រាជធានីភ្នំពេញ ៖ មីទ្ទិញអបអរសាទរខួបលើកទី៦ ទិវាអតីតយុទ្ធជន២១ មិថុនា គឺជាទិវាប្រវត្តិសាស្ត្រមួយប្រកបដោយមោទនភាពបំផុតដែលប្រជាជនកម្ពុជា និងអតីតយុទ្ធជនកម្ពុជាទូទាំងប្រទេសតែងតែប្រារព្ធធ្វើឡើងជារៀងរាល់ឆ្នាំចាប់តាំងពីឆ្នាំ២០០៧ មក ។ គោលបំណងសំខាន់ គឺការលើកកម្ពស់តួនាទីអតីតយុទ្ធជននៅក្នុងសង្គម ការបំផុសស្មារតីសាមគ្គីភាពជួយគ្នាទៅវិញទៅមក ការបំផុលចលនាប្រឡងប្រណាំង៣ពូកែសំដៅអភិវឌ្ឍន៍ជីវភាពរស់នៅរបស់អតីតយុទ្ធជននិងគ្រួសារ និងលើកទឹកចិត្តការចូលរួមរបស់អតីតយុទ្ធជនក្នុងការអភិវឌ្ឍប្រទេសជាតិ និងការពារបូរណភាពទឹកដី ។
ពិធីដ៏មានអត្ថន័យនេះបានប្រារព្ធធ្វើកាលពីព្រឹកថ្ងៃទី២០ មិថុនា នៅវិទ្យាស្ថានជាតិអប់រំ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជានាយឧត្តមសេនីយ៍ផុតលេខផ្តាយមាស៥ ។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍ថា ការប្រារព្ធទិវានេះគឺជាការសម្តែងនូវការដឹងគុណចំពោះអតីតយុទ្ធជន យុទ្ធជន យុទ្ធនារី បងប្អូនប្រជាជន និងអ្នកស្នេហាជាតិយើងដែលបានបូជាសាច់ស្រស់ ឈាមស្រស់ ក្នុងបុព្វហេតុជាតិមាតុភូមិ និងប្រជាជនកម្ពុជាយើងនៅគ្រប់ជំទាន់ ។ ក្នុងន័យនេះ សម្តេចតេជោនាយករដ្ឋមន្ត្រី បានផ្តល់នូវអនុសាសន៍មួយចំនួនបន្ថែមទៀតដើម្បីធ្វើជាមូលដ្ឋាននៃការអនុវត្តដូចតទៅ៖
ទី១-ចំពោះបងប្អូនអតីតយុទ្ធជនកម្ពុជា ត្រូវបន្តប្រកាន់ខ្ជាប់នូវវីរភាពអង់អាចក្លាហាន ស័ក្តិសមជាកុលបុត្រដ៏ឆ្នើមរបស់ជាតិមាតុភូមិ និងស្មារតីវីរភាព ជាគំរូល្អក្នុងសង្គមជាតិ ទោះបីជាបច្ចុប្បន្នក្លាយជាអតីតយុទ្ធជនក៏ដោយ ។ ប្រជាជននិងមាតុភូមិ ពិតជាមិនអាចភ្លេចបាននូវការលះបង់ដ៏ធំធេង និងគុណបំណាច់ដ៏ថ្លៃថ្លារបស់បងប្អូនអតីតយុទ្ធជនទាំងអស់បានទេ ។ អតីតយុទ្ធជនត្រូវយល់ថា ការផ្តល់ជាគំរូវីរភាពនេះដល់យុវជន យុទ្ធជនយើងជំនាន់ក្រោយ ក៏មានតម្លៃជាទ្រព្យធនមិនអាចកាត់ថ្លៃបានឡើយ ។
