ខេត្តពោធិ៍សាត់ ៖ កាលពីថ្ងៃទី២៥ មិថុនា ប៉ូលិសស្រុកវាលវែងបានបញ្ជូនជនសង្ស័យម្នាក់មកកាន់ស្នងការដ្ឋាននគរបាលខេត្ត ពីបទបំផ្លិចបំផ្លាញស្លាកគណបក្សដែលបានប្រព្រឹត្តកាលពី ថ្ងៃទី២៣ មិថុនា វេលាម៉ោង៨និង៣០នាទីយប់នៅភូមិកណ្តាល ឃុំថ្មដា ស្រុកវាលវែង ។ លោកវរសេនីយ៍ត្រី ម៉ូ លីដា ប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបានឱ្យដឹងថា ជនសង្ស័យដែលឃាត់ខ្លួននេះឈ្មោះ តុប សៅ ភេទប្រុស អាយុ៥៣ឆ្នាំ រស់នៅភូមិឃុំកើតហេតុខាងលើ ។
ការឃាត់ខ្លួននេះបានធ្វើឡើងតាមដើមបណ្តឹងឈ្មោះ ជា សាយន្ត តំណាងគណបក្សសង្គ្រោះជាតិឃុំថ្មដា ដែលបានចោទប្រកាន់ថា កាលពីយប់ថ្ងៃទី២៣ មិថុនា ឈ្មោះ តុប សៅ នេះបានប្រើហិង្សាកាប់ស្លាកគណបក្សសង្គ្រោះជាតិចំនួន២៥ពូថៅដួលរាបដល់ដី ដែលជាការប្រមាថមើលងាយដល់គណបក្សរបស់ខ្លួន ។ បន្ទាប់ពីទទួលបានពាក្យបណ្តឹងភ្លាម ប៉ូលិសប៉ុស្តិ៍រដ្ឋបាលថ្មដា ក៏បានហៅឈ្មោះ តុប សៅ មកសួរនាំដើម្បីរកហេតុផល។
នៅចំពោះមុខសមត្ថកិច្ច ជនសង្ស័យ តុប សៅ បានសារភាពថា ខ្លួនពិតជាបានកាប់ស្លាកគណបក្សសង្គ្រោះជាតិឃុំថ្មដាមែន ។ គាត់បន្តថា នៅយប់នោះគាត់ស្រវឹងស្រាដើរចេញពីផ្ទះទៅលេងផ្ទះអ្នកស្រុកនៅចុងភូមិ ។ ពេលដើេរទៅដល់រង្វង់មូល ស្រាប់តែជំពប់ជើងនឹងស្លាកមួយផ្ទាំងដែលខ្យល់បោកបក់ដួល ប៉ុន្តែមិនដឹងថាស្លាកគណបក្សសង្គ្រោះជាតិទេ គ្រាន់តែដឹងថានៅចំណុចនោះមានស្លាកយីហោចំនួន៣ គឺមណ្ឌលសុខភាព គណបក្សសង្គ្រោះជាតិ និងដីខ្ញុំ សិទ្ធិខ្ញុំ ។ ដោយសាររយះក្រចកជើងឈឺខ្លាំងពេក គួបផ្សំនឹងស្រវឹងស្រាផងនោះ ធ្វើឱ្យគាត់ខឹងក៏ទៅយកពូថៅមកកាប់ចិញ្ច្រាំចំនួន២៥ពូថៅ រួចហើយត្រឡប់ទៅផ្ទះវិញ ។
លុះបានប្រហែលកន្លះម៉ោងក្រោយមក ស្រាប់តែប៉ូលិសប៉ុស្តិ៍ថ្មដាហៅមកសួរនាំតែម្តង ។ ជនសង្ស័យត្រូវសមត្ថកិច្ចកសាងសំណុំរឿងបញ្ជូនទៅតុលាការ ដើម្បីផ្តន្ទាទោសតាមច្បាប់នារសៀលថ្ងៃទី២៥ នោះ ៕
ចែករំលែកព័តមាននេះ