ខេត្តកំពង់ស្ពឺ ៖ បុរសម្នាក់ត្រូវបានប្រពន្ធប្តឹងឱ្យសមត្ថកិច្ចឃាត់ខ្លួន បន្ទាប់ពីប្រើអំពើហិង្សា និងវាយបំផ្លាញសម្ភារក្នុងផ្ទះ រួចមកក្រោយពីខឹងនឹងប្រពន្ធរអ៊ីរឿងមិនគិតជួយរកស៊ី។ ករណីអំពើហិង្សានេះកើតឡើងកាលពីម៉ោង១៨និង៣០នាទី ថ្ងៃទី២៩ ខែវិច្ឆិកា ឆ្នាំ២០១៨ រស់នៅភូមិចំបក់ ឃុំវល្លិសរ ស្រុកសំរោងទង ខេត្តកំពង់ស្ពឺ ។
ប្រភពពីសមត្ថកិច្ចបានឱ្យដឹងថា បុរសជាប្តីត្រូវកម្លាំងព្រហ្មទណ្ឌស្រុកឃាត់នោះឈ្មោះ ជុំ វិច្ឆិកា ភេទប្រុស អាយុ២៣ឆ្នាំ រស់នៅភូមិចំបក់ ឃុំវល្លិសរ ស្រុកសំរោងទង ខេត្តកំពង់ស្ពឺ ចំណែកប្រពន្ធឈ្មោះ យ៉ាន សុភ័ស្ដ អាយុ២៨ឆ្នាំ ។
ប្រភពបន្តថា ជននេះត្រូវឃាត់ខ្លួន ពាក់ព័ន្ធករណីហិង្សាក្នុងគ្រួសារ ដោយបានបោកបំផ្លិចបំផ្លាញកង្ហារ១ ឧបករណ៍សម្រាប់ផ្លុំសក់ ១ និងកញ្ចក់១ឱ្យបែក ។ ករណីខាងលើនេះ ប្រពន្ធបានដាក់ពាក្យបណ្ដឹងទៅលើប្ដីរបស់ខ្លួនខាងលើ សុំឱ្យសមត្ថកិច្ចចាត់ការតាមផ្លូវច្បាប់ ព្រោះនេះមិនមែនលើកទី១នោះទេ ដែលប្តីធ្វើរបៀបនេះចំពោះនាង។
ស្ត្រីជាប្រពន្ធបានបន្តថា មុនពេលកើតហេតុមិនមានរឿងអ្វីឱ្យធំដុំនោះទេ គ្រាន់តែនាងនិយាយទៅកាន់ប្តី បន្ទាប់មកពីដើរលេងថា មិនគិតជួយរកស៊ីដូចប្តីគេទេ គិតតែដើរលេងដូចខ្លួននៅកំលោះ។
ក្រោយពីសមត្ថកិច្ចធ្វើការសាកសួររួច បុរសជាប្តីបានឆ្លើយសារភាពថា ខ្លួនពិតជាបានបោកបំផ្លិចបំផ្លាញទ្រព្យសម្បត្តិខាងលើពិតប្រាកដមែន ។ ហើយនៅព្រឹកថ្ងៃទី៣០ វិច្ឆិកា សមត្ថកិច្ចបានកសាងសំណុំរឿង ដើម្បីចាត់ការតាមនីតិវិធី ៕
ចែករំលែកព័តមាននេះ