រាជធានីភ្នំពេញ ៖ បុណ្យសមុទ្រលើកទី៧នៅខេត្តកោះកុងបានបញ្ចប់ហើយដោយមានភ្ញៀវជាតិ និងអន្តរជាតិចូលរួមកម្សាន្តជាង៣៥ម៉ឺននាក់ ។ លោកថោង ខុន បានថ្លែងថា បុណ្យសមុទ្រនៅខេត្តកោះកុងរយៈពេល៣ថ្ងៃចាប់ពីថ្ងៃទី១៤ដល់ថ្ងៃទី១៦ខែធ្នូឆ្នាំ២០១៨ភ្ញៀវជាតិនិងអន្តរជាតិជាង៣៥ម៉ឺននាក់នេះកើនឡើង៦ដង បើប្រៀបធៀបទៅនឹងបុណ្យសមុទ្រកាលពីឆ្នាំ២០១៣នៅខេត្តកោះកុង…
រាជធានីភ្នំពេញ ៖ បុណ្យសមុទ្រលើកទី៧នៅខេត្តកោះកុងបានបញ្ចប់ហើយដោយមានភ្ញៀវជាតិ និងអន្តរជាតិចូលរួមកម្សាន្តជាង៣៥ម៉ឺននាក់ ។
លោកថោង ខុន បានថ្លែងថា បុណ្យសមុទ្រនៅខេត្តកោះកុងរយៈពេល៣ថ្ងៃចាប់ពីថ្ងៃទី១៤ដល់ថ្ងៃទី១៦ខែធ្នូឆ្នាំ២០១៨ភ្ញៀវជាតិនិងអន្តរជាតិជាង៣៥ម៉ឺននាក់នេះកើនឡើង៦ដង បើប្រៀបធៀបទៅនឹងបុណ្យសមុទ្រកាលពីឆ្នាំ២០១៣នៅខេត្តកោះកុង ។ ថ្ងៃទី១ មានភ្ញៀវជាង៦ម៉ឺននាក់ ថ្ងៃទី២ ជាង២០ម៉ឺននាក់ និងថ្ងៃទី៣មានជាង៩ម៉ឺននាក់ ។ លោកថោង ខុន ថា មានកត្តាជាច្រើនដែលនាំឲ្យភ្ញៀវចូលទស្សនាច្រើនសន្ធឹកសន្ធាប់ក្នុងនោះរួមមាន កត្តាសន្តិភាព កត្តារីកចម្រើនឥតឈប់ឈរនៃជីវភាពរស់នៅរបស់ប្រជាពលរដ្ឋ កត្តារីកចម្រើននៃហេដ្ឋារចនាសម្ព័ន្ធ ផ្លូវថ្លល់ កត្តាផលិតផល និងគោលដៅទេសចរណ៍ ប្លែកៗដ៏ទាក់ទាញ ពិសេសគឺទេសភាពដ៏ទាក់ទាញនៃតំបន់ឆ្នេរ កោះ និងតំបន់អេកូទេសចរណ៍ និងការយកចិត្តទុកដាក់រៀបចំរបស់គណៈកម្មការ និងអាជ្ញាធរខេត្ត ការគ្រប់គ្រងសន្តិសុខ សណ្តាប់ធ្នាប់ អនាម័យ បរិស្ថានដ៏ល្អ ។ ប៉ុន្តែកត្តាសំខាន់បំផុតនោះ គឺវត្តមានរបស់សម្តេចតេជោហ៊ុន សែន និងសម្តេចកិត្តិព្រឹទ្ធបណ្ឌិត ដែលជាទីគោរពស្រលាញ់របស់ប្រជាពលរដ្ឋគ្រប់រូប ។
លោកថា ប្រជាពលរដ្ឋពីគ្រប់ស្រុកនៃខេត្តកោះកុង និងពីស្ទើរគ្រប់ខេត្តនៅទូទាំងប្រទេស ចង់ជួបចង់ស្តាប់ផ្ទាល់ប្រសាសន៍របស់សម្ដេចតេជោនាយករដ្ឋមន្ត្រី ជាក់ស្តែងមាន ប្រជាពលរដ្ឋរាប់ម៉ឺននាក់ដែលបានចូលរួមស្តាប់ផ្ទាល់ប្រសាសន៍សម្តេចតេជោដែលថ្លែង ទៅកាន់ប្រជាពលរដ្ឋក្នុងឱកាសពីធីបើក ដោយស្ងាត់ស្ងៀម និងយកចិត្តទុកដាក់ និងពេញចិត្ត បំផុត ។
ពិធីបុណ្យសមុទ្រឆ្នាំ២០១៨ ក្រោមប្រធានបទ «ឆ្នេរស្អាត ពលរដ្ឋរមណីយ៍» អមជាមួយពាក្យស្លោក«អេកូទេសចរណ៍សម្រាប់កំណើនបៃតង និងការអភិវឌ្ឍប្រកបដោយនិរន្តរភាព» ក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ។
