ខេត្តកែប ៖ កំលាំងការិយាល័យប្រឆាំងបទល្មើសគ្រឿងញៀនខេត្តបានការចង្អុលបង្ហាញពីលោកឧត្តមសេនីយ៍ត្រី បែន តារា ស្នងការខេត្ត និងមានការសម្រួលនីតិវិធីពីលោកខាន់ សុផល ព្រះរាជអាជ្ញារងសាលាដំបូងខេត្តកំពត ដឹកនាំកំលាំងដោយលោកវរសេនីយ៍ទោ តាំង ធារុំ បានចុះបង្ក្រាបទីតាំងជួញដូរគ្រឿង
ញៀនមួយកន្លែងនិងឃាត់ខ្លួនជនសង្ស័យចំនួន២នាក់កាលពីវេលាម៉ោង៥ល្ងាចថ្ងៃទី៥ ធ្នូ ឆ្នាំ២០១៨ នៅចំណុចផ្លូវលំចូលភ្នំវល្លិ៍ចម្ងាយប្រហែល១៥០ម៉ែត្រពីផ្លូវជាតិលេខ៣៣ ស្ថិតក្នុងភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប ។
លោកវរសេនីយ៍ទោ តាំង ធារុំ បានឲ្យដឹងថា ជនសង្ស័យទាំង២នាក់ខាងលើ ម្នាក់ឈ្មោះហេង ចាន់ចាវ ភេទប្រុស អាយុ២០ឆ្នាំ មុខរបរមិនពិតប្រាកដ មានទីលំនៅភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប និងម្នាក់ទៀតឈ្មោះវន គឹមសាយ ភេទប្រុស អាយុ១៨ឆ្នាំ មុខរបរមិនពិតប្រាកដ មានទីលំនៅភូមិកែវក្រសាំង សង្កាត់កែប ក្រុងនិងខេត្តកែប។
ក្នុងប្រតិបត្តិការខាងលើកំលាំងសមត្ថកិច្ចដកហូតវត្ថុរួមមាន ថ្នាំញៀនប្រភេទម៉ាទឹកកកចំនួន៧កញ្ចប់ (ធំ១កញ្ចប់ និងតូច៦កញ្ចប់), ឧបករណ៍សំរាប់ជក់មួយកំប្លេ, ថង់សំរាប់វេចខ្ចប់មួយចំនួនធំ, ដែកកេះច្នៃចំនួន២,
ទូរសព្ទ័ដៃចំនួន២គ្រឿង, កាំភ្លើងកែច្នៃចំនួន២ដើម, ដាវសាម៉ូរ៉ៃ១ដើម, កន្ត្រៃកាត់១ដើម និងសម្ភារៈសំរាប់ប្រើប្រាស់មួយចំនួនទៀត។
ជនសង្ស័យ និងវត្ថុតាងត្រូវបានកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី ៕
ចែករំលែកព័តមាននេះ