ខេត្តកណ្តាល ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រតិកម្មយ៉ាងខ្លាំងចំពោះបក្សប្រឆាំងដែលបាននិយាយកាលពីពេលថ្មីៗនេះថា គណបក្សប្រជាជនដែលមានរូបសញ្ញាទេវតាបាចផ្កា គេថា មីយក្ខិនី ដែលពីមុនគេហៅស្រីលើកជើង ។ សម្តេចមានប្រសាសន៍ថា ថតសំឡេងបានទាំងអស់ និងត្រៀមផ្ញើសំឡេងខ្សែអាត់ទៅឱ្យអង្គការសង្គមស៊ីវិលទាំងក្នុងប្រទេសនិងក្រៅប្រទេស និងបញ្ជូនទៅបណ្តាស្ថានទូតនានាដែលប្រចាំនៅកម្ពុជាយើងទៀត ។
សម្តេចតេជោ នាយករដ្ឋមន្ត្រី ហ៊ុន សែន បានប្រតិកម្មចំពោះបក្សប្រឆាំងបែបនេះ នាព្រឹកថ្ងៃទី១៩ មិថុនា ឆ្នាំ២០១២ ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារសិក្សា១ខ្នង ២ជាន់ និងទីចាត់ការ១ខ្នង នៅវិទ្យាល័យ ហ៊ុន សែន អង្គពពាយ ស្ថិតក្នុងឃុំក្រាំងម្កាក់ និងអគារសិក្សា១ខ្នង២ជាន់ នៅវិទ្យាល័យ ហ៊ុន សែន ថ្នល់ទទឹង ស្ថិតក្នុងឃុំលំហាច ស្រុកអង្គស្នួល ដែលពិធីនេះបានប្រារព្ធធ្វើនៅវិទ្យាល័យ ហ៊ុន សែន អង្គពពាយ ។
សម្តេចតេជោមានប្រសាសន៍ថា នឹងបន្តថតបញ្ចូលក្នុងថាស ក្នុងមួយថាសជួនកាលមាន៥នាក់និយាយ ដាក់ជាភាសាខ្មែរ ជាភាសាអង់គ្លេស ហើយបញ្ជូនថាសទៅតែម្តង ។ ពួកនេះពីដើមហៅគណបក្សប្រជាជនថា ស្រីលើកជើង ឥឡូវចេញមកមីយក្ខិនី គឺកាន់តែធ្ងន់ធ្ងរ ។ ប៉ុន្តែយើងមិនទាន់ធ្វើអ្វីទេ យើងគ្រាន់តែបញ្ជូនឱ្យដឹងថាហេតុអ្វីបានជាគណបក្សប្រជាជនមានការចាំបាច់ដើម្បីប្រតិកម្ម ។ សញ្ញាគណបក្សរបស់គេ គឺយើងអត់ដែលមានការប៉ះ ពាល់បន្តុះបង្អាប់ដល់សញ្ញាគណបក្សគេទេ តែគេបែរជាមកបង្អាប់គណបក្សប្រជាជនលេខ៤នាំយួនចូលស្រុក ឯរូបសញ្ញាគណបក្សទៅជាយក្ខិនី ។
សម្តេចតេជោ ហ៊ុន សែន បានអះអាងថា ប៉ុន្តែគេថាអីថាចុះ ទេវតានៅ តែជាទេវតា នៅលើក្បាលបងប្អូនប្រជាពលរដ្ឋហ្នឹង ដូច្នេះទេវតាគឺនៅជាប់នឹងខ្លួនយើងរាល់គ្នាហ្នឹង ។ យក្ខិនី យើងនឹងធ្វើបន្តទៀតព្រោះយើងបានធ្វើខ្លះហើយ ។ សម្តេចមានក្តីសង្ឃឹមថា ដោយរូបសញ្ញាដដែល ហើយលេខរៀងដដែលទៀត សម្តេចព្រះសង្ឃរាជទាំងពីរគណៈចាប់ឆ្នោតកាលពីឆ្នាំ២០០៨ បានលេខ៤ លេខ៤ខ្ញុំបានបកស្រាយរួចហើយ មានទាំងពរ៤ប្រការ ធាតុទាំង៤ អ្វីៗក៏៤ ព្រហ្មវិហារធម៌ទាំង៤ …។ បើនិយាយអំពីនិមិត្តរូបអំណាចគឺនៅទន្លេបួនមុខទៀត សភា ព្រឹទ្ធសភា ព្រះបរមរាជវាំង រាជរដ្ឋាភិបាល តុលាការក៏នៅចតុមុខទាំងអស់ ខ្ញុំក៏រើសពាក្យ៤មា៉ត់ទៅទៀត បើស្រឡាញ់ បើអាណិត បើពេញចិត្ត និងមានការជឿទុកចិត្តចំពោះខ្ញុំដែលជាបេក្ខជននាយករដ្ឋមន្ត្រី គឺសុំបោះឆ្នោតតែ១សន្លឹកទេ សម្រាប់អាណត្តិ៥ឆ្នាំ ។
សម្តេចបានថ្លែងការកោតសរសើរដឹងគុណចំពោះប្រជាពលរដ្ឋទាំងអស់ដែលបានគាំទ្រគណបក្សប្រជាជន គាំទ្រចំពោះសម្តេចក្នុងឋានៈជាអតីតបេក្ខជននាយករដ្ឋមន្ត្រីកាលពីអាណត្តិមុនៗ ហើយឥឡូវនេះក៏ជាបេក្ខជននាយករដ្ឋមន្ត្រីបន្តទៀត ។ យោងទៅលើអត្រាអ្នកបោះឆ្នោតឱ្យគណបក្សប្រជាជននៅក្នុងស្រុកអង្គស្នួលនេះមានជាង៧២%។ ដូច្នេះជាអត្រាមួយខ្ពស់ណាស់ ហើយសង្ឃឹមថា នៅពេលខាងមុខ នៅថ្ងៃទី២៨ កក្កដា ខាងមុខដែលមិនយូរប៉ុន្មានទេ សង្ឃឹមថាប្រជាពលរដ្ឋទាំងអស់នឹងបោះឆ្នោតជូនគណបក្សប្រជាជន ។
បើសិនជាបងប្អូនស្រឡាញ់ បើអាណិត បើពេញចិត្ត និងមានការទុកចិត្តចំពោះនាយករដ្ឋមន្ត្រី ហ៊ុន សែន គឺសូមបោះឆ្នោតតែមួយសន្លឹកទេ ក្នុងអាណត្តិ៥ឆ្នាំ គឺបានមកដល់ហើយ ។ រក្សាទីតាំងដដែល សញ្ញាដដែល អត់មានការផ្លាស់ប្តូរទេ សូមមេត្តាគូសកន្លែងដែលគេឱ្យគូស កុំគូសខុសពីកន្លែងដែលគេឱ្យគូស ។ ទាក់ទិននឹងការប្រកាសលទ្ធផលមួយដែលប្រកាសតាមហ្វេសប៊ុក ជោគជ័យមួយលើ ហ៊ុន សែន ដោយអះអាងថា គេបានឈ្នះហ៊ុន សែន ហើយ សម្តេចតេជោមានប្រសាសន៍ថា ហ្វេសប៊ុករបស់គេមានអ្នកគាំទ្រច្រើនជាងហ្វេសប៊ុក ហ៊ុន សែន ។ ឱ! រត់ប្រណាំងម្នាក់ឯង ជយោ ទៅរួច ។ ខ្ញុំអត់មានហ្វេសប៊ុក ទេ មិនដឹងកូន ក្មួយណាបង្កើតហ្វេសប៊ុកឱ្យខ្ញុំមានច្រើនណាស់ សរសេរល្អក៏មាន សរសេរអាក្រក់ក៏មាន តែខុទ្ទកាល័យបានបញ្ជាក់រួចហើយ លោក ហ៊ុន សែន អត់មានហ្វេសប៊ុកទេ ។ សម្តេចបានរិះគន់ថា មិនដឹងជាមនុស្សនេះ បែរជាយកខ្ញុំទៅប្រណាំងនៅពេលដែលខ្ញុំពុំបានដឹងខ្លួនសោះ ។ អីុចឹងបានសេចក្តីថា គាត់រត់លៀនអណ្តាតម្នាក់ឯង រួចហើយ ជយោ អញឈ្នះហើយនៅពេលដែលខ្ញុំកំពុងសម្រាន្ត ឬកម្សាន្តអុក… ខ្ញុំកំពុងតែលេងអុក គេស្រែកជយោថាគេឈ្នះ ហ៊ុន សែន ហើយ ព្រោះហ្វេសប៊ុករបស់គេមានអ្នកគាំទ្រច្រើន ។
