ខេត្តស្ទឹងត្រែង៖ ជនជាតិខ្មែរអ៊ិស្លាមចំនួន៩នាក់ត្រូវកម្លាំងកងរាជអាវុធហត្ថខេត្ត និងក្រុងស្ទឹងត្រែងចុះឃាត់ខ្លួន រួមជាមួយទូកនេសាទចំនួន៣គ្រឿង និងឧបករណ៍នេសាទត្រីមួយចំនួនទៀត ខណៈពេលពួកគេកំពុងធ្វើសកម្មភាពនេសាទត្រីប្រើប្រាស់មងក្រឡាហាមឃាត់នៅក្នុងរដូវបិទនេសាទបញ្ជូនទៅកាន់បញ្ជាការដ្ឋានកងរាជអាវុធហត្ថខេត្ត និងប្រគល់ឱ្យរដ្ឋបាលជលផលដោះស្រាយបន្ត ។
ប្រតិបត្តិការចុះបង្ក្រាបនេះធ្វើឡើងកាលពីវេលាម៉ោង៨ និង៣០នាទីយប់ ថ្ងៃទី២២ មិថុនា ២០១៣ នៅចំណុចកន្ទុយកោះហាងខូសួន ស្ថិតក្នុងភូមិហាងខូសួន សង្កាត់ស្រះប្ញស្សី ក្រុងស្ទឹងត្រែង។ ជនល្មើសទាំង៩នាក់ ១-ឈ្មោះហ៊ីម អ៊ែល ភេទប្រុស, ២-ឈ្មោះលី ចើត ភេទស្រី, ៣-ឈ្មោះយ៉ា អាភីន័យ ភេទស្រី, ៤-ឈ្មោះស៊េន លី ភេទប្រុស, ៥-ឈ្មោះរ៉ នី ភេទប្រុស, ៦-ឈ្មោះរ៉ស់ ម៉ាស់ ភេទស្រី , ៧-ឈ្មោះម៉ាន ហេម ភេទប្រុស, ៨-ឈ្មោះសារ៉ន សាន់ ភេទប្រុស និង៩-ឈ្មោះហ៊ីម ម៉ាស់ ភេទស្រី ។
អ្នកនេសាទទាំង៩នាក់ខាងលើមានស្រុកកំណើតនៅភូមិកោះសូទិន ស្រុកកោះសូទិន ខេត្តកំពង់ចាម បច្ចុប្បន្នស្នាក់នៅភូមិស្ពានថ្ម សង្កាត់ស្រះប្ញស្សី ក្រុងស្ទឹងត្រែង ខេត្តស្ទឹងត្រែង។ អ្នកនេសាទទាំង៩នាក់ខាងលើ រួមនិងសម្ភារទាំងអស់ត្រូវប្រគល់ទៅឱ្យរដ្ឋបាលជលផលណែនាំអប់រំបន្ត ៕
ចែករំលែកព័តមាននេះ