ខេត្តកំពង់ឆ្នាំង ៖ លោកជំទាវអភិបាលរងខេត្តប៉ៃលិនម្នាក់បានស្លាប់ពេលដឹកទៅសង្គ្រោះនៅឯមន្ទីរពេទ្យខេត្ត បន្ទាប់ពីជួបឧប្បត្តិហេតុគ្រោះថ្នាក់ចរាចរណ៍មួយបានកើតឡើងរវាងរថយន្ត៣គ្រឿងបុកគ្នា។
ហេតុការណ៍ដ៏រន្ធត់នេះបានកើតឡើងនៅវេលាម៉ោង២និង៣០នាទី រសៀលថ្ងៃទី ២០ ខែធ្នូ ឆ្នាំ២០១៨ នៅលើកំណាត់ផ្លូវជាតិលេខ ៥ ត្រង់ចន្លោះគីឡូម៉ែត្រលេខ ១០៤ និង១០៥ ស្ថិតនៅក្នុងភូមិថ្មកែវ ឃុំស្វាយជ្រុំ ស្រុករលាប្អៀរ ។
សមត្ថកិច្ចនគរបាលនៅកន្លែងកើតហេតុបានឲ្យដឹងថា៖ មុនពេលកើតហេតុ រថយន្តរបស់លោកជំទាវ សោ មុនី្នរ័ត្ន អភិបាលរងខេត្តប៉ៃលិន ម៉ាកឡិសស៊ីស GS 300 ពណ៌ស ពាក់ស្លាកលេខ ភ្នំពេញ ២T-៨៩៧១ បានធ្វើដំណើរក្នុងទិសដៅពីខេត្តប៉ៃលិនទៅភ្នំពេញ តាមបណ្តោយផ្លូវជាតិលេខ៥ ពីជើងទៅត្បូង លុះមកដល់ចំណុចកើតហេតុក៏បានបុកគ្នាជាមួយនឹងរថយន្តទួរីសមួយគ្រឿង ពណ៌ស ពាក់ស្លាកលេខ ភ្នំពេញ ២AF-១៣៤៥ ក្នុងទិសដៅបញ្ច្រាសគ្នា ក្រោយពេលបុកគ្នាជាមួយរថយន្តទួរីសហើយ រថយន្តរបស់លោកជំទាវអភិបាលរងខេត្តប៉ៃលិន ក៏បានជ្រុលទៅបុកនឹងរថយន្តធុនធំប្រភេទយីឌុបមួយគ្រឿងទៀត ពាក់ស្លាកលេខភ្នំពេញ ៤A-២៣៨៣ បណ្តាលអោយរថយន្តទាំង៣គ្រឿង ខ្ទាតធ្លាក់ចេញពីផ្លូវរៀងៗខ្លួន ។
ក្រោយពេលកើតហេតុគេដឹងថា រថយន្តរបស់លោកជំទាវអភិបាលរងខេត្តប៉ៃលិន ដែលមានគ្នាជិះគ្នា៣នាក់បានរងរបួសធ្ងន់និងស្រាល ក្នុងនោះលោកជំទាវ សោ មុន្នីរត្ន័ អភិបាលរងខេត្តប៉ៃលិន ដែលជិះនៅខាងក្រោយបានរងរបួសធ្ងន់ ហើយក៏ត្រូវបានដឹកយកទៅសង្គ្រោះនៅមន្ទីរពេទ្យខេត្ត តែជាអកុសលលោកជំទាវក៏បានស្លាប់នៅក្នុងមន្ទីរពេទ្យ ។
ចំណែកអ្នករងរបួសពីរនាក់ទៀត គឺលោកជំទាវ ប៉ុក ណាឌី អាយុ៤៩ឆ្នាំ អភិបាលរងខេត្តបន្ទាយមានជ័យ និងកូនប្រុសរបស់លោកជំទាវ សោ មុន្នីរ័ត្ន ឈ្មោះ គិន ណាំចូក ជាអ្នកបើកបររថយន្ត។
ដោយឡែកអ្នកជិះក្នុងរថយន្តទួរីស និងរថយន្តយីឌុបមួយគ្រឿងទៀត គ្រាន់តែរងរបួសស្រាលៗតែប៉ុណ្ណោះ។
រថយន្តទាំង៣គ្រឿងត្រូវបានសមត្ថកិច្ចនគរបាលនៃស្នងការដ្ឋាននគរបាលខេត្តយកទៅរក្សាទុកដើម្បីរង់ចាំការដោះស្រាយតាមផ្លូវច្បាប់ ។ ដោយឡែកសពរបស់លោកជំទាវអភិបាលរងខេត្តត្រូវបានក្រុមគ្រួសាររៀបចំដឹកយកទៅធ្វើបុណ្យតាមប្រពៃណី ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