រាជធានីភ្នំពេញ ៖ ជម្លោះដោយពាក្យសម្ដីយ៉ាងស្រួចស្រាល់ រវាងអ្នកបើកបររថយន្តតាក់ស៊ី និងអ្នកហៅម៉ូយដាក់រថយន្ត ព្រោះតែលុយ១ពាន់រៀលបានឈានដល់ការប្រើហិង្សាដោយបុរសអ្នកបើកបររថយន្តបានទាញពូថៅកាប់ទៅលើបុរសដែលជាអ្នកហៅម៉ូយដាក់រថយន្តប៉ងសម្លាប់ បណ្ដាលឲ្យរងរបួសដៃ និងស្មា ។ ព្រោះតែខឹងអ្នកហៅម៉ូយរូបនោះស្រែកជេរម៉ែខ្លួន…
រាជធានីភ្នំពេញ ៖ ជម្លោះដោយពាក្យសម្ដីយ៉ាងស្រួចស្រាល់ រវាងអ្នកបើកបររថយន្តតាក់ស៊ី និងអ្នកហៅម៉ូយដាក់រថយន្ត ព្រោះតែលុយ១ពាន់រៀលបានឈានដល់ការប្រើហិង្សាដោយបុរសអ្នកបើកបររថយន្តបានទាញពូថៅកាប់ទៅលើបុរសដែលជាអ្នកហៅម៉ូយដាក់រថយន្តប៉ងសម្លាប់ បណ្ដាលឲ្យរងរបួសដៃ និងស្មា ។
ព្រោះតែខឹងអ្នកហៅម៉ូយរូបនោះស្រែកជេរម៉ែខ្លួន ខណៈដែលខ្លួនមិនព្រមឲ្យលុយ១ពាន់រៀលថ្លៃជួយហៅម៉ូយ បន្ទាប់មកអ្នកបើកបររថយន្តខាងលើបានរត់គេចខ្លួនបាត់ លុះកន្លះខែក្រោយភ្លេចខ្លួនត្រឡប់ទៅកន្លែងកើតហេតុវិញត្រូវជាប់ខ្នោះ ។ ហេតុការណ៍នោះបានកើតឡើងតាំងពីថ្ងៃទី២៩ ខែវិច្ឆិកា ឆ្នាំ២០១៨ មកម្ល៉េះនៅតាមផ្លូវលេខ២១៧ ត្រង់ចំណុចជិតអតីតស្ពានដែក ស្ថិតនៅក្នុងភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។ លុះដល់វេលាម៉ោង២និង៣០នាទីរសៀល ថ្ងៃទី១៥ ខែធ្នូ ឆ្នាំ២០១៨ ទើបនគរបាលចាប់ខ្លួនជនដៃដល់បាន ហើយភាគីទាំង២បានបញ្ចប់រឿងត្រឹមសំណង១លានរៀល ។
តាមប្រភពព័ត៌មានបានឲ្យដឹងថា ជនបង្កខាងលើនោះឈ្មោះ ម៉ី ធី អាយុ២៨ឆ្នាំ មុខរបររត់តាក់ស៊ី ចំណែកបុរសរងគ្រោះឈ្មោះ ស៊ុន ទីបណ្ឌិត អាយុ២៩ឆ្នាំ មុខរបរហៅម៉ូយដាក់រថយន្ត ហើយបានរងរបួសដៃ និងស្មាស្ដាំយ៉ាងដំណំ ។
បើតាមទម្លាប់នៃការរកស៊ីរវាងអ្នករត់តាក់ស៊ី និងអ្នកហៅម៉ូយដាក់រថយន្តប្រសិនបើអ្នកហៅម៉ូយជួយហៅបានម្នាក់ គឺអ្នករត់តាក់ស៊ីឲ្យលុយភាគរយ១ពាន់រៀល បើហៅបាន១០នាក់ គឺបាន១ម៉ឺនរៀល ។ គ្រប់រថយន្តតាក់ស៊ី គឺមានគោលការណ៍រៀងៗខ្លួនបែបនេះ ដូច្នេះហើយទើបគេតែងឃើញអ្នកហៅម៉ូយនៅតាមចំណតរថយន្តនានាស្វះស្វែងដណ្ដើមម៉ូយគ្នាដាក់រថយន្តដើម្បីបានភាគរយនេះ ។