ពាក់ព័ន្ធនឹងបញ្ហានេះ សម្តេចតេជោ ហ៊ុន សែន បានផ្តាំផ្ញើទៅវិញ មិនមែនផ្តាំលោកឯងទេ ផ្តាំចំពោះក្មួយៗដែលបានចូលរួមក្នុងវេទិកាហ្វេសប៊ុក ក្មួយៗជាយុវជន ខ្លះជានិស្សិត គេបោកប្រាស់ក្មួយៗប៉ុណ្ណឹង គេមិនទាន់ឈ្នះឆ្នោតផង គេភូតប៉ុណ្ណឹង ចុះបើគេឈ្នះវិញ តើគេភូតក្មួយៗប៉ុណ្ណាទៀត ។ គេបានបោកក្មួយៗកាលពីថ្ងៃអាទិត្យ តាមរយៈវីដេអូខុនហ្វឺរ៉េនពីក្រៅប្រទេសមកថា គេជោគជ័យហើយ ដោយសារតែ ហ្វេសប៊ុករបស់គេមានការគាំទ្រច្រើនជាងហ្វេសប៊ុកលោក ហ៊ុន សែន ។ លោកឯង ចេះតែប្រកាសជ័យជម្នះលើ ហ៊ុន សែន នៅពេលដែលខ្ញុំអត់ដឹង បើសិនខ្ញុំប្តឹងរឿងទៀត តែខ្ញុំមិនប្តឹងទេ ខ្ញុំគ្រាន់តែថាអំពីល្បិចខូចរបស់លោកឯង ខំរត់ប្រណាំងម្នាក់ឯង ខ្ញុំអត់ដឹងខ្លួនសោះ ។
សម្តេចតេជោ ហ៊ុន សែន បញ្ជាក់ថា បើសិនខ្ញុំបង្កើតហ្វេសប៊ុកវិញ ដើម្បីរកការគាំទ្រ គឺប្រហែលជាលោកឯងទៅមិនរួចពីដៃលោក ហ៊ុន សែន ទេ ព្រោះយុវជនដែលគាំទ្រគណបក្សប្រជាជនចុចទៅស្រឡាញ់ ស្រឡាញ់ ពេញចិត្ត ពេញចិត្ត លោកឯងងាប់កន្លែងហ្នឹង ។ លោកឯងអីក៏ខូចម៉្លេះ កេងចំណេញតាំងពីអីុចឹងៗ មិនខ្មាសក្មេងទេឬ ? ប្រជាប្រិយភាពលោកឯងអីក៏ខ្លាំងម៉្លេះ ? ក្នុងអត្រាគាំទ្ររបស់លោកឯងមានកម្រិតប៉ុណ្ណឹង ។
ឯការស្ទង់មតិរបស់ IRI ខ្ញុំមានដល់ ៨៧% នៃអ្នកស្រឡាញ់ពេញចិត្ត ហ៊ុន សែន រឿងអីខ្ញុំទៅខ្លាចលោកឯង… ។ ទេ ល្បិចខូចពេកតែម្តង បើខូចម្លុឹងៗអីុចឹងបានវាអីុចឹង ដោយសារអាក្បួនខូចហ្នឹងហើយបានជាខូចអីុចឹងនោះ បានជាវាអីុចឹង ។ គ្រាន់តែនៅស្រុកអង្គស្នួលបោះឱ្យគណបក្សប្រជាជន៧២% លោកឯងគួរយល់ ។ ម្យា៉ងទៀត ចង់ឱ្យខ្ញុំទៅតទល់ជាមួយ សម្តេចបានរិះគន់ថា ខ្ញុំមិនចាំបាច់ទៅថោកជាមួយលោកឯងទេ និយាយឱ្យច្បាស់តែម្តងទៅ នេះគេបោះឆ្នោតជ្រើសតាំងតំណាងរាស្ត្រទេតើ គេថាចង់តទល់គ្នា ។