ទី២-ក្រសួងសង្គមកិច្ច អតីតយុទ្ធជន និងយុវនីតិសម្បទា ត្រូវរៀបចំយុទ្ធសាស្ត្រជាតិសម្រាប់ការអភិវឌ្ឍវិស័យអតីតយុទ្ធជនសម្រាប់រយៈពេល១០ឆ្នាំ(២០១៣-២០២៣) សំដៅបង្កើតនូវក្របខ័ណ្ឌគោលនយោបាយ ច្បាប់ លិខិត បទដ្ឋានគតិយុត្ត ផែនការសកម្មភាព និងយន្តការនានាបន្ថែមទៀត ដើម្បីពង្រីកវិស័យអតីតយុទ្ធជនឱ្យកាន់តែទូលំទូលាយ ។ ជាមួយគ្នានេះ ត្រូវបន្តលើកកម្ពស់តួនាទីរបស់អតីតយុទ្ធជនឱ្យស័ក្តិសមទៅនឹងគុណបំណាច់របស់បងប្អូនចំពោះជាតិមាតុភូមិ ដោយការលើកទឹកចិត្តខាងផ្នែកស្មារតី ការផ្តល់កិត្តិយស រួមនឹងការកែលម្អជីវភាពស្របតាមស្ថានភាពនៃការអភិវឌ្ឍសេដ្ឋកិច្ចជាតិ ។
ទី៣-ត្រូវជំរុញការអនុវត្តការគ្រប់គ្រង របបសន្តិសុខសង្គមតាមប្រព័ន្ធព័ត៌មានវិទ្យា និងការបើកផ្តល់ប្រាក់របបសន្តិសុខសង្គមតាមប្រព័ន្ធធនាគារឱ្យចប់តាមផែនការនៅដើមឆ្នាំ២០១៤ខាងមុខនេះ និងអាចរៀបចំដំណើរការបេឡាជាតិ អតីតយុទ្ធជនឱ្យទៅជាគ្រឹះស្ថានសាធារណៈរដ្ឋបាល សម្រាប់ផ្តល់សេវាសន្តិសុខសង្គមជូនអតីតយុទ្ធជន និងជាគ្រឹះស្ថានហិរញ្ញវត្ថុមិនមែនធនាគារ ដើម្បីរួមចំណែកក្នុងការអភិវឌ្ឍវិស័យហិរញ្ញវត្ថុកម្ពុជា និងបង្កើតជាសំណាញ់សុវត្ថិភាពសង្គមមួយសម្រាប់អតីតយុទ្ធជន និងសង្គមជាតិរបស់យើង ។
ទី៤-ត្រូវបន្តជំរុញការអនុវត្តគោលនយោបាយផ្តល់សម្បទានដីសង្គមកិច្ច ជូនអតីតកងកម្លាំងប្រដាប់អាវុធ និងគ្រួសារ ដោយបន្តពង្រឹងនីតិវិធីនៃការធ្វើអត្តសញ្ញាណកម្មអតីតកងកម្លាំងប្រដាប់អាវុធ និងគ្រួសារដែលមានគ្រប់លក្ខណសម្បត្តិទទួលសម្បទានដីសង្គមកិច្ច ។ គណៈកម្មាធិការអន្តរក្រសួង កំណត់អត្តសញ្ញាណថ្នាក់ជាតិ ដែលដឹកនាំដោយក្រសួងសង្គមកិច្ច អតីតយុទ្ធជន និងយុវនីតិសម្បទា ត្រូវសហការឱ្យបានជិតស្និទ្ធថែមទៀតជាមួយគណៈកម្មការកំណត់អត្តសញ្ញាណថ្នាក់រាជធានី-ខេត្ត ដើម្បីបង្កើនសុក្រឹតភាពលើការងារនេះ ។
ទី៥-ត្រូវបន្តពង្រឹងនិរន្តរភាពតំបន់អភិវឌ្ឍន៍យោធិនពិការទាំង៣ដែលបានកសាងរួចហើយ រួមមាន ភូមិអភិវឌ្ឍន៍យោធិនពិការតាកែន កោះស្លា ខេត្តកំពត មណ្ឌលអភិវឌ្ឍន៍យោធិនពិការ៣១៧ ស្រុកគូលែន ខេត្តសៀមរាប និងមណ្ឌលអភិវឌ្ឍ៍យោធិនពិការភ្នំឆត្រខេត្តបន្ទាយមានជ័យ ។ ទន្ទឹមនោះ ត្រូវពិនិត្យលទ្ធភាពរៀបចំមជ្ឈមណ្ឌលអភិវឌ្ឍន៍យោធិនពិការមួយចំនួនទៀតនៅតាមទីតាំងដែលមានអំណោយផល ពិសេសគម្រោងទាំង៤ដែលបានដាក់នៅក្នុងគម្រោងវិនិយោគសាធារណៈ ។