ប្រភពដដែលបានបន្តទៀតថា ដោយឡែកនៅមុនពេលកើតហេតុខាងលើជនរងគ្រោះបានហៅម៉ូយដាក់រថយន្តរបស់ជនដៃដល់ចំនួន៤នាក់ ហើយត្រូវបានភាគរយចំនួន៤ពាន់រៀល ។ ប៉ុន្តែជនដៃដល់មិនបានឲ្យគ្រប់ចំនួននោះទេ គឺឲ្យតែ៣ពាន់រៀលប៉ុណ្ណោះ ហើយនិយាយឌឺដាក់ជនរងគ្រោះថា «ចង់ទៅប្ដឹងឯណាប្ដឹងទៅអញមិនខ្លាចទេ ហើយក៏មិនឲ្យដែរ» ។ ដោយសារតែបែបនេះទើបបង្កឲ្យមានទំនាស់ពាក្យសម្ដីកើតឡើងរហូតជេរគ្នាទៅវិញទៅមក ហើយជនរងគ្រោះបានស្រៃក និងជេរម៉ែអ្នកបើកតាក់ស៊ី ។
ប្រភពខាងលើបានបន្តថា ភ្លាមៗនោះបានធ្វើឲ្យអ្នកបើរថយន្តតាក់ស៊ីខឹងច្រឡោតដាច់ក្បាលដាច់កន្ទុយក៏ទាញពូថៅកាប់ប្រហារទៅជនរងគ្រោះប៉ងសម្លាប់តែម្ដង ប៉ុន្តែជនរងគ្រោះយកដៃរង និងគេច ទើបបណ្ដាលឲ្យត្រូវដៃ និងស្មារងរបួសយ៉ាងដំណំ ។ បន្ទាប់មកជននោះបានរត់គេចខ្លួនបាត់ស្រមោល ចំណែកជនរងគ្រោះបានធ្វើដំណើរទៅដាក់ពាក្យប្ដឹងនៅប៉ុស្តិ៍នគរបាលដង្កោ ។ លុះកន្លះខែក្រោយមក គឺនៅវេលាម៉ោង២និង៣០នាទីរសៀលថ្ងៃទី១៥ ខែធ្នូ ឆ្នាំ២០១៨ ទើបជនរងគ្រោះប្រទះឃើញគូសត្រូវរបស់ខ្លួន កំពុងបើកបររថយន្តនៅចំណុចស្ពានដែកចំការដូងផ្លូវ២១៧កែងនឹងផ្លូវ៣៧១ ។
ប្រភពមួយនេះបានបញ្ជាក់ថា ក្រោយពេលសួរនាំជនបង្ករូបនោះបានសារភាពថា ខ្លួនពិតជាបានកាប់ទៅអ្នកហៅម៉ូយរថយន្តខាងលើនេះពិតប្រាកដមែន ។ ដើម្បីបញ្ចេញកំហឹងខណៈដែលជនរងគ្រោះខាងលើស្រែក និងជេរម៉ែខ្លួនកប់ៗមាត់ ហើយមូលហេតុមួយនេះខ្លួនខឹងខ្លាំងណាស់អត់ទ្រាំមិនបានទេ ទើបមកកាប់តែម្ដង ។ បន្ទាប់ពីការសាកសួរភាគីទាំង២បានសុំសម្របសម្រួលគ្នា រួចបានសុខចិត្តបញ្ចប់រឿងត្រឹមសំណង១លានរៀលនៅក្នុងប៉ុស្តិ៍នគរបាលរដ្ឋបាលដង្កោនោះ ៕
ចែករំលែកព័តមាននេះ