ខេត្តកោះកុង ៖ តំណាងប្រជាពលរដ្ឋចំនួន១៩៩គ្រួសារមកពីឃុំចំនួន៦គឺ ឃុំជីខក្រោម ស្រុកស្រែអំបិល ឃុំកណ្ដោល ឃុំតានូន ឃុំថ្ម.ស ស្រុកបទុមសាគរ និងឃុំព្រែកខ្សាច់ ឃុំភ្ញីមាស ស្រុកគិរីសាគរ សរុបប្រមាណជាង២០០នាក់ បាននាំមកជួបជុំនៅមុខសាលាខេត្ត ធ្វើការតវ៉ាទាមទារពីបញ្ហាដីធ្លីមានរយៈពេល២ថ្ងៃហើយគឺនៅថ្ងៃទី១៨ និងថ្ងៃទី១៩ មិថុនា ។ ការទាមទារនេះបើតាមការឱ្យដឹងពីតំណាងប្រជាពលរដ្ឋគឺមាន៥ចំណុចដែលពួកគាត់ចង់បាន ៖
១-សូមឱ្យអាជ្ញាធរខេត្តជួយអន្តរាគមន៍ចំពោះការគំរាមកំហែងពីសំណាក់ក្រុមហ៊ុនយូញៀន(UNION) និងបុគ្គលដែលមិនឱ្យប្រជាពលរដ្ឋធ្វើស្រែចម្ការនៅលើដីរបស់ពួកគាត់ ។
២- សូមអាជ្ញាធរខេត្តជួយអន្តរាគមន៍ចេញប័ណ្ណកម្មសិទ្ធិដីធ្លីជូនប្រជាពលរដ្ឋដើម្បីងាយស្រួលក្នុងការគ្រប់គ្រងដីធ្លីរបស់ខ្លួន ។
៣- សូមអាជ្ញាធរខេត្តជួយអន្តរាគមន៍ ដើម្បីអនុវត្តតាមបទបញ្ជាលេខ០១របស់រាជរដ្ឋាភិបាលធ្វើការឆ្វៀលដីជូនប្រជាពលរដ្ឋ ។
៤-បើមិនមានដំណោះស្រាយទេសូមអាជ្ញាធរខេត្តជួយអន្តរាគមន៍ឱ្យប្រជាពលរដ្ឋបានរស់នៅលើដីទាំងនោះសិន រង់ចាំការដោះស្រាយបញ្ចប់ ។
៥- សូមអាជ្ញាធរខេត្តជួយអន្តរាគមន៍ឱ្យនិស្សិតវាស់វែងដីចុះទៅវាស់វែងដីធ្លីជូនប្រជាពលរដ្ឋ ។
បន្ទាប់ពីមានការទាមទារបែបនេះ សាលាខេត្តកោះកុងបានបើកកិច្ចប្រជុំជាបន្ទាន់មួយដោយមានការចូលរួមពីលោក ផៃធូន ផ្លាមកេសន អភិបាលរងខេត្ត នាយករងរដ្ឋបាលសាលាខេត្ត នាយក-នាយករងទីចាត់ការអន្តរវិស័យ និងតំណាងប្រជាពលរដ្ឋចំនួន១៨រូប ។ លោកផៃធូន ផ្លាមកេសន បានបញ្ជាក់ថា ចំពោះសំណូមពរទាំង៥ចំណុចខាងលើ អាជ្ញាធរខេត្តមានគោលការណ៍ដោះស្រាយដូចខាងក្រោម៖
ទី១-ចំពោះការគំរាមកំហែងរបស់ក្រុមហ៊ុនយូញៀនដែលមិនឱ្យប្រជាពលរដ្ឋធ្វើស្រែនៅលើដីរបស់ខ្លួនអាជ្ញាធរខេត្ត នឹងជួយអន្តរាគមន៍ជូនបងប្អូនបានធ្វើស្រែក្នុងអំឡុងពេលរង់ចាំដំណោះស្រាយ។
ទី២-ចំពោះការសុំឱ្យអាជ្ញាធរខេត្តចេញប័ណ្ណកម្មសិទ្ធិងាយស្រួលក្នុងការគ្រប់គ្រងដីធ្លីរបស់ខ្លួននោះបើសិនជាដីគ្មានការពាក់ព័ន្ធ ខេត្តនឹងផ្ដល់ជូនភ្លាម តែបើមានការពាក់ព័ន្ធត្រូវរង់ចាំការដោះស្រាយឱ្យចប់សព្វគ្រប់សិនទើបចេញប័ណ្ណកម្មសិទ្ធិជូននៅពេលក្រោយ ។
ទី៣-ចំពោះការសុំឱ្យខេត្តជួយអនុវត្តតាមបទបញ្ជាលេខ០១របស់រាជរដ្ឋាភិបាលដោយឆ្វៀលដីជូនប្រជាពលរដ្ឋនោះ អាជ្ញាធរខេត្តនឹងបង្កើតក្រុមការងារចុះពិនិត្យជាក់ស្ដែងរួចធ្វើរបាយការណ៍ជូនអន្តរក្រសួង ជួយរកដំណោះស្រាយជូនបងប្អូន ។
ទី៤-ចំពោះការសុំរស់នៅលើដីរបស់ខ្លួនដើម្បីរង់ចាំដំណោះស្រាយនោះ ខេត្តនឹងទាក់ទងទៅក្រុមហ៊ុនយូញៀនដើម្បីបំពេញសំណូមពររបស់បងប្អូន ។
ទី៥-ចំពោះការស្នើសុំឱ្យក្រុមនិស្សិតចុះវាស់វែងដីធ្លីជូនបងប្អូននោះអាជ្ញាធរខេត្តសូមជម្រាបថា ចំពោះស្រុកគិរីសាគរ ដែលមានក្រុមហ៊ុនយូញៀនកំពុងធ្វើវិនិយោគ ក្រសួងរៀបចំដែនដីនគរូបនីយកម្ម និងសំណង់ មិនបានអនុញ្ញាតឱ្យក្រុមនិស្សិតចុះវាស់វែងឡើយ ហើយចំពោះករណីថា មានបុគ្គលគំរាមកំហែងបងប្អូនដោយយកឈ្មោះក្រុមហ៊ុននោះ អាជ្ញាធរនឹងចាត់តាំងសមត្ថកិច្ចចុះស្រាវជ្រាវជាបន្ទាន់ ។
ទោះបីជាមានដំណោះស្រាយបែបនេះក្ដី ក៏ក្រុមប្រជាពលរដ្ឋនៅតែមិនព្រមចាកចេញដោយទាមទារសុំឱ្យអាជ្ញាធរខេត្តចុះដោះស្រាយជាក់ស្ដែង និងសុំទាមទារកម្មសិទ្ធិដីធ្លីរបស់ពួកគាត់ឱ្យបានមុនថ្ងៃបោះឆ្នោតជ្រើសតាំងតំណាងរាស្ត្រទើបពួកគាត់ព្រមចាកចេញ ។ នៅវេលាថ្ងៃត្រង់ថ្ងៃទី១៩ មិថុនា អាជ្ញាធរខេត្ត បានកោះហៅតំណាងប្រជាពលរដ្ឋទាំង១៨នាក់ឱ្យចូលពិភាក្សារកដំណោះស្រាយជាថ្មីម្ដងទៀត ប៉ុន្តែលទ្ធផលយ៉ាងណានៅមិនទាន់ទទួលបាននៅឡើយ៕
ចែករំលែកព័តមាននេះ