សម្តេចរិះគន់ថា ច្បាប់អត់មានចែងទេ បើមានចែងសឹមធ្វើ ។ ខ្ញុំធ្លាប់ប្រឡូកហើយក្នុងជីវិតនេះ ខ្ញុំធ្លាប់និយាយហើយក្នុងវេទិកាយុវជន ក្នុងវ័យជាង៣០ឆ្នាំ ខ្ញុំបានប្រឡូកចរចាជាមួយតួអង្គនយោបាយដ៏មានពិសោធន៍៣នាក់ ១នាក់ទល់៣ ខ្ញុំស្គាល់ហើយរសជាតិនៃការចរចាជាមួយប្រទេសមហាអំណាច រាប់ទាំងប្រធានាធិបតីអាមេរិក បារា៉ក់ អូបាមា៉ ប្រធានាធិបតីបារាំង និងមហាអំណាចដទៃទៀតដូចជា ចិន ឥណ្ឌា ជប៉ុន កូរ៉េខាងត្បូង អគ្គលេខាធិការអង្គការសហប្រជាជាតិ ទៅខ្លាចអីគ្រាន់តែរឿងអីុចឹងៗ ។ ប៉ុន្តែវាអត់មានតម្រូវក្នុងច្បាប់ឱ្យធ្វើ លោកឯងនិយាយហាក់បីដូចជាមិនស្គាល់ច្បាប់ ។
ប្រកាសថាចូលរួមបោះឆ្នោត តែអត់ទទួលស្គាល់លទ្ធផល អុញ…ទាក់ទិននឹងបញ្ហានេះសម្តេចតេជោ ហ៊ុន សែន បានប្រាប់ទៅបងប្អូនទាំងអស់ថា បងប្អូនមិនបាច់បោះឱ្យបក្សប្រឆាំងទេ ព្រោះបក្សប្រឆាំងអត់ទទួលស្គាល់លទ្ធផលនៃការបោះឆ្នោតទៅហើយ បើដូច្នោះសន្លឹកឆ្នោតបងប្អូនក្លាយទៅជាសន្លឹកឆ្នោតអត់បានការ ព្រោះគណបក្សអត់ទទួលស្គាល់ផង វាមិនអសារបង់ ។ បើដូច្នេះសូមងាកមកបោះឱ្យគណបក្សប្រជាជន បើមិនបោះឱ្យគណបក្សប្រជាជនទេ បោះឱ្យគណបក្សផ្សេងទៀតដែលប្រកួតប្រជែងនោះទៅ ។
ដូច្នេះ សូមអំពាវនាវដល់អ្នកគាំទ្រគណបក្សប្រឆាំងទាំងឡាយ ងាកមកបោះឱ្យគណបក្សប្រជាជនឬក៏បោះឱ្យបក្សដទៃផ្សេងទៀតខុសពីគណបក្សប្រឆាំង ។ នេះជាសារត្រឡប់ទៅវិញ។ ឥឡូវម៉ោងនេះហើយលោកឯងអត់មានសិទ្ធិវ៉េតូទេ គេបោះសន្លឹកឆ្នោតរួចហើយ គ.ជ.ប បានប្រកាសប្រាប់រួចហើយ ។ ពេលណាគណបក្សអ្នកឯងបោះបង់អាសនៈ គេយកអាសនៈអ្នកឯងទៅចែកជាមួយនឹងគណបក្សដទៃទៀតដែលមាននៅក្នុងមណ្ឌលជាមួយគ្នា គេអត់ទុកសិទ្ធិអ្នកឯងវ៉េតូ ចូលបោះ ឬមិនចូលបោះទេ អ្នកឯងចង់ព្រាត់ប្រាសទៅណាទៅចុះ ។
