ខេត្តព្រះសីហនុ ៖ កម្លាំងសមត្ថកិច្ចនៃមន្ទីរប្រឆាំងគ្រឿងញៀនដែលបានទៅប្រចាំការនៅតំបន់កម្សាន្តមាត់សមុទ្រក្រុងព្រះសីហនុ ដោយមានការសហការជាមួយស្នងការដ្ឋាននគរបាលខេត្ត កាលពីថ្ងៃទី១៦ ធ្នូ បានចុះបង្ក្រាបករណីជួញដូរគ្រឿងញៀនចំនួន២ករណីផ្សេងគ្នា និងឃាត់ខ្លួនជនសង្ស័យចំនួន៤នាក់ ដោយមាន៣ជាតិសាសន៍ ។
ករណីទី១-ឃាត់ខ្លួនជនសង្ស័យចំនួន៣នាក់រួមមាន ១-ឈ្មោះ ANDREA GATTO ភេទប្រុស អាយុ៣៦ឆ្នាំ ជាជនជាតិអ៊ីតាលី ២-ឈ្មោះ PATRCK SCHERRER ភេទប្រុស អាយុ៣១ឆ្នាំ ជាជនជាតិស្វ៊ីស ៣-ឈ្មោះ នួន ស្រីរ័ត្ន ភេទស្រី អាយុ២៧ឆ្នាំ ជាជនជាតិខ្មែរ ។
វត្ថុតាងចាប់យកមានម្សៅក្រាមពណ៌សថ្លាសង្ស័យជាសារធាតុញៀនចំនួន៣កញ្ចប់ធំ ស្មើ៤៤កញ្ចប់តូច ជញ្ជីងសម្រាប់ថ្លឹងគ្រឿងញៀនចំនួន២គ្រឿង ឧបករណ៍ប្រើប្រាស់សម្រាប់ជក់ និងសំភារៈសម្រាប់វេចខ្ចប់មួយចំនួនធំទៀត ។
ចំណែកករណីទី២-នៅថ្ងៃដដែលនោះផងដែរ កម្លាំងស្នងការដ្ឋាននគរបាលខេត្តព្រះសីហនុសហការជាមួយក្រុមការងារបង្ក្រាបករណីជួញដូរដោយខុសច្បាប់នូវសារធាតុញៀនបានឃាត់ខ្លួនជនសង្ស័យម្នាក់នៅចំណុចក្រុមទី៧ ភូមិ២ សង្កាត់លេខ៤ ក្រុងព្រះសីហនុ ខេត្តព្រះសីហនុ ។
ជនសង្ស័យម្នាក់ដែលត្រូវឃាត់ខ្លួនឈ្មោះ ចាប សាមិត ភេទប្រុស អាយុ៣៧ឆ្នាំ ជាជនជាតិខ្មែរ ។
វត្ថុតាងចាប់យកមាន ម្សៅក្រាមពណ៌សថ្លាសង្ស័យជាសារធាតុញៀនចំនួន២កញ្ចប់ធំ ។
បច្ចុប្បន្នជនសង្ស័យចំនួន៤នាក់ដែលមាន៣ជាតិសាសន៍ខាងលើនេះ ត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងខេត្តដើម្បីចាត់ការតាមនីតិវិធី ៕
ចែករំលែកព័តមាននេះ