ខេត្តបាត់ដំបង ៖ ប្រភពពីប្រជាពលរដ្ឋបានឱ្យដឹងថា លោក សំ នេត្រ មេឃុំកំពង់ព្រៀង ស្រុកសង្កែ បានយកគ្រឿងចក្រផ្ទាល់ខ្លួនទៅកាយស្ដានដៃព្រែក នៅជិតតំបន់ហាមឃាត់នៃតំបន់ទន្លេសាប ក្រោមលេសថា ប្រជាពលរដ្ឋបានជួលគ្រឿងចក្ររបស់លោកឱ្យកាយធ្វើកន្លែងស្ដុកទឹក ដើម្បីបូមដាក់ស្រែ តែតាមពិតស៊ីឈ្នូលកាយដីធ្វើបែរ ដើម្បីស្ទាក់យកត្រីក្នុងរដូវទឹកឡើង ។
ប្រភពបានឱ្យដឹងថា គ្រឿងចក្រនោះត្រូវបានកូនប្រុស លោកសំ នេត្រ មេឃុំកំពង់ព្រៀង ដឹកចូលទៅ
កាន់តំបន់នោះ នៅយប់ថ្ងៃទី១២ ធ្នូ ហើយបានចាប់ផ្ដើមដំណើរការកាយដៃព្រែក នៅព្រឹកថ្ងៃទី១៣ ធ្នូ
នៅចំណុចខាងជើងបឹងចារេះ ស្ថិតក្នុងភូមិសាស្ត្រ ភូមិអូសទូក ឃុំកំពង់ព្រៀង ស្រុកសង្កែ ជិតដល់តំបន់២នៃតំបន់ទន្លេសាប ។
បុរសម្នាក់ឈ្មោះ អុឹម វណ្ណះ អាយុ៥០ឆ្នាំ ដែលកំពុងឈរត្រូតពិនិត្យកន្លែងកាយដីបាននិយាយថា គ្រឿងចក្រនេះ (អេស្កាទ័រ) ពិតជារបស់លោកមេឃុំកំពង់ព្រៀងមែន តែលោករួមជាមួយពលរដ្ឋចំនួន៧គ្រួសារទៀត បានជួលគាត់ឱ្យជួយកាយដីបាតអូរ ធ្វើជាកន្លែងស្ដុកទឹក ដើម្បីបូមដាក់ស្រែ ដែលពេលនេះ ស្រូវកំពុងខ្វះទឹក ។
បុរសរូបនេះបានបញ្ជាក់ថា គាត់បានជួលគ្រឿងចក្ររបស់លោកមេឃុំឲ្យកាយដីនោះចំនួន១០ម៉ោង ដោយក្នុង១ម៉ោង តំលៃ១៨ម៉ឺនរៀល ហើយពលរដ្ឋចំនួន៨គ្រួសារបានមូលមតិគ្នា ដើម្បីរៃលុយជួលគ្រឿងចក្រនេះកាយដី ។ គាត់បានប្រាប់ថា ជាមួយនឹងការកាយធ្វើប្រព័ន្ធមេស្ដុកទឹក សម្រាប់ដាក់ក្បាលបូម ក៏ត្រូវកាយប្រព័ន្ធប្រឡាយតូចប៉ុនដៃអេស្ដាវ៉ាទ័រ ដើម្បីបញ្ជូនទឹកបញ្ចូលស្រែដែរ ហើយការធ្វើនេះ ក៏មានការអនុញ្ញាតពីលោកមេភូមិ និងមេឃុំដែរ ។
