ខេត្តកំពង់ស្ពឺ៖ កាលពីពាក់កណ្តាលខែមិថុនាកន្លងទៅ នៅស្រុកឱរ៉ាល់បងប្អូននៅទីនោះបានទទួលការព្យាបាលពីសំណាក់ក្រុមគ្រូពេទ្យស្ម័គ្រចិត្តនិងទទួលបានថ្នាំពេទ្យដែលជាអំណោយរបស់លោកហ៊ុន ម៉ានី បេក្ខភាពតំណាងរាស្រ្តមណ្ឌលកំពង់ស្ពឺ តាមរយៈលោកលេង ផាលី ក្រុមការងារថ្នាក់កណ្តាលចុះជួយស្រុកឱរ៉ាល់ និងជាប្រធានក្រុមការងារជួយឃុំហោងសំណុំ សហការជាមួយវិទ្យាស្ថានវិទ្យាសាស្រ្តសុខាភិបាល ជួយពិនិត្យនិងព្យាបាលជំងឺមួយថ្ងៃពេញ។
លោក អ៊ិន សុន្ឋរ៉ានាយកវិទ្យាស្ថានវិទ្យាសាស្រ្តសុខាភិបាលបានលើកឡើងថា ដើម្បីចូលរួមក្នុងសកម្មភាពមនុស្សធម៌ក្នុងនាមលោកជាអ្នកដឹកនាំគ្រូពេទ្យ គោលបំណងតែមួយគត់គឺជួយព្យាបាលបងប្អូនឱ្យបានធូរស្បើយដោយមិនប្រកាន់និន្នាការ និងនយោបាយអ្វីទាំងអស់ ដើម្បីលើកកម្ពស់សុខភាពអ្នកនៅជនបទ ។ តាមរយៈការមកទីនេះលោកសូមផ្តាំផ្ញើដល់ប្រជាពលរដ្ឋទាំងអស់ ត្រូវរស់នៅស្អាតប្រកបដោយអនាម័យ និងជៀសវាងជំងឺដង្កាត់ផ្សេងៗដូចជា គ្រុនឈាម គ្រុនចាញ់ ជាដើម ។
លោកចែម សារឹម អភិបាលស្រុកឱរ៉ាល់បានថ្លែងអំណរគុណចំពោះគ្រូពេទ្យ និងក្រុមការងារបក្សប្រជាជនកម្ពុជាដែលបានយកចិត្តទុកដាក់គិតគូរដល់សុខភាពប្រជាពលរដ្ឋនៅទីនេះ ហើយនេះជាលើកទី១ដែលបងប្អូនយើងបានការព្យាបាលមិនគិតថ្លៃពីថ្នាក់ដឹកនាំដោយក្តីស្រឡាញ់ ។
លោកលេង ផាលីបានមានប្រសាសន៏ថាសកម្មភាពនៃការព្យាបាលដោយមិនគិតថ្លៃនេះជាការបង្ហាញឱ្យឃើញនូវការយកចិត្តទុកដាក់របស់ក្រុមការងាររបស់គណបក្សប្រជាជនកម្ពុជា លើសុខទុក្ខរបស់បងប្អូនមិនប្រកាន់បក្សនិន្នាការនយោបាយ ដែលក្រោមការដឹកនាំរបស់សម្តេចតេជោហ៊ុន សែនបានធ្វើឱ្យប្រទេសជាតិមានការរីកចម្រើនលើគ្រប់វិស័យ ពិសេសវិស័យសុខាភិបាលក៏បានលើកស្ទួយសុខភាពប្រជាពលរដ្ឋផងដែរ ៕
ចែករំលែកព័តមាននេះ