ខេត្តតាកែវ ៖ ប៉ូលិសការិយាល័យព្រហ្មទណ្ឌកម្រិតធ្ងន់នៃស្នងការដ្ឋានខេត្ត សហការជាមួយប៉ូលិសស្រុកទ្រាំង បានចាប់ខ្លួនស្ត្រីម្នាក់ក្នុងចំណោមបក្សពួក៤នាក់ រួចកសាងសំណុំរឿងបញ្ជូនទៅសាលាដំបូងកាត់ទោសតាមច្បាប់ ដោយជាប់ចោទពីបទនាំបក្សពួកមកវាយសម្លា.ប់ប្តីរបស់ខ្លួនដល់ក្នុងផ្ទះ និងចាប់ចងកូនប្រុសរបស់ខ្លួនចាក់សោទុកក្នុងផ្ទះយ៉ាងព្រៃ.ផ្សៃ ។
ខេត្តតាកែវ ៖ ប៉ូលិសការិយាល័យព្រហ្មទណ្ឌកម្រិតធ្ងន់នៃស្នងការដ្ឋានខេត្ត សហការជាមួយប៉ូលិសស្រុកទ្រាំង បានចាប់ខ្លួនស្ត្រីម្នាក់ក្នុងចំណោមបក្សពួក៤នាក់ រួចកសាងសំណុំរឿងបញ្ជូនទៅសាលាដំបូងកាត់ទោសតាមច្បាប់ ដោយជាប់ចោទពីបទនាំបក្សពួកមកវាយសម្លាប់ប្តីរបស់ខ្លួនដល់ក្នុងផ្ទះ និងចាប់ចងកូនប្រុសរបស់ខ្លួនចាក់សោទុកក្នុងផ្ទះយ៉ាងព្រៃផ្សៃ ។ ការចាប់ខ្លួនស្ត្រីជាប្រពន្ធដែលនាំឃាតករមកវាយសម្លាប់ប្តីនេះ បានធ្វើឡើងកាលពីថ្ងៃទី១៧ មិថុនា វេលាម៉ោង៥និង៥០នាទីល្ងាចនៅភូមិព្រៃផ្អាវ ឃុំរនាម ស្រុកទ្រាំង ។
លោកវរសេនីយ៍ទោ សែម សុជាតិ នាយការិយាល័យព្រហ្មទណ្ឌកម្រិតធ្ងន់ខេត្តបានឱ្យដឹងថា ស្ត្រីជាប្រពន្ធដែលប៉ូលិសស្រាវជ្រាវចាប់ខ្លួនបាននេះឈ្មោះ ជួន សុភាព អាយុ៣៦ឆ្នាំ ចំណែកប្តីឈ្មោះ បូ ណូន អាយុ៤៣ឆ្នាំ ។ បុរសជាប្តីត្រូវបានស្ត្រីជាប្រពន្ធនាំប្អូនធម៌ម្នាក់ និងបុរស២នាក់ផ្សេងទៀតមកវាយសម្លាប់ដល់ផ្ទះ រួចចាប់កូនប្រុសម្នាក់ចងស្លាបសេកយកក្រណាត់ចុកមាត់ និងចាក់សោទ្វារផ្ទះ ហើយនាំគ្នារត់គេចខ្លួនបាត់។ គ្រួសារមួយនេះមានកូនទាំងអស់៣នាក់ ប៉ុន្តែស្លាប់អស់២នាក់ នៅតែម្នាក់ ។