ដោយឡែក ពាក់ព័ន្ធនឹងផ្លូវច្បាប់ដែលស្ថាប័នជំនាញហាមមិនឲ្យជីកកកាយដីធ្វើស្រះ ឬធ្វើបែរនៅតំបន់នោះ លោកសំ នេត្រ មេឃុំកំពុងព្រៀង និងជាម្ចាស់គ្រឿងចក្រផង បានបញ្ជាក់ប្រាប់ដូច្នេះថា «នៅទីនោះជាតំបន១ មិនមានច្បាប់ហាមឃាត់ទេ អាចជីកកកាយបាន» ។ លោកមេឃុំរូបនេះ បាននិយាយទៀតថា ប្រជាពលរដ្ឋចំនួន៨គ្រួសារ បានមកសុំការអនុញ្ញាតពីលោកមែន ដើម្បីជីកស្ដាដីអូរនោះ ធ្វើជាកន្លែងស្ដុកទឹកបូមបញ្ចូលស្រែ ។ ពលរដ្ឋបានសុំកាយប្រឡាយត្រឹមទំហំក្បាល១,៥ម៉ែត្រ និងជម្រៅត្រិម១ម៉ែត្រប៉ុណ្ណោះ តែពួកគាត់មិនបានសុំជីកទំហំធំដើម្បីស្ទាក់យកត្រីដូចការចោទប្រកាន់នោះទេ។
ប៉ុន្តែផ្ទុយពីការបំភ្លឺរបស់លោកមេឃុំ និងឈ្មោះអុឹម វណ្ណះ ដែលកំពុងឈរមើលគ្រឿងចក្រ ។ ប្រជាពលរដ្ឋម្នាក់ ដែលធ្វើស្រែនៅក្បែរទីតាំងកាយដីនោះដែរ សុំមិនប្រាប់ឈ្មោះគាត់ បាននិយាយនៅព្រឹកថ្ងៃទី១៤ ធ្នូ នេះថា មិនមានពលរដ្ឋរៃលុយគ្នាចូលរួមជួលគ្រឿងចក្រលោកមេឃុំយកទៅកាយព្រែក ដើម្បីស្ដុកទឹកធ្វើស្រែនោះទេ គឺឈ្មោះអុឹម វណ្ណះ ដែលកំពុងត្រូតពិនិត្យទីតាំងនោះហើយ ជាអ្នកជួលឲ្យកាយដើម្បីចាំស្ទាក់យកត្រីក្នុងរដូវវស្សា ។
បើតាមការពិនិត្យទីតាំងនោះជាក់ស្ដែង នៅព្រឹកថ្ងៃទី១៤ ធ្នូ នេះ គេឃើញគ្រឿងចក្រនោះ បានកាយស្ដាដៃព្រែកមានទទឹងប្រហែល៧ម៉ែត្រ បណ្ដោយប្រហែល៥០ម៉ែត្រ និងមានជម្រៅប្រហែលជាង២ម៉ែត្រ។ ពោល គឺមិនមែនមានទំហំក្បាល១,៥ម៉ែត្រ ជម្រៅ១ម៉ែត្រដូចការអះអាងរបស់លោកមេឃុំកំពង់ព្រៀងឡើយ។
ទោះយ៉ាងណា បើតាមព័ត៌មានចុងក្រោយពីប្រជាពលរដ្ឋដែលនៅធ្វើស្រែក្បែរតំបន់នោះ បានផ្ដល់ដំណឹងមកថា ក្រោយពីមានអ្នកសារព័ត៌មានចុះទៅសាកសួរ និងបានចេញផុតពីទីនោះបន្តិច ស្រាប់តែគេឃើញមានការបញ្ជាឲ្យដកគ្រឿងចក្រចេញពីទីនោះភ្លាមៗដែរ ខណ:មិនទាន់កាយដីរួចរាល់ផង ដែលទំនងការប្រើប្រាសគ្រឿងចក្រកាយស្ដាព្រែកនោះ ជាការបំពានច្បាប់មែនហើយបានជាដកថយទាំងមិនទាន់រួចរាល់ និងយ៉ាងប្រញាប់ប្រញាល់បែបនេះ ៕
ចែករំលែកព័តមាននេះ