ខេត្តពោធិ៍សាត់ ៖ បុរសម្នាក់ស្រវឹងស្រាជោកហើយបានចុះងូតទឹកស្ទឹងនៅខាងមុខផ្ទះ បណ្តាលឱ្យលង់ស្លាប់ ដែលហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៤និង១៨នាទីរសៀលថ្ងៃទី២៩ ខែវិច្ឆិកា ឆ្នាំ២០១៨ នៅក្នុងស្ទឹងធ្លាម្អម ស្ថិតក្នុងភូមិជ័រម្គាន ឃុំត្នោតជុំ ស្រុកក្រគរ ។
សមត្ថកិច្ចឲ្យដឹងថា ជនរងគ្រោះដែលស្លាប់ឈ្មោះ ម៉ុយ សំ ភេទប្រុស អាយុ៤៦ឆ្នាំ មានប្រពន្ធនិងមានកូនប្រុសស្រីចំនួន៤នាក់ រស់នៅភូមិឃុំកើតហេតុខាងលើ។
ទាក់ទិននឹងករណីនេះ អ្នកស្រុកអ្នកភូមិដែលរស់នៅក្បែរនោះបានប្រាប់ឲ្យដឹងថា ជនរងគ្រោះជាមនុស្សញៀនស្រាស្ទើរតែរាល់ថ្ងៃ។
ជាក់ស្ដែងនៅថ្ងៃកើតហេតុនោះ ជនរងគ្រោះបានផឹកស្រាជាមួយមិត្តភក្តិ និងអ្នកភូមិពេញមួយរសៀល រហូតស្រវឹងជោកក៏បែកគ្នាអស់ទៅ។ បន្ទាប់មកជនរងគ្រោះក៏បានចុះទៅត្រាំទឹកស្ទឹងនៅកំពង់ខាងមុខផ្ទះ ពេលនោះទំនងជាស្រវឹងខ្លាំង ហើយប៉ះទឹកត្រជាក់ទៀតអាចទៅជាខ្យល់គរបណ្ដាលឲ្យលង់ទឹកស្លាប់តែម្ដង។
ដោយបាត់យូរពេក ប្រពន្ធនិងកូនមានការសង្ស័យ ក៏ពឹងអ្នកជិតខាងឲ្យចុះជួយរាវរកក្នុងស្ទឹងនោះ ក៏ស្រាប់តែប្រទះឃើញសពជនរងគ្រោះស្លាប់ក្នុងទឹកស្ទឹងតែម្ដង។
ក្រោយកើតហេតុ សមត្ថកិច្ចធ្វើកោសល្យវិច័យបានបញ្ជាក់ថា ជនរងគ្រោះពិតជាស្លាប់ដោយលង់ទឹកពិតប្រាកដមែន ព្រោះនៅលើដងខ្លួនជនរងគ្រោះពុំមានស្លាកស្នាមអ្វីគួរឱ្យកត់សម្គាល់នោះទេ៕
ចែករំលែកព័តមាននេះ