លោកនាយការិយាល័យព្រហ្មទណ្ឌកម្រិតធ្ងន់ខេត្តបានឱ្យដឹងទៀតថា កាលពីថ្ងៃទី១៥ មិថុនា វេលាម៉ោង១២ថ្ងៃត្រង់ទៅម៉ោង១រសៀល ស្ត្រីជាប្រពន្ធបាននាំប្អូនធម៌ម្នាក់ឈ្មោះ ភ័ណ ភេទប្រុស អាយុ២៤ឆ្នាំ រស់នៅស្រុកគិរីវង់ និងបុរស២នាក់ផ្សេងទៀតជិះម៉ូតូចំនួន៣គ្រឿងមកផ្ទះ ដោយទុកម៉ូតូនៅលើផ្លូវលំចូលវត្តព្រៃផ្អាវ ដែលនៅខាងត្បូងផ្ទះចម្ងាយប្រមាណ៧០០ម៉ែត្រ រួចនាំគ្នាចុះដើរកាត់ព្រៃទៅផ្ទះ ដែលជនរងគ្រោះជាប្តីនិងកូននៅក្នុងផ្ទះតែ២នាក់ប៉ុណ្ណោះ ។ នៅពេលចូលដល់ផ្ទះ ស្រ្តីជាប្រពន្ធក៏ធ្វើជាសួរនាំសុខទុក្ខប្តី រួចប្អូនធម៌របស់គេបានយកឈើជ្រុងវាយកញ្ចឹងកប្តីពីក្រោយ បណ្តាលឱ្យដួលផ្កាប់មុខទៅលើដី ហើយក្រុមជនដៃដល់បានយកខ្សែអង្រឹងចងកជនរងគ្រោះព្យួរទៅនឹងមេដំបូលផ្ទះ ដើម្បីបង្វែររឿងថាជនរងគ្រោះចងកសម្លាប់ខ្លួន។
ក្រោយពេលសម្លាប់ប្តីរួច ស្រ្តីជាប្រពន្ធនិងបក្សពួកបានចាប់ចងកូនប្រុសរបស់ខ្លួនឈ្មោះ ស៊ុន វណ្ណៈ អាយុ១៤ឆ្នាំ រួចយកក្រណាត់ចុកមាត់មិនឱ្យស្រែកទុកទៅក្នុងផ្ទះ ដោយចាក់សោទ្វារពីក្រៅ រួចនាំគ្នាជិះម៉ូតូគេចខ្លួនបាត់ ។ បើតាមកុមារា ស៊ុន វណ្ណៈ ដែលជាសាក្សីយ៉ាងសំខាន់ក្នុងហេតុការណ៍នេះនិយាយថា ឪពុក និងម្តាយរបស់គេតែងតែឈ្លោះគ្នាជានិច្ចអត់ដែលចុះសម្រុងគ្នាទេ ដោយឪពុករបស់គេខឹងនឹងម្តាយដែលតែងតែនិយាយទូរស័ព្ទជាមួយប្រុសផ្សេងរាល់ថ្ងៃមិនដែលខាន ហើយពេលនោះម្តាយរបស់គេបានសុំឪពុកទៅធ្វើការនៅរោងចក្រនៅឯភ្នំពេញ ។ នៅពេលបានទៅធ្វើការនៅរោងចក្រ ម្តាយអត់ដែលមកលេងផ្ទះទេ បើទោះបីជាឪពុករបស់គេទូរស័ព្ទទៅរកក៏ម្តាយអត់ដែលលើក សូម្បីតែលុយក៏អត់ដែលផ្ញើមកផ្ទះដែរ ។ លុះកាលពីថ្ងៃទី១២ មិថុនា កន្លងទៅឪពុករបស់គេរួមជាមួយយាយម្នាក់ បាននាំគ្នាជិះរថយន្តឈ្នួលទៅរកម្តាយដល់ផ្ទះជួលនៅភូមិព្រៃទាឯភ្នំពេញ តែនៅពេលទៅដល់ផ្ទះជួលនោះម្តាយគេបានចាកចេញទៅនៅកន្លែងផ្សេងបាត់ទៅហើយ ហើយដោយពេលល្ងាចទៅហើយ ក៏នាំគ្នាដេកនៅទីនោះមួយយប់ ។
