ខេត្តសៀមរាប ៖ កម្លាំងការិយាល័យនគរបាលអន្តោប្រវេសន៍ នៃស្នងការនគរបាលខេត្តសៀមរាប បានចុះធ្វើការឃាត់ខ្លួនបានជនសង្ស័យចំនួន២នាក់ជាភេទទី៣ នៅម៉ោង១០និង៣០នាទីព្រឹក ថ្ងៃទី២៨ ខែវិច្ឆិកា ឆ្នាំ២០១៨ ស្ថិតនៅចំណុចហាងបាយមួយកន្លែង…
ខេត្តសៀមរាប ៖ កម្លាំងការិយាល័យនគរបាលអន្តោប្រវេសន៍ នៃស្នងការនគរបាលខេត្តសៀមរាប បានចុះធ្វើការឃាត់ខ្លួនបានជនសង្ស័យចំនួន២នាក់ជាភេទទី៣ នៅម៉ោង១០និង៣០នាទីព្រឹក ថ្ងៃទី២៨ ខែវិច្ឆិកា ឆ្នាំ២០១៨ ស្ថិតនៅចំណុចហាងបាយមួយកន្លែង ក្នុងភូមិស្វាយដង្គំ សង្កាត់ស្វាយដង្គំ ក្រុងសៀមរាប រួចនាំយកមកសួរនៅការិយាល័យជំនាញ ។
លោកឧត្តមសេនីយ៍ត្រី ជា គឹមសាន ស្នងការរងទទួលផែនអន្តោប្រវេសន៍នៃស្នងការដ្ឋាននគរបាលខេត្តសៀមរាបបានប្រាប់តាមទូរស័ព្ទនៅរសៀលថ្ងៃទី២៩ ខែវិច្ឆិកា ឆ្នាំ២០១៨ ថា ដោយយោងតាមពាក្យបណ្តឹងរបស់ជនរងគ្រោះឈ្មោះ JAMES MICHAEL SARZOTTI ភេទប្រុស កើតឆ្នាំ១៩៥១ ជនជាតិអាមេរិក កាន់លិខិតឆ្លងដែន លេខ ៥៤៦១៦៣៤៧៨ មុខរបរ ចូលនិវត្តន៍ ស្នាក់នៅភូមិគ្រិះ ឆាំ ម៉ូនី ក្នុងភូមិតាភុល សង្កាត់ស្វាយដង្គំ ក្រុងសៀមរាប ដែលបានលួចទ្រព្យសម្បតិ្ត (ទូរស័ព្ទដៃ លុយ និងខ្សែ.ក) របស់ជនបរទេសរួចមក ។
លោកបានឱ្យកម្លាំងការិយាល័យជំនាញចុះស្រាវជ្រាវរហូតឃាត់ខ្លួនបានជនសង្ស័យភេទទី៣ ទៅក្នុងហាងបាយមួយកន្លែងក្នុងសង្កាត់ស្វាយដង្គំ រួចនាំយកមកធ្វើការសួរនៅការិយាល័យជំនាញ ដើម្បីរៀបចំកសាងសំណុំរឿងបញ្ជូនបន្តទៅតុលាការខេត្តចាត់ការបន្តទៅតាមនីតិវិធីច្បាប់។
លោកបានបញ្ជាក់ថា ជនសង្ស័យ ទី១-ឈ្មោះ អ៊ុន រតនា ភេទប្រុស (ជាភេទទី៣) កើតឆ្នាំ១៩៨២ ជនជាតិខ្មែរ មុខរបរមិនពិតប្រាកដ ស្នាក់នៅភូមិវត្តដំណាក់ សង្កាត់សាលាកំរើក ក្រុងសៀមរាបដែលទើបចេញពីពន្ធាគារនៅឆ្នាំ២០១៧ និងទី២-ឈ្មោះ មិត្ត ដូង ភេទប្រុស (ជាភេទទី៣) កើតឆ្នាំ១៩៩២ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះជួលភូមិស្វាយដង្គំ សង្កាត់ស្វាយដង្គំ ក្រុងសៀមរាប ដែលទើបចេញពីពន្ធាគារនៅឆ្នាំ២០១៧ ។
ក្រោយសាកសួរជនសង្ស័យ(ប្រភេទទី៣)ទាំងពីរនាក់រួចមក ពួកគេបានឆ្លើយសារភាព នៅចំពោះមុខសមត្ថកិច្ចយើងថា ខ្លួនពិតជាបានធ្វើសកម្មភាពលួចយក ទូរស័ព្ទដៃមួយគ្រឿង ម៉ាក IPHONE X ពណ៌ស របស់ជនរងគ្រោះប្រាកដមែន កាលពីវេលាម៉ោងប្រហែល៣ទៀបភ្លឺ ថ្ងៃទី២៥ ខែវិច្ឆិកា ឆ្នាំ២០១៨ ស្ថិតនៅចំនុចតាមផ្លូវមាត់លូ ម្តុំផ្សាររាត្រី ភូមិស្ទឹងថ្មី សង្កាត់ស្វាយដង្គំ ក្រុងសៀមរាប ហើយចំពោះលុយ និងខ្សែ.កខ្លួនមិនបានលួចទេ ហើយចំពោះទូរស័ព្ទដៃ១គ្រឿង ម៉ាក IPHONE X ពណ៌ស ត្រូវកម្លាំងនគរបាលជំនាញបានដកហូតយកពីពួកគេ ។ បច្ចុប្បន្នជនសង្ស័យ(ប្រភេទទី៣)ទាំងពីរនាក់ ត្រូវបានកម្លាំងជំនាញរៀបចំកសាងសំណុំរឿង បញ្ជូនទៅសាលាដំបូងខេត្ត ចាត់ការបន្តតាមនីតិវិធីច្បាប់ ៕
ចែករំលែកព័តមាននេះ