ទី៦-ត្រូវបន្តអភិវឌ្ឍន៍លំនៅឋានរបស់គ្រួសារយោធិន នៅតំបន់តាមបណ្តោយព្រំដែនខាងលិច ដើម្បីជួយសម្រួលដល់ជីវភាពគ្រួសារកងទ័ពផង និងជាយុទ្ធសាស្ត្រនៃវិស័យការពារជាតិផង ។ ព្រមជាមួយនោះ ត្រូវបន្តជំរុញការសាងសង់ផ្ទះជូនអតីតយុទ្ធជនដែលក្រីក្រលំបាក ហើយមានគ្រប់លក្ខណសម្បត្តិនៅតាមសហគមន៍ ដើម្បីជួយកែលម្អជីវភាពអតីតយុទ្ធជនផង និងសមាហរណកម្មអតីតយុទ្ធជនក្នុងសហគមន៍ផង។
ទី៧-ត្រូវបន្តបង្កលក្ខណៈឱ្យអតីតយុទ្ធជននិងគ្រួសារទទួលបាននូវសេវាសាធារណៈផ្សេងៗដូចជា សេវាសុខាភិបាល ការស្តារលទ្ធភាពពលកម្ម ការបណ្តុះបណ្តាលវិជ្ជាជីវៈ និងផ្តល់ឥណទានខ្នាតតូច ការដោះស្រាយការងារ មុខរបរ ការផ្តល់ជំនួយសង្គ្រោះបន្ទាន់ ការទទួលបាននូវគោលនយោបាយឧបត្ថម្ភសម្រាប់ជួយសម្រួលជីវភាពរស់នៅរបស់បងប្អូនទាំងនោះដើម្បីឱ្យមានភាពម្ចាស់ការសេដ្ឋកិច្ចរបស់ខ្លួនកាន់តែរឹងមាំ ។
ទី៨-ត្រូវពិនិត្យជ្រើសរើសអតីតយុទ្ធជនដែលមានលក្ខណសម្បត្តិល្អ ធ្វើជាអ្នកដឹកនាំសហគមន៍ផ្សេងៗដូចជា សហគមន៍នេសាទ សហគមន៍ប្រើប្រាស់ទឹក សហគមន៍កសិកម្ម និងជាថ្នាក់ដឹកនាំមូលដ្ឋានទៅតាមសមត្ថភាពនិងលទ្ធភាពដែលអាចធ្វើបាន ។ ចំពោះអតីតយុទ្ធជនជាជនពិការដែលមានសមត្ថភាពអាចធ្វើការបាន ត្រូវអនុញ្ញាតឱ្យបងប្អូនប្រឡងចូលក្របខ័ណ្ឌរដ្ឋ និងពិនិត្យជ្រើសរើសឱ្យចូលធ្វើការតាមគ្រឹះស្ថានឯកជនទៅតាមអត្រាកំណត់ ។
ទី៩-គណៈកម្មាធិការសមាគមអតីតយុទ្ធជនកម្ពុជាគ្រប់ថ្នាក់ ត្រូវគោរពនិងអនុវត្តតាមទិសដៅភារកិច្ចដែលមហាសន្និបាតនិងលក្ខន្តិកៈសមគមអតីតយុទ្ធជនកម្ពុជាបានកំណត់ឡើង ។ ក្នុងនោះ ត្រូវបន្តបំផុសចលនាប្រឡងប្រណាំង ៣ពូកែរបស់អតីតយុទ្ធជន ព្រមទាំងត្រូវបន្តការកសាងផ្ទះជូនអតីតយុទ្ធជនក្រីក្រដែលមានលក្ខណសម្បត្តិ ។ បន្តជំរុញសកម្មភាពបេឡាឥណទាន បេឡាមរណៈសង្គ្រោះ និងត្រូវបន្តពង្រឹង ពង្រីងចំណងមិត្តភាពកិច្ចសហប្រតិបត្តិការរវាងសមាគមអតីតយុទ្ធជនកម្ពុជា ជាមួយសមាគមអតីតយុទ្ធជន និងចលនាអតីតយុទ្ធជននៃប្រទេសជាតិមិត្តក្នុងតំបន់និងលើសាកលលោក ។