កន្លងទៅខ្ញុំថា ទៅណាក៏ទៅៗ មកវិញក៏ខ្ញុំមិនឃាត់ រួចហើយប្រើប្រាស់សម្ដីរបស់ខ្ញុំថា ដូចកាយវិការសម្រុះសម្រួល ។ ភាសានេះខ្ញុំនិយាយច្រើនដងហើយ គេមិនដែលទុកសិទ្ធិឱ្យលោកឯងមួយមិនចូលរួមបោះឆ្នោត ហើយការបោះឆ្នោតទាំងមូលត្រូវរំសាយចោលទេ ។ សូមជូនសារឱ្យអ្នកឯងភ្លឺភ្នែកបន្ដិច ។ គ.ជ.ប គេបញ្ជូនសាររួចហើយ ។ ឥឡូវបើអ្នកឯងមិនចូលក៏ការបោះឆ្នោតនៅតែប្រព្រឹត្ដទៅបាន ដោយមានបក្ស៧ដោយអត់បក្សអ្នកឯង នេះរឿងមួយ ។ រឿងមួយទៀត បើបោះហើយអ្នកឯងមិនទទួលស្គាល់លទ្ធផល ហើយបោះបង់ចោលអាសនៈ គេនឹងយកអាសនៈនេះទៅចែកឱ្យគណបក្សដទៃនៅក្នុងមណ្ឌលជាមួយគ្នា ។
ធ្វើអ្នកនយោបាយល្ងង់ដល់ថ្នាក់ហ្នឹង ប្រហែលជាទម្លាប់ធម្មតារបស់គាត់១មិនទទួល ៣ទទួល មានន័យថា ១អត់ទទួល លទ្ធផលនៃការបោះឆ្នោត ប៉ុន្ដែ៣ទទួល គឺទី១-កៅអីតំណាងរាស្រ្ដ ទី២-ប្រាក់ខែ ទី៣-អភ័យឯកសិទ្ធិ ។ បើចិត្ដសឿងចោលម្ដងទៅមើល ដូច្នេះប្រជាពលរដ្ឋកុំទៅបោះឱ្យបក្សប្រឆាំង បោះឱ្យគណបក្សដែលគេចូលប្រកួតប្រជែងវិញ ។ តែនេះជាល្បិចគំរាមទេ ក្រែងមានសម្បទានខ្លះ ។ ឧបមាថា ចុះបើសិនជាឈ្នះឆ្នោតវិញ តើអត់ទទួលស្គាល់លទ្ធផលឬ? ខូចអីក៏ខូចម៉្លេះ?
សម្តេចតេជោ ហ៊ុន សែន បានសម្តែងនូវការរីករាយយ៉ាងខ្លាំងក្នុងឋានៈជានាយករដ្ឋមន្ត្រី ដោយបានឃើញលោក ជុំ ម៉ី ផ្អាកការធ្វើបាតុកម្មតាមសំណូមពរ ហើយចាត់វិធានការតាមផ្លូវផ្សេងតាមរយៈរកមេដៃគាំទ្រ និងតាមរយៈយន្តការតុលាការ ។
ដូច្នេះតុលាការគេនឹងអាចស្រាវជ្រាវសំណុំរឿងនេះ ។ ខ្ញុំចង់បាននូវភាពស្ងប់ស្ងាត់មួួយក្នុងដំណាក់កាលការបោះឆ្នោតជិតឈានមកដល់ ខ្ញុំមានការសោកស្តាយ បើសិនជាខ្ញុំជាជនរូបនេះ ខ្ញុំនឹងទៅកាន់គុកទួលស្លែង មិនត្រឹមតែអុជធូប៣សរសៃទេ ខ្ញុំនឹងកោរសក់ថែមទៀត ព្រោះពាក្យសុំទោសវាអត់មានធ្ងន់ធ្ងរទេ ។
មួយទៀត ទាំងម្តាយក្មេក ទាំងប្រពន្ធចុង មិនអត់ឱនខាងផ្លូវច្បាប់ទេ ប្រពន្ធលែងចង់បាន១ម៉ឺនដុល្លារហើយ ប្តឹងតែម្តង ។ រហូតដល់ថ្នាក់វាយម្តាយក្មេក ទោះបីអត់ខាន់ស្លាក៏ដោយ ក៏ប៉ុន្តែគាត់បានបង្កើតចិញ្ចឹមកូនស្រីមកសម្រាប់លោកឯងធ្វើជាប្រពន្ធហើយ ។ ឯណាទៅសិទ្ធិនារី ? ទោះបីមានបញ្ហាប៉ុណ្ណឹងទៅហើយ នៅមិនទាន់មានឃើញនារីទៅអន្តរាគមន៍សោះ ដែលតាំងខ្លួនជាតំណាងឱ្យស្ត្រីខ្មែរ ។
