រាជធានីភ្នំពេញ ៖ សន្តិសុខយាមបុរីមួយកន្លែងនៅសង្កាត់ភ្នំពេញថ្មី បាននិយាយឌឺដងតាមអាយកូមដាក់មន្ត្រីយោធាម្នាក់បង្កទៅជាកំហឹងតមាត់គ្នាតឹងសរសៃ.កទ្រាំមិនបានមន្ត្រីយោធារូបនោះដកកាំភ្លើងភ្ជង់ប្រុងបាញ់បំបាក់ភ្លៅក្លាយជាជនជាប់ចោទពីបទប្រើកាំភ្លើងខុសច្បាប់ ត្រូវកម្លាំងប៉ូលិសខណ្ឌសែនសុខ ឃាត់ខ្លួន នាវេលាម៉ោង៧ព្រឹកថ្ងៃទី១៩ មិថុនា ២០១៣។
ព័ត៌មានពីកន្លែងកើតហេតុឱ្យដឹងថា មន្ត្រីយោធារូបនោះឈ្មោះព្រំ សឿន អាយុ៥១ឆ្នាំ បម្រើការនៅក្រសួងការពារជាតិមានទីលំនៅភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ ។ ចំណែកឯសន្តិសុខដែលបង្ករឿងមុនឈ្មោះធឿន សារី ភេទប្រុស អាយុ៣៨ឆ្នាំ ស្នាក់នៅកន្លែងកើតហេតុ ។
ប្រភពព័ត៌មានបន្តថា ដំបូងឡើយសន្តិសុខរូបនេះបាននិយាយឌឺដងតាមអាយកូមដាក់មន្ត្រីយោធាខាងលើដែលគាត់កំពុងសម្រាកនៅផ្ទះរបស់គាត់ខណ្ឌឫស្សីកែវ ។ ក្រោយមកមន្ត្រីយោធារូបនោះក៏មកជួបសន្តិសុខរូបនោះដល់កន្លែងជជែកគ្នាតឹងសរសៃ.ក ទ្រាំមិនបានដកកាំភ្លើងខ្លីម៉ាកប៉េហ្សឺរ៉ូវីត ភ្ជង់ ក៏ត្រូវសមត្ថកិច្ចចាប់ឃាត់ខ្លួនកសាងសំណុំរឿងចាត់ការតាមផ្លូវច្បាប់។
សមត្ថកិច្ចបញ្ជាក់ថា មន្ត្រីយោធារូបនេះកាន់កាំភ្លើងមានច្បាប់អនុញ្ញាត តែហួសសុពលភាពប្រើប្រាស់ ៕
ចែករំលែកព័តមាននេះ