សម្តេចតេជោនាយករដ្ឋមន្ត្រី បានអំពាវនាវដល់ដៃគូអភិវឌ្ឍន៍ អង្គការជាតិ-អន្តរជាតិ សមាគមនានា សូមផ្តល់នូវកិច្ចសហប្រតិបត្តិការល្អ ផ្តល់ការឧបត្ថម្ភគាំទ្រចំពោះសមាគមអតីតយុទ្ធជនកម្ពុជាដើម្បីបន្តវឌ្ឍនភាពរបស់ខ្លួនថែមទៀត។ លោកអិុត សំហេង រដ្ឋមន្ត្រីក្រសួងសង្គមកិច្ចអតីតយុទ្ធជន និងយុវនីតិសម្បទាបានថ្លែងថា បច្ចុប្បន្នអតីតយុទ្ធជនចំនួន៩១.៥៨០នាក់ ព្រមទាំងអ្នកនៅក្នុងបន្ទុកចំនួន២០៣.៤២៩ នាក់ កំពុងទទួលប្រាក់របបគោលនយោបាយពីរដ្ឋដែលត្រូវបានកែសម្រួលជាបន្តបន្ទាប់ ស្របតាមការដំឡើងប្រាក់បៀវត្សរ៍មន្ត្រីរាជការ និងកងកម្លាំងប្រដាប់អាវុធដែលគិតមកដល់ឆ្នាំ២០១៣នេះសរុបស្មើ២៣៥% លើប្រាក់បៀរ៍វត្សមូលដ្ឋាន ។ លោករដ្ឋមន្ត្រីបន្តថា បានកែសម្រួលប្រាក់ឧបត្ថម្ភប្រចាំខែដល់ប្រពន្ធ កូន ឬប្តីរបស់ជនពិការ និវត្តជន និងជនបាត់បង់សមត្ថភាពការងារ ដំឡើងរបបឧបត្ថម្ភជូនកូនជនពលី និងមរណៈ ផ្តល់ប្រាក់ឧបត្ថម្ភប្រចាំខែដល់គ្រួសារជនមរណៈដែលមានឪពុកម្តាយ ឬអាណាព្យាបាល និងប្រពន្ធឬប្តី ។
ការបើកផ្តល់ប្រាក់របបសន្តិសុខសង្គម ត្រូវបានធ្វើបច្ចុប្បន្នភាពតាមប្រព័ន្ធព័ត៌មានវិទ្យា និងបើកផ្តល់តាមប្រព័ន្ធធនាគារជាបន្តបន្ទាប់ ឈានទៅបញ្ចប់ទាំងស្រុងនៅដើមឆ្នាំ២០១៤ ។ ការងារនេះ បានធ្វើឱ្យបងប្អូនអតីតយុទ្ធជនមានការពេញចិត្តនិងសប្បាយរីករាយ និងអរគុណចំពោះការយកចិត្តទុកដាក់របស់រាជរដ្ឋាភិបាល។ រាជរដ្ឋាភិបាល បានបន្តយកចិត្តទុកដាក់ដល់ការពង្រឹងក្របខ័ណ្ឌច្បាប់ និងលិខិតបទដ្ឋានសំខាន់ៗមួយចំនួនរួមមាន ច្បាប់ស្តីពីកិច្ចការពារ និងលើកកម្ពស់សិទ្ធិជនពិការ ព្រះរាជក្រឹត្យស្តីពីរបបសន្តិសុខសង្គម អនុក្រឹត្យស្តីពីការបង្កើតបេឡាជាតិអតីតយុទ្ធជន សំដៅបង្កើនប្រសិទ្ធភាពនៃការផ្តល់សេវាដល់អតីតយុទ្ធជន ៕
ចែករំលែកព័តមាននេះ