រឿងរ៉ាវទាំងអស់នោះពួកគេបានចោទថា គណបក្សប្រជាជនរៀបចំ ។ សម្តេចតេជោ មានប្រសាសន៍ថា កន្លែងនេះ ខ្ញុំត្រូវបកស្រាយឱ្យបានដឹង ព្រោះគណបក្សប្រជាជនមិនស្មោកគ្រោកដូចលោកឯងទេ ។ លោកឯងម៉េចក៏មិននិយាយរឿងអាស្រូវរបស់អតីតប្រធានាធិបតីអាមេរិក គ្លីនតុន គ្រាន់តែរឿងទឹកមួយដំណក់ លោកឯងម៉េចក៏និយាយទៅលើសំពត់នារីម្នាក់ ។ គ្លីនតុន ត្រូវគេហៅទៅសភាដេញដោលរួចហើយបោះឆ្នោត ។ គណបក្សប្រជាជនក៏មិនចង់និយាយទេ មកពីលោកឯងចោទគណបក្សប្រជាជនជាអ្នករៀបចំ ស្រីហ្នឹងដែលតាមរករឿងលោកឯង គឺលោកឯងបង្កការលំបាកខ្លួនឯងទេតើ ។
សូមអង្គការសង្គមស៊ីវិលប្រឆាំងធ្វើឱ្យត្រឹមត្រូវបន្តិចមើល លោកឯងស្វែករកណាស់ចំណុចខ្សោយរបស់គណបក្សកាន់អំណាច រឿងមិនពិតលោកឯងប្រឌិតថាជារឿងពិត ។ លោកឯងថា ប្រជាជនវៀតណាមនៅគ្រប់ភូមិទាំងអស់ មាននៅស្រុកខ្មែរ មិនដល់១០ម៉ឺននាក់ប៉ុណ្ណោះ លោកឯងថា មាន៤,៥លាននាក់ នៅស្រុកខ្មែរ ។ បើមាន៤,៥លាននាក់ប្រហែលជានៅអង្គស្នួលមានមិនតិចទេ ។ មានខ្លះ១០នាក់ពេលដួលឈឺ ឆ្លើយអូយតែម្នាក់ទេ ក្រៅពីនេះឌូម៉ែ សម្តីនេះយើងថតសំឡេងបាន យើងនឹងផ្ញើឱ្យស្ថានទូតទៀត ដើម្បីឱ្យឃើញចរិតបែបនេះ ។
ឥឡូវ រឿងអាស្រូវផ្លូវភេទលោកឯងនេះមិនមែនគណបក្សប្រជាជនយករឿងហ្នឹងមកនិយាយទេ ប៉ុន្តែលោកឯងទេជាអ្នកបើកច្រកឱ្យគណបក្សប្រជាជនវាយលោកឯង តាមរយៈលោកឯងប្រើភាសាថា «ជាស្រីដែលគណបក្សប្រជាជនរៀបចំ» ។ ម្តាយក្មេកប្តឹងទៅតុលាការខេត្តព្រៃវែង ប្រពន្ធប្តឹងទៅតុលាការភ្នំពេញ លោកឯងប្តឹង ដូច្នេះប្តឹងនឹងប្តឹង ស្មើនឹងទៅកាន់តុលាការដូចគ្នា។ សូមសង្គមស៊ីវិលប្រឆាំងទាំងឡាយ គេឈប់ផ្ញើសារនយោបាយហើយ គេផ្ញើតែរឿងបុគ្គល ។ សូមប្រាប់អាមេរិក បារាំង ដូចជារឿងនៅអុីតាលី ចាប់ផ្តើមស្រាវជ្រាវហើយអ្នកណាប្រពន្ធចុង ប្រពន្ធដើម ។
ចំណែករឿងនេះ យើងមិនចង់លើកទេ ក៏ប៉ុន្តែលោកឯងចោទគណបក្សប្រជាជន ហើយសូមបញ្ឈប់ទៅដែលថា គណបក្សប្រជាជន ជាអ្នករៀបចំ ។ បើលោកឯងនៅតែថា យើងអាចមានសិទ្ធិប្តឹង គំរាមប្តឹងទៀត ហើយប្តឹងមុនបោះឆ្នោត ៕
ចែករំលែកព័តមាននេះ