ខេត្តបាត់ដំបង ៖ ប្រភពព័ត៌មានពីសមត្ថកិច្ចបានឲ្យដឹងថា អ្នកភូមិបានប្រទះឃើញយុវជនម្នាក់ដេកស្លាប់ ដែលស្ថិតក្នុងស្ថានភាពហើមស្អុយរលួយទៅហើយ កាលពីវេលាម៉ោង៣រសៀល ថ្ងៃទី២៩ វិច្ឆិកា ដែលស្ថិតក្នុងភូមិពោធិជ្រៃ ឃុំសិរីមានជ័យ ស្រុកសំពៅលូន តែគេមិនទាន់ដឹងអំពីមូលហេតុនៅឡើយទេ។ សាកសពនោះត្រូវគេស្គាល់ថា ឈ្មោះ ណាក់ វ៉ាន់នី ភេទប្រុស អាយុ២៣ឆ្នាំ មុខរបជាកម្មករ រស់នៅភូមិ,ឃុំកើតហេតុខាងលើ។
សមត្ថកិច្ចបានឲ្យដឹងថា គេមិនដឹងថា ជនរងគ្រោះស្លាប់តាំងពីពេលណានោះទេ តែអ្នកភូមិបានដឹងពេលធំក្លិនស្អុយអាសោចពេញភូមិ។ ពេលនោះអ្នកភូមិបាននាំគ្នាទៅបើកទ្វារមើល ក៏ស្រាប់តែឃើញជនរងគ្រោះដែលស្លាប់ហើមស្អុយរលួយទៅហើយ ទើបមានការភ្ញាក់ផ្អើល និងរាយការណ៍ប្រាប់សមត្ថកិច្ចតែម្ដង។
សមត្ថកិច្ចបានឲ្យដឹងថា មន្ត្រីជំនាញកំពុងពិនិត្យ និងសាកសួរអំពីស្ថានភាពក្រុមគ្រួសារជនរងគ្រោះនេះ ព្រោះគេជនរងគ្រោះដេកស្លាប់លើផ្ទះម្នាក់ឯង។ គេមិនទាន់ហ៊ានសន្និដ្ឋានអំពីការស្លាប់របស់ជនរងគ្រោះនេះថា ជាករណីបែបណានៅឡើយទេ ព្រោះកំពុងស្ថិតក្នុងការពិនិត្យ និងស្រាវជ្រាវ ដើម្បីស្វែងរកការបំភ្លឺពីសាក្សីនានាផង៕
ចែករំលែកព័តមាននេះ