលោកគិតថា ៖« ទោះជាអឺរ៉ុបយកពន្ធក្តី ក៏វាមិនប៉ះពាល់ធ្ងន់ធ្ងរដល់ទីផ្សារអង្ករកម្ពុជាដែរ តែប្រឈមមុខនឹងស្ថានភាពនេះ យើងត្រូវធ្វើការងារសំខាន់ៗចំនួន៣ ដូចជា រៀបចំសហគមន៍កសិករកម្ពុជាឲ្យផលិតស្រូវដែលមានតម្លៃទីផ្សារ និងសម្រាប់ឆ្លើយតបទីផ្សារអាស៊ី អ្នកផលិតនិងកែច្នៃផ្តោតលើទីផ្សារអាស៊ីកាន់តែច្រើន និងយុទ្ធសាស្ត្រការទូតរបស់យើង គឺធ្វើយ៉ាងណាឲ្យអង្ករកម្ពុជាកាន់តែល្បីល្បាញ »។
លោកឧកញ៉ាបានបន្តថា ៖« ទោះជាយ៉ាងណាសហគមន៍អឺរ៉ុប គួរពិចារណាច្រើនលើបញ្ហានេះ ព្រោះអឺរ៉ុបមានប្រទេសច្រើនជាសមាជិក និងមានប្រជាជនច្រើន ដែលចង់បានតម្លៃអង្ករមានលក្ខណៈប្រកួតប្រជែងមួយ ហេតុនេះការយកពន្ធពីអង្ករកម្ពុជា នឹងបន្ថែមបន្ទុកដល់ប្រជាជនអឺរ៉ុបទៅវិញទេ »៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