ពិធីបុណ្យសមុទ្រលើកទី៧បានរៀបចំព្រឹត្តិការណ៍ទេសចរណ៍ សំខាន់ៗជាច្រើនដូចជា ពិព័រណ៍ផលិតផលក្នុងស្រុក ពិព័រណ៍ម្ហូបអាហារនិងផលិតផលបរទេស ការសម្តែងសិល្បៈបុរាណ និងសម័យរបស់សិល្បករជាតិ និងអន្តរជាតិ សកម្មភាពកីឡា ក្បួនព្យុហយាត្រា និងការកម្សាន្តសប្បាយជាច្រើនទៀត ។
ដើម្បីសម្រួលដល់ការស្នាក់នៅរបស់ភ្ញៀវទេសចរជាតិដែលទៅកម្សាន្តក្នុងពិធីបុណ្យ ក្រសួងទេសចរណ៍បានសហការជាមួយអាជ្ញាធរមូលដ្ឋានសម្រួលឲ្យភ្ញៀវទេសចរបានទៅស្នាក់នៅក្នុងប្រទេសថៃប្រមាណជាង ១.៥០០នាក់ ។លោកថោង ខុន ឲ្យដឹងថា ព្រឹត្តិការណ៍បុណ្យសមុទ្រលើកទី៨ ឆ្នាំក្រោយនឹងត្រូវរៀបចំ ធ្វើឡើងនៅខេត្តកំពត ។
លោកប៊ុន បៀវ ប្រធានមន្ទីរទេសចរណ៍ខេត្ត និងជាសមាជិកអនុគណៈកម្មការរៀបចំពិធីបុណ្យ បានបញ្ជាកា់ ក្នុងរយៈពេលកន្លះខែមុនពិធីបុណ្យមកដល់ បន្ទប់សណ្ឋាគារ និងផ្ទះសំណាក់ចំនួន១៨០០បន្ទប់ក្នុងទីរួមខេត្ត ត្រូវភ្ញៀវកក់ទុកទាំងអស់ សម្រាប់សម្រាកលំហែកម្សាន្តក្នុងពិធីបុណ្យ៣យប់៣ថ្ងៃ ។ នៅមានភ្ញៀវជាច្រើនសន្ធឹកសន្ធាប់ទៀតអត់បន្ទប់សម្រាក ត្រូវបោះតង់តាមសួនសាធារណៈដើម្បីសម្រាក ។
អនុគណៈកម្មការរៀបចំពិធីបុណ្យ បានសហការជាមួយអាជ្ញាធរខេត្ត កក់បន្ទប់សណ្ឋាគារ និងផ្ទះសំណាក់នៅក្នុងស្រុកខ្លងយ៉ៃប្រទេសថៃ ចំនួន១០០បន្ទប់ និងរង់ចាំសម្រួលចរាចរណ៍ ទទួលភ្ញៀវឲ្យចូលទៅសម្រាកនៅទីនោះ ។
លោកប្រធានមន្ទីរទេសចរណ៍ថ្លែងថា «ហេតុផលដែលធ្វើឱ្យកំណើនភ្ញៀវកើនឡើងសន្ធឹកសន្ធាប់បែបនេះ គឺផ្អែកទៅលើកត្តាជាច្រើនដូចជា អាជ្ញាធរខេត្តបានខិតខំយកចិត្តទុកដាក់ តុបតែងភ្លើងពណ៌បំភ្លឺ កែលំអសោភ័ណភាពគ្រប់ទីកន្លែងដូចជាអាគាររដ្ឋបាលគ្រប់ស្ថាប័ន សួនច្បារ និងទីសាធារណៈទូទាំងខេត្ត។ គណៈកម្មការអន្តរក្រសួង ក្នុងនោះមានក្រសួងទេសចរណ៍ និងក្រសួងសាធារណការ បានប្តេជ្ញាពង្រីកន្ថែមតំបន់សក្តានុពលទេសចរណ៍ ជាច្រើនទៀត ជួសជុលផ្លូវជាតិលេខ៤៨ ចម្ងាយជាង១៥០គីឡូម៉ែត្រតែក្នុងរយៈពេល២ខែប៉ុណ្ណោះរួចរាល់ជាស្ថាពរ ដើម្បីបង្កលក្ខណៈងាយស្រួល និងធានាសុវត្ថិភាព ដល់ការធ្វើចរាចររបស់ភ្ញៀវជាតិ និងអន្តរជាតិដែលទៅចូលរួមអបអរសាទរ និងកម្សាន្តក្នុងពីធីបុណ្យ »៕
ចែករំលែកព័តមាននេះ