កុមារា ស៊ុន វណ្ណៈ រៀបរាប់ទៀតថា នៅយប់នោះឪពុករបស់គេបានផឹកស្រាស្រវឹងរួចចូលទៅក្នុងបន្ទប់លេបថ្នាំកណ្តុរអស់៤កញ្ចប់ លុះមួយសន្ទុះក្រោយមករូបគេចូលទៅមើលឃើញឪពុកលែងដឹងខ្លួនទៅហើយ ទើបមានការឆោឡោផ្អើលអស់អ្នកជិតខាងមកចោមរោមមើល និងឱ្យលុយ រួចបញ្ជូនឪពុកទៅមន្ទីរពេទ្យព្រះកុសុមៈ ។ នៅព្រឹកថ្ងៃទី១៣ មិថុនា ពេលឪពុករបស់គេបានធូរស្បើយហើយ ក៏ចេញពីមន្ទីរពេទ្យត្រឡប់ទៅផ្ទះយាយនៅភូមិត្រពាំងអណ្តើក ស្រុកត្រាំកក់ ដេកនៅទីនោះ១យប់ លុះនៅថ្ងៃទី១៤ មិថុនា ក៏ត្រឡប់មកផ្ទះឯភូមិព្រៃផ្អាវវិញ ។ នៅថ្ងៃទី១៥ មិថុនា វេលាម៉ោង១១ព្រឹក ស្រាប់តែឃើញម្តាយរបស់ខ្លួនទៅដល់ផ្ទះដោយនាំបុរស៣នាក់មកជាមួយផង ។ ក្នុងចំណោមមនុស្ស៣នាក់នោះ រូបគេស្គាល់បុរសម្នាក់ឈ្មោះ ភ័ណ រស់នៅក្នុងស្រុកគិរីវង់ ធ្វើជាទាហាននៅបន្ទាយស្វាយទំនប់ និងត្រូវជាប្អូនធម៌ម្ដាយរបស់ខ្លួន ។
នៅពេលសួរសុខទុក្ខគ្នារួច ឪពុករបស់គេដើរចូលក្នុងផ្ទះ ស្រាប់តែឃើញឈ្មោះភ័ណ នោះយកដំបងវាយឪពុកពីក្រោយចំកញ្ចឹងក បណ្តាលឱ្យដួលលើដី រួចពួកគេបាននាំគ្នាលើកឪពុកដាក់លើគ្រែ ហើយយកខ្សែអង្រឹងចងកគាត់ព្យួរទៅនឹងមេដំបូលផ្ទះ ។ ចំណែកម្ដាយរបស់ខ្លួនបានចាប់ខ្ទប់មាត់ខ្លួនជាប់មិនឱ្យស្រែករួចចងដៃទៅក្រោយ និងយកក្រណាត់ចុកមាត់ទុកក្នុងផ្ទះចាក់សោទ្វារជិត បន្ទាប់មកក៏គេចខ្លួនបាត់អស់ទៅ ។ លោកនាយការិយាល័យព្រហ្មទណ្ឌកម្រិតធ្ងន់ខេត្តបញ្ជាក់ថា បើទោះបីជាស្ត្រីសង្ស័យមិនព្រមសារភាពបែបណាក៏ដោយ ក៏កូនប្រុសម្នាក់ដែលឃើញផ្ទាល់ភ្នែកបាននិយាយរៀបរាប់អំពីសកម្មភាពរបស់ម្តាយខ្លួនរួចហើយដែរ ។ នៅរសៀលថ្ងៃទី១៩ មិថុនា សមត្ថកិច្ចប៉ូលិសបានកសាងសំណុំរឿងបញ្ជូនស្ត្រីសង្ស័យរូបនេះទៅសាលាដំបូងខេត្ត ។ សូមបញ្ជាក់ថា រឿងរ៉ាវប្រពន្ធនាំប្អូនធម៌ទៅសម្លាប់ប្ដីដល់ផ្ទះនោះ កោះសន្ដិភាពបានចុះផ្សាយមួយឈុតរួចហើយកាលពីសប្ដាហ៍មុនពេលបុរសជាប្ដីលេបថ្នាំកណ្ដុរប៉ងធ្វើអត្តឃាត បន្ទាប់ពីដឹងថា ប្រពន្ធរបស់ខ្លួនលួចមានសហាយស្មន់ជាមួយបុរសជាប្អូនធម៌នោះ ៕
ចែករំលែកព័តមាននេះ