រាជធានីភ្នំពេញ ៖ រថយន្តមួយគ្រឿងម៉ាកហាយឡិច វីហ្គោ បោះពួយយ៉ាងលឿនដូចហោះទៅបុកចំក្បាលរថយន្តមួយគ្រឿងទៀតម៉ាកហាយឡេនឌ័រពេញទំហឹងរងការខូចខាតខ្ទេចមួយកំណាត់មុខ ត្រង់ផ្លូវបំបែកជា៤ ហើយរថយន្ដម៉ាកហាយឡិច វីហ្គោ មិនទាន់អស់ល្បឿនក៏ជ្រុលទៅបុករបងផ្ទះប្រជាពលរដ្ឋបន្ថែមទៀតបណ្តាលអោយបាក់ទ្វារដែកអស់មួយផ្ទាំង និងបែករបងថ្ម ចំណែករថយន្តម៉ាកហាយឡិចវីហ្គោបានរងការខូចខាតផងដែរ តែសំណាងល្អមិនបង្កអោយនរណាម្នាក់រងរបួសក្នុងគ្រោះថ្នាក់ចរាចរណ៍នេះឡើយ។
ហេតុការណ៍ខាងលើនេះបានកើតឡើងកាលពីវេលាម៉ោង១០យប់ថ្ងៃទី១៧ ខែធ្នូ នៅចំណុចផ្លូវ១៩៣ កែងនឹងផ្លូវ៣២៨ សង្កាត់ទួលស្វាយព្រៃ១ ខណ្ឌចំការមន។
រថយន្តម៉ាកហាយឡិច វីហ្គោ ពណ៌ខ្មៅ ពាក់ស្លាកលេខ ភ្នំពេញ ២AA-០៦០៨ បើកបរដោយបុរសម្នាក់ក្នុងស្ថានភាពស្រវឹង ត្រូវបានគេស្គាល់ថាឈ្មោះជា សុធារ័ត្ន អាយុ៣១ឆ្នាំ មុខរបរអាជីវករ ស្នាក់នៅផ្ទះគ្មានលេខ ផ្លូវ៣៩០ សង្កាត់បឹងកេងកង៣ ខណ្ឌចំការមន និងមិត្តភក្តិម្នាក់ទៀតជាអ្នករួមដំណើរមិនស្គាល់អត្តសញ្ញាណ ចំណែករថយន្តរងការខូចខាតខ្ទេចមួយកំណាត់ស្ទើរតែទាំងស្រុង និងផ្ទុះពោងសុវត្ថិភាពអស់២។
ចំណែករថយន្តម៉ាកហាយឡេនឌ័រ ពណ៌ទឹកប្រាក់ បើកបរដោយបុរសជនជាតិចិនម្នាក់ ឈ្មោះCHEN RUILING អាយុ៣៧ឆ្នាំ មុខរបរជីវករ ស្នាក់នៅភូមិត្រពាំងថ្លឹង សង្កាត់ចោមចៅ២ ខណ្ឌពោធិ៍សែនជ័យ រួមដំណើរដោយនារីរូបស្រស់ម្នាក់ជាជនជាតិខ្មែរ ចំណែករថយន្តបានរងការខូចខាតមួយកំណាត់ផ្នែកខាងមុខ និងផ្ទុះពោងសុវត្ថិភាពអស់២។
តាមប្រភពព័ត៌មានពីអ្នកបើកបររថយន្តម៉ាកហាយឡេនឌ័រ បានប្រាប់អោយដឹងថា មុនកើតហេតុ គាត់បានធ្វើដំណើរតាមបណ្ដោយផ្លូវ១៩៣ ក្នុងទិសដៅពីកើតទៅលិច ក្នុងល្បឿនមធ្យម លុះមកដល់កន្លែងកើតហេតុ ត្រង់ផ្លូវបំបែកជាបួន ក៏មានរថយន្តមួយគ្រឿងទៀត ធ្វើដំណើរតាមបណ្ដោយផ្លូវ៣២៨ កាត់ទទឹងផ្លូវគ្នាក្នុងទិសដៅពីជើងទៅត្បូងក្នុងល្បឿនយ៉ាងលឿន។
ប្រភពដដែលបានបន្តថា ពេលគាត់បើករថយន្តឆ្លងដល់ពាក់កណ្ដាលផ្លូវ ស្រាប់តែរថយន្តម៉ាកហាយឡិច វីហ្គោ បើកទៅបុកចំក្បាលរថយន្តរបស់គាត់ពេញទំហឹងចំហៀងខាងស្ដាំ បណ្តាលអោយរថយន្តរបស់គាត់វិលត្រឡប់ក្រោយមួយជុំ រងការខូចខាតផ្នែកខាងមុខខ្ទេច ចំណែករថយន្តហាយឡិចវីហ្គោមិនទាន់អស់ល្បឿនក៏រ៉េចង្កូត ជ្រុលទៅបុកផ្ទះប្រជាពលរដ្ឋបន្ថែមទៀត បណ្តាលអោយបាក់រលំទ្វារដែកអស់មួយផ្ទាំង នឹងបែកថ្មរបង រងការខូចខាតផ្ទះចំនួន២គ្រួសារដែលនៅជាប់គ្នានោះ ចំណែករថយន្តម៉ាកហាយឡិចវីហ្គោរងការខូចខាតខ្ទេចមួយកំណាត់មុខ ស្ទើរតែទាំងស្រុង តែសំណាងល្អក្នុងហេតុការណ៍នោះមិនបានបង្កអោយនរណាម្នាក់រងរបួសឡើយ។
បើតាមប្រភពព័ត៌មានពីអ្នកបើកបររថយន្តម៉ាកហាយឡិចវីហ្គោវិញបានប្រាប់អោយដឹងថា មិនមែនរថយន្តរបស់ខ្លួនជាអ្នកបង្កនោះទេ គឺគាត់ចោទប្រកាន់ទៅខាងរថយន្តម៉ាកហាយឡេនឌ័រថា បើកទៅបុកចំក្បាលរថយន្តរបស់គាត់ ហើយគាត់ប្រឹងទាញចង្កូត ទើបជ្រុលទៅបុករផ្ទះប្រជាពលរដ្ឋតែម្តង។
ភ្លាមៗនោះខាងសមត្ថកិច្ចជំនាញចរាចរណ៍មូលដ្ឋានចុះមកដល់កន្លែងកើតហេតុ និងរាយការណ៍ទៅខាងចរាចរណ៍ក្រុង អោយមកធ្វើការវាស់វែង និងបានស្ទូចរថយន្តទាំង២គ្រឿង យកទៅរក្សាទុកនៅការិយាល័យនរគរបាលចរាចរណ៍ផ្លូវគោកនៃស្នងការដ្ឋាននគរបាលចរាចរណ៍រាជធានីភ្នំពេញ ដើម្បីដោះស្រាយគ្នានៅពេលក្រោយតាមផ្លូវច្បាប់ និងអោយខាងរថយន្តបង្កសងការខូចខាតទៅម្ចាស់ផ្ទះរងគ្រោះ តាមទំហំនៃការខូចខាតដើម្បីបញ្ចប់រឿង ៕
ចែករំលែកព័តមាននេះ